ഉക്രെയിനില്‍ പൊട്ടിക്കാന്‍ ചൈന റഷ്യക്ക് വെടിക്കോപ്പുകള്‍ നല്‍കിയാല്‍ പാഠം പഠിപ്പിക്കുമെന്ന് അമേരിക്കയുടെ താക്കീത്. ഉക്രെയിനില്‍ കിതച്ചുകൊണ്ടിരിക്കുന്ന റഷ്യയ്ക്ക് മിസൈലും ബോംബും റഡാറും നല്‍കാന്‍ ചൈന തയാറായാല്‍ അത് തീക്കളിയായി മാറുമെന്ന് അമേരിക്ക മുന്നറിയിപ്പുനല്‍കിയതോടെ യുദ്ധഭൂമിയില്‍ വീണ്ടും ആശങ്ക ഉയരുകയാണ്.

ചൈനീസ് പ്രസിഡന്റ് ഷി ജിന്‍പിങ്ങുമായി നടത്തിയ വീഡിയോ കോള്‍ സംഭാഷണത്തില്‍ പ്രസിഡന്റ് ജോ ബൈഡന്‍ ചൈനയ്ക്ക് മുന്നറിയിപ്പ് നല്‍കിക്കഴിഞ്ഞതായി വൈറ്റ്ഹൗസ് വൃത്തങ്ങള്‍ വാര്‍ത്ത പുറത്തുവിട്ടതോടെ വീണ്ടും ലോകം ആശങ്കയിലാണ്.

റഷ്യയുടെ ഉക്രൈയിന്‍ അധിനിവേശം സംബന്ധിച്ച് ഷിയും ബൈഡനും തമ്മിലുള്ള രണ്ടര മണിക്കൂര്‍ സംഭാഷണത്തില്‍ റഷ്യക്ക് ആയുധം നല്‍കാനുള്ള നീക്കമുണ്ടായാല്‍ അമേരിക്കന്‍ ചേരി ഒന്നാകെ ചൈനയ്‌ക്കെതിരെ തിരിയുമെന്നു മുന്നറിയിപ്പു നല്‍കി. റഷ്യന്‍ അധിനിവേശത്തെ ചെറുക്കാനും പിന്നീട് മോസ്‌കോയ്ക്കു മേല്‍ ഉപരോധം ഏര്‍പ്പെടുത്തി പ്രതിരോധിക്കാന്‍ അമേരിക്ക നടത്തിയ ശ്രമങ്ങളെക്കുറിച്ച് ബൈഡന്‍ ജിന്‍പിങ്ങിനോടു വിശദീകരിച്ചു.

ഉക്രെയിനിലെ നഗരങ്ങള്‍ക്കും ജനങ്ങള്‍ക്കു മേല്‍ റഷ്യ ക്രൂരമായ ആക്രമണം നടത്തുന്ന സാഹചര്യത്തില്‍ ചൈന പടക്കോപ്പുകളും മറ്റ് സഹായങ്ങളും നല്‍കിയാല്‍ അമേരിക്ക നേരിട്ട് ഇടപെടുമെന്ന് വ്യക്തമായിക്കഴിഞ്ഞു.അതേസമയം, റഷ്യക്ക് മുന്നറിയിപ്പുമായി യുക്രൈന്‍ പ്രസിഡന്റ് വൊളോദിമിര്‍ സെലെന്‍സ്‌കി രംഗത്തെത്തിയതോടെ യുദ്ധം ഉടനെ തീരില്ലെന്നു വ്യക്തമാണ്.

റഷ്യ ഒന്നുകില്‍ ചര്‍ച്ചയ്ക്ക് തയ്യാറാകണമെന്നും അല്ലെങ്കില്‍ ഏഴുതലമുറയ്ക്കു പോലും വീണ്ടെടുക്കാനാവാത്ത നഷ്ടങ്ങള്‍ നേരിടാന്‍ സജ്ജരാകണമെന്നും ഉക്രെയിന്‍ പറഞ്ഞതോടെയാണ് റഷ്യ ചൈനയുടെ ആയുധ സഹായം അഭ്യര്‍ഥിച്ചിരിക്കുന്നത്. റഷ്യ സ്വയംവരുത്തിവെച്ച യുദ്ധത്തിന്റെ ആഘാതം ചെറുതല്ലെന്നും അറ്റകൈ പ്രയോഗം നടത്താന്‍ ഉക്രെയിന്‍ മടിക്കില്ലെന്നും സെലന്‍സ്‌കി പറഞ്ഞു.

ഡ്രോണുകള്‍ ഉള്‍പ്പെടെയുള്ള സൈനിക ഉപകരണങ്ങള്‍ നല്‍കി സഹായിക്കണമെന്നാണ് റഷ്യ ചൈനയോട് ആവശ്യപ്പെട്ടിരിക്കുന്നത്.യുഎസും യൂറോപ്യന്‍ രാജ്യങ്ങളും ഏര്‍പ്പെടുത്തിയ കടുത്ത ഉപരോധം മൂലമുള്ള സാമ്പത്തിക പ്രതിസന്ധി മുറിച്ചുകടക്കാനാണ് റഷ്യ ചൈനയുടെ സഹായം തേടിയത്. ആയുധങ്ങള്‍ മാത്രമല്ല റഷ്യയുടെ സാമ്പത്തിക നഷ്ടം നികത്താന്‍ സാമ്പത്തിക സാഹായം നല്‍കിയാലും ശക്തമായ നടപടിയുണ്ടാകുമെന്നാണ് അമേരിക്ക ചൈനയോടു പ്രഖ്യാപിച്ചിരിക്കുന്നത്.

