യുക്രൈന്റെ ആക്രമണം റഷ്യ പ്രതീക്ഷിച്ചതിനേക്കാള്‍ ഭീകരമാണിപ്പോള്‍. നേരത്തേ യുക്രൈന്‍ പീരങ്കികള്‍ ഉപയോഗിച്ചാണ് ആക്രമണങ്ങള്‍ നടത്തിയിരുന്നതെങ്കില്‍ ഇപ്പോള്‍ ഏത് ആയുധമാണവര്‍ ഉപയോഗിക്കുന്നത് എന്നുപോലും അറിയാന്‍ കഴിയാത്ത അവസ്ഥയിലാണ് റഷ്യ. കെര്‍സണ്‍ എയര്‍ ബേസില്‍ നടന്ന ആക്രമണം ചൂണ്ടിക്കാണിച്ചാണ് റഷ്യ ഈ ആശങ്ക പങ്കുവയ്ക്കുന്നത്. ആദ്യം പീരങ്കികള്‍ ഉപയോഗിച്ച് നടത്തിയ ആക്രമണത്തിന് ശേഷം മാര്‍ച്ച് 7ന്, യുക്രെയ്‌നിയന്‍ സൈനികര്‍ നടത്തിയ ആക്രമണത്തില്‍ റഷ്യയുടെ 30 ഹെലികോപ്റ്ററുകള്‍ നശിപ്പിച്ചതായാണ് റിപ്പോര്‍ട്ട്.

ചൊവ്വാഴ്ചയാണ് ആക്രമണം നടന്നത്. ആക്രമണം നടക്കുന്ന ആ നിമിഷം പകര്‍ത്തിയ ആകാശദൃശ്യങ്ങളും പുറത്തുവന്നിട്ടുണ്ട്. പ്ലാനറ്റ് ലാബ്‌സ് പിബിസി പുറത്തുവിട്ട സാറ്റലൈറ്റ് ഫോട്ടോകളിലെല്ലാം ഭീകരകാഴ്ചകളാണ് കാണുന്നത്.

റഷ്യ പിടിച്ചെടുത്ത വ്യോമതാവളത്തിലാണ് യുക്രെയ്ന്‍ ആക്രമിച്ചത്. ഇവിടെ ലാന്‍ഡ് ചെയ്തിരുന്ന നിരവധി സൈനിക ഹെലികോപ്റ്ററുകളും യുദ്ധവിമാനങ്ങളും വാഹനങ്ങളും തീപിടിക്കുന്നതായാണ് സാറ്റലൈറ്റ് ദൃശ്യങ്ങളില്‍ കാണിക്കുന്നത്. രാജ്യത്തിന്റെ തെക്കന്‍ ഭാഗത്തുള്ള കെര്‍സണ്‍ എയര്‍ബേസിലാണ് ആക്രമണം നടന്നത്. ഈ താവളത്തില്‍ ആഴ്ചകള്‍ക്കിടെ യുക്രെയ്‌നിയന്‍ നടത്തുന്ന രണ്ടാമത്തെ വലിയ ആക്രമണമാണിത്.

മാര്‍ച്ച് 15 ന് പ്രാദേശിക സമയം 11.35 ന് പകര്‍ത്തിയ സാറ്റലൈറ്റ് ചിത്രമാണ് ഇപ്പോള്‍ പുറത്തുവന്നിരിക്കുന്നത്. ചിത്രത്തില്‍ തീയും പുകയും മുകളിലേക്ക് ഉയരുന്നത് കാണാം. നിരവധി ഹെലികോപ്റ്ററുകള്‍, വിമാനങ്ങള്‍, വാഹനങ്ങള്‍ ഉള്‍പ്പെടെ വിന്യസിച്ചതായും ചിത്രങ്ങളില്‍ വ്യക്തമാണ്. കെര്‍സണ്‍ ഇന്റര്‍നാഷണല്‍ എയര്‍പോര്‍ട്ടുമായി സഹകരിച്ച് പ്രവര്‍ത്തിക്കുന്ന കെര്‍സണ്‍ എയര്‍ബേസില്‍ ആക്രമണം നടത്താന്‍ യുക്രെയ്‌നിയന്‍ സൈന്യം അത്യാധുനിക ആയുധങ്ങളാണ് ഉപയോഗിച്ചതെന്ന റിപ്പോര്‍ട്ടുകളും പുറത്തുവരുന്നുണ്ട്. ഇത് സംബന്ധിച്ച് സമൂഹ മാധ്യമങ്ങളില്‍ ചര്‍ച്ച നടക്കുന്നുണ്ട്. കാട്ടുതീ ട്രാക്കുചെയ്യാന്‍ സാധാരണയായി ഉപയോഗിക്കുന്ന ഹീറ്റ് മാപ്പിങ് ഡേറ്റ ഇതിനകം തന്നെ എയര്‍ഫീല്‍ഡില്‍ കാര്യമായ തീപിടുത്തങ്ങള്‍ ഉണ്ടായെന്ന് സൂചിപ്പിച്ചിരുന്നു.

നഗരത്തിന്റെ നിയന്ത്രണം ഏറ്റെടുത്തതിന് ശേഷം റഷ്യന്‍ സൈന്യം ഡസന്‍ കണക്കിന് ഹെലികോപ്റ്ററുകള്‍ കെര്‍സണ്‍ എയര്‍ബേസിലേക്ക് മാറ്റിയതായി മാര്‍ച്ച് 15ന് മുന്‍പ് പകര്‍ത്തിയ സാറ്റലൈറ്റ് ചിത്രങ്ങളില്‍ വ്യക്തമാണ്. കൂടാതെ, ഫെബ്രുവരി 28ന് പകര്‍ത്തിയ ഒരു ചിത്രത്തില്‍ ഇല്ലാത്ത വാഹനങ്ങളുടെ ഒരു വലിയ നിര തന്നെ ഇപ്പോഴത്തെ ചിത്രങ്ങളില്‍ കാണാം.