യുദ്ധധ്വനികളും കരച്ചിലുകളും മാത്രം മുഴങ്ങിയ ഉക്രൈന്‍ യുദ്ധകളത്തില്‍ ഇപ്പോള്‍ മുഴങ്ങുന്നത് ഇന്ത്യന്‍ മന്ത്രങ്ങള്‍. ഒപ്പം ഉക്രൈന് കരുത്തായി വിശുദ്ധ ജാവ്‌ലിനും. ഉക്രൈന്‍ യുദ്ധഭൂമിയില്‍ ഹരേ രാമ ഹരേ കൃഷ്ണ മന്ത്രങ്ങളാണ് മുഴങ്ങുന്നത്. റഷ്യയില്‍ നിന്ന് കനത്ത ആക്രമണം നേരിടുന്ന ഉക്രൈന്റെ സൈനികരാണ് ഇന്ത്യന്‍ ദൈവങ്ങളെ കൂട്ടുപിടിച്ചിരിക്കുന്നത്.റഷ്യക്കാര്‍ക്കെതിരെ പോരാടാനുള്ള കരുത്ത് നല്‍കിയത് ഭഗവദ് ഗീത ശ്ലോകങ്ങള്‍ ആണെന്നാണ് ഉക്രെയ്ന്‍ സൈനികര്‍ പറയുന്നത്. ആന്‍ഡ്രെ, എന്ന സൈനികനാണ് റഷ്യന്‍ ആക്രമണങ്ങള്‍ക്കെതിരെ കീയവിനെ പ്രതിരോധിക്കാന്‍ തയ്യാറെടുക്കുമ്പോള്‍ കൂടുതല്‍ ശക്തി നേടുന്നതിനായി ഒരു പറ്റം സൈനികര്‍ ദിവസവും ഹിന്ദു ശ്ലോകങ്ങള്‍ മുടങ്ങാതെ ചൊല്ലുമെന്ന് വ്യക്തമാക്കിയത്.ഒരു അന്തര്‍ദ്ദേശീയ മാദ്ധ്യമത്തിന്  നല്‍കിയ അഭിമുഖത്തിലാണ് അദ്ദേഹം ഇക്കാര്യം പറഞ്ഞത്. താന്‍ കടുത്ത കൃഷ്ണ ഭക്തനാണെന്നും തന്റെ ആത്മവിശ്വാസം വര്‍ധിപ്പിക്കാന്‍ മഹാ മന്ത്രമായ ''ഹരേ രാമ ഹരേ കൃഷ്ണ'' യും മറ്റ് ഹിന്ദു മന്ത്രങ്ങളും ശ്ലോകങ്ങളും ഉരുവിടുന്നുണ്ടെന്നും ആന്‍ഡ്രെ പറഞ്ഞു.രണ്ടുതവണ ഇന്ത്യ സന്ദര്‍ശിച്ചിട്ടുള്ള താന്‍ ഒരു 'ക്ഷത്രിയ' യോദ്ധാവ് അല്ല . എങ്കിലും റഷ്യന്‍ ആക്രമണങ്ങളില്‍ നിന്ന് തന്റെ ജന്മനാടായ ഉക്രെയ്‌നെ സംരക്ഷിക്കാന്‍ ആഗ്രഹിക്കുന്നുവെന്നും ആന്‍ഡ്രെ പറഞ്ഞു. ഉക്രെയ്ന്‍ നഗരങ്ങളുടെ നിയന്ത്രണം ഏറ്റെടുക്കാന്‍ റഷ്യയും , പ്രതിരോധിക്കാന്‍ ഉക്രെയ്ന്‍ സൈനികരും പരസ്പരം ഏറ്റുമുട്ടുമ്പോള്‍ ഇരുവശത്തുമുള്ള സൈനികര്‍ അവരുടെ മനോവീര്യം ഉയര്‍ത്താന്‍ പാടുപെടുകയാണ്. അത്തരം സമയത്ത് മനസ് ശാന്തമായിരിക്കാന്‍ ഹിന്ദു മന്ത്രങ്ങള്‍ ഉരുവിടുന്നത് നല്ലതാണെന്നും , കരുത്തേകുമെന്നും ആന്‍ഡ്രെ പറയുന്നു.25 വര്‍ഷം മുമ്പ് കീയവിലെ 'ഹരേ കൃഷ്ണ' പ്രസ്ഥാനത്തില്‍ ചേര്‍ന്നപ്പോഴാണ് താന്‍ മന്ത്രങ്ങള്‍ പഠിച്ചത്. പുസ്തകങ്ങളും  ഗ്രന്ഥങ്ങളും വായിച്ചാണ് താന്‍ ഭക്തിയുടെയും വേദാന്തത്തിന്റെയും ആശയം കണ്ടെത്തിയതെന്നും അദ്ദേഹം പറയുന്നു . ഒരു മുന്‍ പ്രൊഫഷണല്‍ അത്ലറ്റ് കൂടിയാണ് ആന്‍ഡ്രെ.

