കിഴക്കന്‍ യുക്രെയ്‌നില്‍  കടുത്ത ആക്രമണം തുടര്‍ന്ന് റഷ്യ. സ്‌കൂളിനു നേരെ റഷ്യ നടത്തിയ ഷെല്ലിങ്ങില്‍ 21 പേര്‍ കൊല്ലപ്പെട്ടു. കാര്‍കിവ് നഗരത്തിനു പുറത്തെ മെറേഫയിലെ സ്‌കൂളിനും സാംസ്‌കാരിക കേന്ദ്രത്തിനും നേരെയാണു വ്യാഴാഴ്ച ആക്രമണമുണ്ടായത്. 25 പേര്‍ക്കു സംഭവത്തില്‍ പരുക്കേറ്റു. ഇതില്‍ പത്തു പേരുടെ നില ഗുരുതരമാണ്.

ബഹുനില കെട്ടിടത്തിന്റെ മധ്യഭാഗത്താണ് ആക്രമണമുണ്ടായതെന്നു അധികൃതര്‍ വ്യക്തമാക്കി. യുക്രെയ്‌നിലെ രണ്ടാമത്തെ വലിയ നഗരമായ കാര്‍കീവിന് 30 കിലോമീറ്റര്‍ വടക്കാണ് ആക്രമണമുണ്ടായ മെറേഫ.



ആഴ്ചകളായി റഷ്യന്‍ വ്യോമാക്രമണം തുടരുന്ന കാര്‍കീവ് നഗരം തകര്‍ന്ന നിലയിലാണുള്ളത്. മരിയുപോളിലെ തിയേറ്ററും റഷ്യയുടെ വ്യോമാക്രമണത്തില്‍ തകര്‍ന്നു. കെട്ടിടത്തിനകത്തു നൂറുകണക്കിന് ആളുകള്‍ കുടുങ്ങിയതായാണു റിപ്പോര്‍ട്ടുകള്‍. ആക്രമണത്തെ തുടര്‍ന്ന് ആളുകള്‍ മൂന്നു നിലകളിലായുള്ള തിയേറ്ററില്‍ അഭയം പ്രാപിച്ചിരിക്കുകയായിരുന്നു. ഈ കെട്ടിടം പൂര്‍ണമായും തകര്‍ന്നു.



അതേ സമയം റഷ്യയെ വഞ്ചിക്കുന്നവരെ തുടച്ചു നീക്കുമെന്ന് പ്രസിഡന്റ് വ്‌ലാഡിമിര്‍ പുട്ടിന്‍ മുന്നറിയിപ്പ് നല്‍കി. യുഎസിനും മറ്റു രാജ്യങ്ങള്‍ക്കും വിവരങ്ങള്‍ ചോര്‍ത്തുന്നവരെയും റഷ്യയില്‍ യുദ്ധത്തിനെതിരെ പ്രക്ഷോഭം നടത്തുന്നവരെയും ഉദ്ദേശിച്ചാണ് പുട്ടിന്റെ പുതിയ ഭീഷണി.


റഷ്യയ്ക്കകത്തും പുറത്തും യുദ്ധത്തിനെതിരെ നിരവധി പ്രക്ഷോഭങ്ങളാണ് അരങ്ങേറുന്നത്. റഷ്യയ്ക്കുള്ളില്‍ നടക്കുന്ന സമരം ക്രൂരമായി അടിച്ചമര്‍ത്തുകയാണെന്നാണു വിവരം. പ്രക്ഷോഭം സംഘടിപ്പിക്കുന്നവര്‍ക്കെതിരെ ഗുരുതര കുറ്റങ്ങളാണ് ചുമത്തുന്നത്.

വിലക്കു ലംഘിച്ചു പ്രക്ഷോഭം നടത്തിയ നൂറുകണക്കിനാളുകളെ റഷ്യയില്‍ അറസ്റ്റ് ചെയ്തു. പാശ്ചാത്യ രാജ്യങ്ങള്‍ കടുത്ത ഉപരോധം ഏര്‍പ്പെടുത്തിയതോടെ റഷ്യ വന്‍ സാമ്പത്തിക പ്രതിസന്ധിയിലായിരിക്കുകയാണ്. ഇതിനിടെ യുദ്ധം അവസാനിപ്പിക്കാനുള്ള സമാധാന ശ്രമങ്ങളും ഊര്‍ജിതമായിട്ടുണ്ട്.

അതേസമയം ഓപറേഷന്‍ ഗംഗ തുടരുകയാണെന്നും 20 ഓളം പേര്‍ക്കു സഹായം ലഭ്യമാക്കിയതായും വിദേശകാര്യ മന്ത്രാലയ വക്താവ് അരിന്ദം ബാഗ്ചി അറിയിച്ചു.