റഷ്യയുടെ സ്വര്‍ണ്ണശേഖരവും വിദേശനാണ്യശേഖരവും പാശ്ചാത്യരാഷ്ട്രങ്ങളുടെ ഉപരോധം മൂലം മരവിച്ച സ്ഥിതിയിലായതോടെ കടുത്ത പ്രതിസന്ധിയിലാണ് റഷ്യ.അതേസമയം സ്വര്‍ണ്ണത്തിന്റെ വിദേശനാണ്യശേഖരത്തിന്റെയും ഒരു ഭാഗം ചൈനയുടെ നാണയമായ യുവാനിലാണ് നിക്ഷേപിച്ചിരിക്കുന്നതെന്നും ചൈനയുമായി നേരിട്ട് ഇടപാട് നടത്താതിരിക്കാന്‍ പാശ്ചാത്യരാഷ്ട്രങ്ങള്‍ വലിയ സമ്മര്‍ദ്ദമാണ് ചെലുത്തുന്നതെന്നും റഷ്യയുടെ ധനമന്ത്രി സിലുവനോവ് പറയുന്നു.

സാമ്പത്തിക പ്രതിസന്ധിക്കു പുറമെ ഏറെ വൈകാതെ ഭക്ഷ്യക്ഷാമത്തിലേക്കും റഷ്യ കടക്കാനുള്ള സാധ്യത തള്ളിക്കളയാനാകില്ല.പാശ്ചാത്യരാഷ്ടങ്ങള്‍ കേട്ടുകേള്‍വിയില്ലാത്ത വിധം ശക്തമായ ഉപരോധമാണ് റഷ്യയ്ക്ക് മീതെ ഏര്‍പ്പെടുത്തിയിരിക്കുന്നത്. ഉക്രെയിനില്‍ യുദ്ധം തുടങ്ങുന്നതിനു മുന്‍പു തന്നെ ചൈനയുമായുള്ള സഹകരണം കൂടുതല്‍ ശക്തമാക്കാന്‍ റഷ്യ തീരുമാനിച്ചിരുന്നു.

എങ്ങനെയും പാശ്ചാത്യരാഷ്ട്രങ്ങളില്‍ നിന്നുള്ള ഉപരോധത്തെ അതിജീവിക്കാമെന്ന് റഷ്യ കരുതിയിരുന്നു. അത്രത്തോളം സമ്പന്നമായ കരുതല്‍ ശേഖരം റഷ്യയ്ക്കുണ്ടായിരുന്നു. എന്നാല്‍ റഷ്യയുടെ 64000 കോടി ഡോളര്‍ പാശ്ചാര്യ രാഷ്ട്രങ്ങളുടെ ഉപരോധം മൂലം മരവിച്ചതോടെ സാമ്പത്തിക പ്രതിസന്ധി രൂക്ഷമായിരിക്കുകയാണ്.

അതേസമയം റഷ്യയെ സഹായിക്കാന്‍ ചൈന തയ്യാറാകുമോ എന്നത് സംബന്ധിച്ച സൂചനകളൊന്നുമില്ലെന്നാണ് വാഷിംഗ്ടണിലെ ചൈനീസ് എംബസി വ്യക്തമാക്കുന്നത്. ഉക്രെയിന് കൂടുതല്‍ ആയുധങ്ങള്‍ നല്‍കുന്നതിനായി അമേരിക്ക1535 കോടി രൂപകൂടി ചെലവിടുന്നുവെന്നാണ് പുറത്തുവരുന്ന വാര്‍ത്തകള്‍. ഈ തുകയ്ക്ക് പ്രസിഡന്റ് ജോ ബൈഡന്‍ അംഗീകാരം നല്‍കിയതോടെ റഷ്യക്കു മുന്നില്‍ ഉക്രെയിന്‍ കീഴടങ്ങളില്ലെന്ന് വ്യക്തമായിരിക്കുകയാണ്.

2021 ജനുവരിമുതല്‍ യുക്രൈനുവേണ്ടി അമേരിക്ക 9211 കോടി രൂപയാണ് ചെലവിട്ടിരിക്കുന്നത്. യൂറോപ്പിലെ ഏറ്റവുംവലിയ ആണവനിലയമായ യുക്രൈനിലെ സാഫോറീസിയ റഷ്യ പൂര്‍ണമായും നിയന്ത്രണത്തിലാക്കാന്‍ തയ്യാറെടുക്കുന്നുവെന്ന് റിപ്പോര്‍ട്ട്.

യുക്രൈന്‍ നല്‍കിയ വിവരമനുസരിച്ച് നിലയം പൂര്‍ണമായും ഏറ്റെടുത്ത് റഷ്യയുടെ റോസാറ്റം മാനേജ്മെന്റിനു കീഴിലാക്കാനാണ് ശ്രമം. ഈ സാഹചര്യത്തിലാണ് തങ്ങള്‍ റഷ്യക്കെതിരെ അറ്റകൈ പ്രയോഗം നടത്തുമെന്നുള്ള ഉക്രെയിന്റെ മുന്നറിയിപ്പു പുറത്തുവന്നിരിക്കുന്നത്.