തീര്‍ന്നില്ല ്റഷ്യന്‍ അധിനിവേശത്തിനെതിരെ ഒരു ചിത്രം ലോകവ്യാപകമായി പ്രചരിപ്പിക്കപ്പെടുന്നത്. ഈ ചിത്രമാണ് ഇന്ന് ഉക്രൈന്‍ പ്രതിരോധത്തിന്റെ ചിഹ്നമായി വിപണി കീഴടക്കുന്നത്.  അതാണ് വിശുദ്ധ ജാവലിന്‍. മഹാമാരിക്ക് ശേഷം അനക്കമറ്റിരുന്ന വിപണി വീണ്ടും സജീവമാകുന്നതിനിടെയാണ് റഷ്യ, തങ്ങളുടെ ഉക്രൈന്‍ അധിനിവേശത്തിന് തുടക്കമിട്ടത്. ഇതോടെ സജീവമായിത്തുടങ്ങിയ വിപണി വീണ്ടും തകര്‍ച്ചയിലേക്ക് കൂപ്പുകുത്തി. യുദ്ധത്തെ തുടര്‍ന്ന് ലോക വിപണി തകരുമ്പോള്‍ അവിടെ ഉക്രൈന്റെ പോരാട്ട ചിഹ്നമായ 'വിശുദ്ധ ജാവലിന്‍'  വിപണി കീഴടക്കുകയാണെന്ന് വാര്‍ത്തകള്‍ വരുന്നു.  ഉക്രൈന്റെ ദേശീയ പതാകയുടെ നിറങ്ങളുള്ള വസ്ത്രം ധരിച്ച കന്യാമറിയം യുഎസ് നിര്‍മ്മിത എഫ് ജി എം 148 ടാങ്ക് വേധ ആയുധം പിടിച്ച് നില്‍ക്കുന്ന ചിത്രമാണ് വിശുദ്ധ ജാവലിന്‍ എന്ന് അറിയപ്പെടുന്നത്. ക്രിസ്റ്റ്യന്‍ ബോറിസ് വികസിപ്പിച്ച ഈ ചിത്രം ഇന്ന് ഉക്രൈന്‍ പ്രതിരോധത്തിന്റെ ചിഹ്നമായി മാറി. ടോട്ട് ബാഗുകള്‍ മുതല്‍ ഷര്‍ട്ടുകള്‍, പതാകകള്‍, സ്റ്റിക്കറുകള്‍, പാത്രങ്ങള്‍, കപ്പുകള്‍  തുടങ്ങി എല്ലാറ്റിലും ആ ചിത്രത്തിനാണ് ഇപ്പോള്‍ ഏറെ ആവശ്യക്കാരുള്ളതെന്നും മുന്‍ സ്വതന്ത്ര മാധ്യമപ്രവര്‍ത്തകനായ ക്രിസ്റ്റ്യന്‍ ബോറിസ് പറയുന്നു.  സായുധ സന്യാസിനിയുടെ ഈ ചിത്രം വിപണിയില്‍ നിന്ന് ഇതുവരെ ഒരു മില്യണ്‍ ഡോളര്‍ സമാഹരിച്ച് കഴിഞ്ഞു. ചിത്രത്തില്‍ നിന്നുള്ള വരുമാനം ഉക്രൈന്റെ പ്രതിരോധ പ്രവര്‍ത്തനങ്ങള്‍ക്കായിരിക്കും ഉപയോഗിക്കുക. യുദ്ധം അവസാനിച്ചാല്‍ ഉക്രൈന്റെ പുനര്‍നിര്‍മ്മാണത്തിനും ഈ ചിത്രത്തില്‍ നിന്നുള്ള വരുമാനം ഉപയോഗിക്കും.

വിശാലമായ ഒരു വിപണിയെയാണ് സെന്റ് ജാവലിന്‍ ലക്ഷ്യമിടുന്നതെന്നും ക്രിസ്റ്റ്യന്‍ ബോറിസണ്‍ പറയുന്നു. ഒരു മുഴുവന്‍ സമയ ക്യാമ്പൈനുള്ള സാധ്യത അന്വേഷിക്കുകയാണെന്നും അതിനായി സ്ഥിരം ജീവനക്കാരെ വയ്ക്കുന്നതടക്കമുള്ള സാധ്യതയെ കുറിച്ച് അന്വേഷിക്കുകയാണെന്നും ക്രിസ്റ്റ്യന്‍ ബോറിസ് പറഞ്ഞു. അങ്ങനെ ഭക്തിയും വിശ്വാസവും ഒക്കെ സംഘര്‍ഷഭൂമിയില്‍ സൈനികര്‍ക്കൊപ്പം ചര്‍ച്ചയാവുകയാണ്.