പുടിന്‍ മേയ് 9 ന് റഷ്യ ചില 'നിര്‍ണായക' പ്രഖ്യാപനങ്ങള്‍ നടത്തിയേക്കുമെന്ന് പാശ്ചാത്യ നിരീക്ഷകര്‍ കണക്കുകൂട്ടുന്നു; ഒരുപക്ഷേ ഒരു യുദ്ധപ്രഖ്യാപനം തന്നെ. മേയ് 9 റഷ്യയ്ക്ക് പ്രധാനപ്പെട്ട തീയതികളിലൊന്നാണ്. 1945 മേയ് 9 നാണ് രണ്ടാംലോക മഹായുദ്ധത്തില്‍ നാത്‌സി ജര്‍മനിക്കെതിരെ സോവിയറ്റ് യൂണിയന്‍ വിജയം നേടിയത്. അതിന്റെ ഓര്‍മദിനമായ മേയ് 9 ന് നടത്തുന്ന പ്രഖ്യാപനം റഷ്യന്‍ ജനതയെ വൈകാരികമായി സ്പര്‍ശിക്കുമെന്നു പുട്ടിന് അറിയാം.

സൈനികര്‍ക്ക് നിര്‍ബന്ധിത സൈനിക സേവനം നീട്ടിനല്‍കുക, റിസര്‍വ് സൈന്യത്തെ രംഗത്ത് ഇറക്കുക, സൈനിക പരിശീലനം നല്‍കി യുവാക്കളെ യുദ്ധനിരയിലേക്ക് എത്തിക്കുക, യുദ്ധം ചെയ്യുന്ന പ്രായത്തിലുള്ള പുരുഷന്മാര്‍ രാജ്യം വിടുന്നതിനു നിയന്ത്രണങ്ങള്‍ ഏര്‍പ്പെടുത്തുക തുടങ്ങിയ കാര്യങ്ങള്‍ മൊബിലൈസേഷന്‍ നിയമം വഴി നടപ്പിലാക്കാന്‍ സാധിക്കും. എന്നാല്‍ ഇത്തരം നീക്കങ്ങള്‍ യുക്രെയ്!നിലെ റഷ്യന്‍ സൈന്യത്തിന്റെ നില പരുങ്ങലിലാണെന്ന സന്ദേശമാകും ലോകത്തിനു നല്‍കുകയെന്നു പ്രതിരോധ വിദഗ്ധര്‍ വിലയിരുത്തുന്നു. യുദ്ധപ്രഖ്യാപനമില്ലെങ്കില്‍ത്തന്നെയും, യുക്രെയ്!നില്‍ വിജയം റഷ്യയ്ക്കാണെന്നു സ്ഥാപിക്കാന്‍ പുട്ടിന്‍ വേറെയും വഴികള്‍ തേടുമെന്നാണ് വിലയിരുത്തല്‍.

വിഘടിത പ്രദേശങ്ങളായ കിഴക്കന്‍ യുക്രെയ്!നിലെ ലുഹാന്‍സ്‌ക്, ഡോണെറ്റ്‌സ്‌ക് എന്നിവ റഷ്യയോട് കൂട്ടിച്ചേര്‍ക്കുക, തെക്ക് ഒഡേസയ്ക്കായി ഒരു പ്രധാന മുന്നേറ്റം നടത്തുക, തെക്കന്‍ തുറമുഖ നഗരമായ മരിയുപോളില്‍ പൂര്‍ണ നിയന്ത്രണം പ്രഖ്യാപിക്കുക തുടങ്ങിയവയും പുട്ടിന്‍ പരിഗണിച്ചേക്കാമെന്ന് ഇഗ്‌നാറ്റോവ് പറയുന്നു. തെക്കുകിഴക്കന്‍ നഗരമായ ഖെഴ്‌സണില്‍ 'പീപ്പിള്‍സ് റിപ്പബ്ലിക്' പ്രഖ്യാപിക്കാന്‍ റഷ്യ പദ്ധതിയിടുന്നതായും സൂചനകള്‍ ഉണ്ടായിരുന്നു. മേയ് 9 ന് റഷ്യന്‍ വൈകാരികതയെ ഉത്തേജിപ്പിക്കാന്‍ പുട്ടിന്‍ എന്തും ചെയ്‌തേക്കുമെന്ന് യുഎസ് സ്റ്റേറ്റ് ഡിപാര്‍ട്ട്‌മെന്റ് വക്താവ് നെഡ് പ്രൈസ് മാധ്യമങ്ങളോട് പറഞ്ഞു. യുക്രെയ്!നിലെ റഷ്യന്‍ പരാജയം മറച്ചുവയ്ക്കാന്‍ ഏത് പ്രചാര വേലയ്ക്കും റഷ്യ മടിക്കില്ലെന്നും പ്രൈസ് വ്യക്തമാക്കി. ഫെബ്രുവരി 24 മുതല്‍ മേയ് 3 വരെ 24,200 റഷ്യന്‍ സൈനികര്‍ യുദ്ധത്തില്‍ കൊല്ലപ്പെട്ടതായി യുക്രെയ്ന്‍ അവകാശപ്പെട്ടിരുന്നു. യുക്രെയ്!നില്‍ റഷ്യന്‍ സൈന്യം വന്‍തോതില്‍ നാശം നേരിടുന്നതായി റഷ്യന്‍ പ്രതിരോധ മന്ത്രാലയവും സമ്മതിച്ചിരുന്നു.

അതേസമയം, യുക്രെയ്‌നെതിരെ പൂര്‍ണ തോതിലുള്ള യുദ്ധപ്രഖ്യാപനം പുട്ടിനെ സംബന്ധിച്ച് അത്ര എളുപ്പമാകില്ലെന്നു ഇന്റര്‍നാഷനല്‍ ക്രൈസിസ് ഗ്രൂപ്പിലെ (ഐസിജി) സീനിയര്‍ അനലിസ്റ്റ് ഒലെഗ് ഇഗ്‌നാറ്റോവ് പറയുന്നു. യുക്രെയ്!ന്‍ അധിനിവേശത്തിനെതിരെ റഷ്യയിലെ ജനങ്ങള്‍ തെരുവില്‍ സമരം ചെയ്യുന്ന സാഹചര്യമുണ്ട്. പാശ്ചാത്യ രാജ്യങ്ങള്‍ റഷ്യയ്ക്കു മേല്‍ കടുത്ത ഉപരോധങ്ങള്‍ കടുപ്പിക്കുന്നതും രാജ്യം നേരിടുന്ന സാമ്പത്തിക തകര്‍ച്ചയും വെല്ലുവിളിയാണ്. റഷ്യയുടെ നിലനില്‍പിന് ഭീഷണിയാകുന്ന സാഹചര്യത്തില്‍ പൊതുവായതോ ഭാഗികമായോ സൈനിക സമാഹരണം ലക്ഷ്യമിട്ട് ഉപയോഗിക്കാവുന്ന മൊബിലൈസേഷന്‍ നിയമം നടപ്പിലാക്കുകയാകും പുട്ടിനു മുന്‍പിലുള്ള മറ്റൊരു വഴിയെന്ന് ഒലെഗ് ഇഗ്‌നാറ്റോവ് പറയുന്നു. ഇതു വഴി രാജ്യത്തിന്റെ സമ്പത്തിന്റെ നല്ലൊരു പങ്കും യുദ്ധത്തിനായി ചെലവഴിക്കാനാകും, സൈനിക ശേഷിയും വര്‍ധിപ്പിക്കാം.