യുദ്ധത്തിനെതിരെ പ്രക്ഷോഭം നടത്തുന്നവരും യു.എസിനെയും മറ്റു രാജ്യങ്ങളെയും സഹായിക്കുന്നവരും റഷ്യയെയാണ് വഞ്ചിക്കുകയാണെന്നും രാജ്യദ്രോഹികളെ തുടച്ചുനീക്കുമെന്നും റഷ്യന്‍ പ്രസിഡന്റ് വ്‌ലാഡിമിര്‍ പുടിന്റെ മുന്നറിയിപ്പ്. വഞ്ചകരേയും ദേശസ്‌നേഹികളേയും തിരിച്ചറിയാന്‍ റഷ്യക്കാര്‍ക്ക് സാധിക്കുമെന്നും ചതിക്കുന്നവരെ കടിച്ചുതുപ്പുമെന്നും പുടിന്‍ വ്യക്തമാക്കി.

റഷ്യന്‍ ടിവി ചാനലില്‍ യുദ്ധവിരുദ്ധ റാലിയുടെ ദൃശ്യങ്ങള്‍ വന്നതിനു പിന്നാലെയാണ് പുടിന്റെ പ്രസ്താവന. റഷ്യയ്ക്കകത്തും പുറത്തും യുദ്ധത്തിനെതിരെ നിരവധി പ്രക്ഷോഭങ്ങളാണ് അരങ്ങേറുന്നത്. ഇത് നടത്തുന്നവര്‍ക്കെതിരെ രാജ്യദ്രോഹ കുറ്റം അടക്കമാണ് ചുമത്തുന്നത്. വിലക്കു ലംഘിച്ചു പ്രക്ഷോഭം നടത്തിയ ആയിരക്കണക്കിന് റഷ്യയില്‍ അറസ്റ്റ് ചെയ്തിരുന്നു.

പിന്നാലെയാണ് സ്വയം ശുദ്ധീകരണം നടത്തിയാല്‍ മാത്രമേ രാജ്യത്തെ ശക്തിപ്പെടുത്താന്‍ സാധിക്കൂ എന്നും, രാജ്യത്തിന്റെ ഐക്യത്തിനും സഹവര്‍ത്തിത്വത്തിനും ഇത് അത്യാവശ്യമാണെന്നും. ഇത്തരം വെല്ലുവിളികള്‍ അതിനാല്‍ തന്നെ ഏറ്റെടുക്കുമെന്നും. റഷ്യയെ നശിപ്പിക്കുക എന്നത് പാശ്ചാത്യ രാജ്യങ്ങളുടെ ലക്ഷ്യമാണെന്നും. രാജ്യത്തെ അഭിസംബോധന ചെയ്ത് നടത്തിയ പ്രസംഗത്തില്‍ പുടിന്‍ മുന്നറിയിപ്പുനല്‍കി.

ദേശസ്നേഹികളില്‍നിന്ന് വഞ്ചകരെയും കീടങ്ങളെയും തിരിച്ചറിയാനും അബദ്ധത്തില്‍ വായില്‍പെട്ടുപോയ ഈച്ചയെ തുപ്പിക്കളയാനും ആര്‍ക്കും, പ്രത്യേകിച്ച് ഏത് റഷ്യക്കാരനും കഴിയും. സ്വാഭാവികവും അത്യാവശ്യവുമായ ഈ സമൂഹത്തിന്റെ ആത്മശുദ്ധീകരണത്തിലൂടെ മാത്രമേ നമ്മുടെ രാജ്യത്തെയും സാഹോദര്യത്തെയും അഖണ്ഡതയെയും ശക്തിപ്പെടുത്താനും ഏതു വെല്ലുവിളിയും നേരിടാന്‍ നമ്മെ പ്രാപ്തമാക്കാനുമാകൂവെന്ന് എനിക്ക് ബോധ്യപ്പെട്ടിട്ടുണ്ട്-പ്രസംഗത്തില്‍ പുടിന്‍ വ്യക്തമാക്കി.

അഞ്ചാംപത്തികളായ റഷ്യന്‍ വഞ്ചകരെ ഉപയോഗിച്ച് രാജ്യത്ത് അസ്ഥിരത സൃഷ്ടിക്കാനാണ് പടിഞ്ഞാറന്‍ രാജ്യങ്ങള്‍ ശ്രമിക്കുന്നതെന്നും പുടിന്‍ ആരോപിച്ചു. അവര്‍ക്ക് ഒറ്റ ലക്ഷ്യമേയുള്ളൂ; റഷ്യയെ തകര്‍ക്കല്‍. അക്കാര്യം താന്‍ മുന്‍പുതന്നെ വ്യക്തമാക്കിയതാണെന്നും റഷ്യന്‍ പ്രസിഡന്റ് കൂട്ടിച്ചേര്‍ത്തു.

റഷ്യന്‍ നഗരങ്ങളില്‍ നടന്ന യുദ്ധവിരുദ്ധ പ്രകടനങ്ങളെ പൊലീസ് വ്യാപകമായി അടിച്ചമര്‍ത്തിയിരുന്നു. പ്രതിഷേധങ്ങളില്‍ പങ്കെടുത്ത ആയിരക്കണക്കിനു പൗരന്മാരെ ജയിലിലടക്കുകയും ചെയ്തിട്ടുണ്ട്. അതിനിടയിലും രാജ്യത്തിന്റെ വിവിധ ഭാഗങ്ങളില്‍നിന്ന് വലിയ തോതില്‍ യുക്രൈന്‍ അധിനിവേശത്തിനെതിരെ വ്യാപക പ്രതിഷേധമുയരുന്നുണ്ട്.

കഴിഞ്ഞ ദിവസം റഷ്യന്‍ വാര്‍ത്താചാനലില്‍ ഒരു മാധ്യമപ്രവര്‍ത്തക തത്സമയ വാര്‍ത്താ ബുള്ളറ്റിനിടെ യുദ്ധവിരുദ്ധ പ്രതിഷേധവുമായി രംഗത്തെത്തിയത് ആഗോളശ്രദ്ധ പിടിച്ചുപറ്റിയിരുന്നു. മാധ്യമങ്ങള്‍ നിങ്ങളോട് കള്ളം പറയുകയാണെന്നും യുദ്ധം അവസാനിപ്പിക്കണമെന്നും ആവശ്യപ്പെട്ടുള്ള പ്ലക്കാര്‍ഡ് ഉയര്‍ത്തിയായിരുന്നു 'ചാനല്‍ 1' എന്ന റഷ്യന്‍ ചാനലില്‍ ന്യൂസ് എഡിറ്ററായ മരീന ഒവ്സൈനിക്കോവ പ്രതിഷേധിച്ചത്. സംഭവത്തിനു പിന്നാലെ ഇവരെ മോസ്‌കോ പൊലീസ് അറസ്റ്റ് ചെയ്ത് മണിക്കൂറുകളോളം കസ്റ്റഡിയില്‍ വച്ചിരുന്നു.