കാണ്ഡഹാര്‍ വിമാന റാഞ്ചലില്‍ ഉള്‍പ്പെട്ട രണ്ടാമത്തെ തീവ്രവാദിയെയും കറാച്ചിയില്‍ അജ്ഞാതര്‍ വെടിവച്ചുകൊന്നതായി റിപ്പോര്‍ട്ട്. സോഷ്യല്‍ മീഡിയയിലാണ് ഈ വാര്‍ത്ത പരന്നത്. 1999 ഡിസംബര്‍ 24 ന് ഐസി 814 വിമാനം ഹൈജാക്ക് ചെയ്ത സഫറുള്ള ജമാലിയാണ് കൊല്ലപ്പെട്ടതെന്നാണ് വാര്‍ത്ത.

മോട്ടോര്‍ സൈക്കിളില്‍ വന്ന ചിലര്‍ കാണ്ഡഹാര്‍ വിമാന റാഞ്ചലില്‍ ഉള്‍പ്പെട്ട രണ്ടാമത്തെ തീവ്രവാദിയായ ഹര്‍ക്കത്തുള്‍ മുജാഹിദീന്‍ ഭീകരവാദിയായ സഫറുള്ള ജമാലിയെ കഴിഞ്ഞാഴ്ച കൊലപ്പെടുത്തി എന്നാതരത്തിലാണ് സോഷ്യല്‍ മീഡിയയില്‍ വാര്‍ത്തവരുന്നത്. സ്ഥിരീകരിക്കാത്തൊരു വാര്‍ത്തയാണിത്. സഫറുള്ള ജമാലി വിമാന റാഞ്ചലിനിടെ ഒരു ഇന്ത്യന്‍ യാത്രക്കാരനെ(റുപിന്‍ കട്യാല്‍) ദുബായില്‍ വച്ച് കൊലപ്പെടുത്തിയെന്നായുരുന്നു സോഷ്യല്‍ മീഡിയയിലെ റിപ്പോര്‍ട്ട്. എന്നാല്‍ സോഷ്യല്‍ മീഡിയയില്‍ പ്രചരിക്കുന്ന പോലെ സഫറുള്ള ജമാലി എന്നൊരാള്‍ കൊല്ലപ്പെട്ടിട്ടില്ല എന്നാണ് 'ഓപ് ഇന്ത്യ' റിപ്പോര്‍ട്ട് ചെയ്യുന്നത്. കാണ്ഡഹാര്‍ റാഞ്ചലില്‍ ജമാലി എന്ന പേരിലൊരു ഭീകരന്‍ ഉണ്ടായിരുന്നില്ല. എന്നാല്‍, കൊല്ലപ്പെട്ടത് സഹൂര്‍ മിസ്ത്രി എന്ന ഭീകരനാണെന്നും ഇയാളുടെ മറ്റൊരു പേര് ജമാലിയാണ് എന്നും പാക്ക് മാധ്യമങ്ങള്‍ സ്ഥിരീകരിക്കുന്നു. മാര്‍ച്ച് ഏഴിന് കറാച്ചിയിലെ അക്തര്‍ കോളനിയില്‍വച്ച് ബൈക്കിലെത്തിയ രണ്ട് അക്രമികള്‍ വിമാന റാഞ്ചലില്‍ ഉള്‍പ്പെട്ട സഹൂര്‍ മിസ്ത്രിയെ കൊലപ്പെടുത്തിയെന്നാണ് റിപ്പോര്‍ട്ട്

വിമാന റാഞ്ചല്‍ നടന്ന് രണ്ട് പതിറ്റാണ്ട് പിന്നിടുമ്പോള്‍, സഫറുള്ള ജമാലി എന്ന പേരില്‍ ഭീകരന്‍ ഉണ്ടായിരുന്നോ എന്ന് സ്ഥിരീകരണമില്ല. റാഞ്ചലില്‍ ഉള്‍പ്പെട്ട അഞ്ച് ജയ്ഷെ മുഹമ്മദ് ഭീകരര്‍, സംഘടനയുടെ തലവനായ മസൂദ് അസ്ഹറിന്റെ സഹോദരന്‍, ഇബ്രാഹിം അസ്ഹര്‍, റൗഫ് അസ്ഗര്‍, സഹൂര്‍ മിസ്ത്രി, ഷാഹിദ് അക്തര്‍ സെയ്ദ്, 2001ലെ പാര്‍ലമെന്റ് ആക്രമണത്തില്‍ കൊല്ലപ്പെട്ട മറ്റൊരു തീവ്രവാദി എന്നിവരാണ്.

ഭീകര വിരുദ്ധ വിദഗ്ധരുടെ അഭിപ്രായ പ്രകാരം, ഇബ്രാഹിം അസറും, ഷാഹിദ് അക്തര്‍ സായിദും മാത്രമേ പാക്കിസ്ഥാനില്‍ ജീവിച്ചിരിപ്പുള്ളു. ഇതില്‍ ഷാഹിദ് കറാച്ചിയില്‍ നിന്ന് ഖൈബര്‍ പക്തൂണ്‍ഖ്വ മേഖലയിലേക്ക് മാറി സ്ഥിരതാമസമാക്കി. റൗഫ് അസ്ഗര്‍ സ്വാഭാവിക കാരണങ്ങളാല്‍ മരിച്ചു. മറ്റൊരു ഹര്‍ക്കത്തുള്‍ മുജാഹിദ്ദീന്‍ ഭീകരനെ 2001 ഡിസംബര്‍ 13 ന് ഇന്ത്യന്‍ സുരക്ഷാ സേന വെടിവച്ചുകൊല്ലുകയും ചെയ്തു. അഞ്ചാമത്തെ ഭീകരന്‍ സഹൂര്‍ മിസ്ത്രി ആയിരുന്നു. ഇയാളാണ് മാര്‍ച്ച് ആദ്യം കറാച്ചിയില്‍ കൊല്ലപ്പെട്ടത്. അതുകൊണ്ട് തന്നെ സഫറുള്ള ജമാലി എന്ന ആളെ കുറിച്ച് സ്ഥിരീകരിച്ച വിവരങ്ങള്‍ ഒന്നുമില്ല.

പാക്കിസ്ഥാനിലെ ജിയോ ടിവിയാണ് സഹുര്‍ മിസ്ത്രിയുടെ കൊലപാതകം സ്ഥിരീകരിച്ചത്. കറാച്ചിയിലെ ഒരു 'വ്യവസായി' കൊല്ലപ്പെട്ടുവെന്ന തരത്തിലാണു വാര്‍ത്ത പുറത്തുവന്നത്. മസൂദ് അസ്ഹറിന്റെ നേതൃത്വത്തിലുള്ള ഭീകര സംഘടനയായ ജെയ്ഷെ മുഹമ്മദിന്റെ ഉന്നത നേതാക്കള്‍ മിസ്ത്രിയുടെ സംസ്‌കാരച്ചടങ്ങില്‍ പങ്കെടുത്തതായി പാക്കിസ്ഥാന്‍ രഹസ്യാന്വേഷണ വൃത്തങ്ങളെ ഉദ്ധരിച്ച് റിപ്പോര്‍ട്ടുകള്‍ പറയുന്നു. സഹൂര്‍ മിസ്ത്രിയുടെ നേതൃത്വത്തില്‍ 1999ല്‍ ഐസി 814 വിമാനം റാഞ്ചിയതിനെത്തുടര്‍ന്നു നടന്ന സന്ധിസംഭാഷണത്തിലെ തീരുമാന പ്രകാരം ഇന്ത്യ വിട്ടയച്ച മൂന്ന് ഭീകരരില്‍ മസൂദ് അസ്ഹറും ഉള്‍പ്പെട്ടിരുന്നു.

പാക്കിസ്ഥാനില്‍ നിന്നും ബംഗ്ലാദേശില്‍ നിന്നുമായി പ്രവര്‍ത്തിച്ച ഇന്ത്യാ വിരുദ്ധ ഭീകര സംഘടനയായ ഹര്‍ക്കത്ത്-ഉല്‍-മുജാഹിദീന്റെ പ്രവര്‍ത്തകനായിരുന്നു മിസ്ത്രി. ഐസി 814 വിമാനം 1999 ഡിസംബര്‍ 24-ന് അഫ്ഗാനിസ്ഥാനിലെ കാണ്ഡഹാറിലേക്കു തട്ടിക്കൊണ്ടുപോയ അഞ്ചുപേരില്‍ മിസ്ത്രിയെക്കൂടാതെ അസ്ഹറിന്റെ സഹോദരന്മാരായ റൗഫ് അസ്ഹറും ഇബ്രാഹിം അസ്ഹറും ഉള്‍പ്പെട്ടിരുന്നു.