ബുധനാഴ്ച റഷ്യയെ സംബന്ധിച്ച് അവര്‍ക്ക് ലഭിച്ച ഏറ്റവും വലിയ തിരിച്ചടിയുടെ ദിനമാണ്. മെയ് 9ന് വിജയ ദിവസം ആഘോഷിക്കാനിരിക്കുന്ന റഷ്യയെ വിറപ്പിക്കുന്നൊരു മിസൈലാക്രമണമാണ് യുക്രൈന്‍ നടത്തിയിരിക്കുന്നത്. സ്വയം പ്രതിരോധത്തില്‍ നിന്ന് മാറി ശത്രു പാളയത്തില്‍ കയറിയുള്ള തിരിച്ചടികള്‍ യുക്രൈന്‍ ഇപ്പോള്‍ പതിവാക്കിയിട്ടുണ്ട്. ഇത് യുദ്ധം കൂടുതല്‍ കടുക്കാന്‍ മാത്രമേ ഉപകരിക്കുകയുള്ളു. മകിവ്ക ഓയില്‍ ഡിപ്പോയിലാണ് യുക്രൈന്‍ സൈന്യം മിസൈല്‍ വന്‍ ആക്രമണം നടത്തിയത്, മരണക്കണക്കുകള്‍ കൃത്യമായി പുറത്തു വന്നിട്ടില്ല. റഷ്യ പറയുന്നത് ഒരാള്‍ മാത്രമാണ് കൊല്ലപ്പെട്ടത് എന്നാണ്. എന്നാല്‍ യുദ്ധവിദഗ്ദര്‍ പറയുന്നത് നിരവധി മരണങ്ങള്‍ സംഭവിക്കാനുള്ള സാധ്യത ഉണ്ട് എന്നാണ്. ഉക്രെയ്ന്‍ സായുധ സേനയുടെ ആക്രമണത്തെ തുടര്‍ന്നാണ് എണ്ണ ഡിപ്പോ കത്തിച്ചതെന്ന് ഡൊനെറ്റ്‌സ്‌ക് പീപ്പിള്‍സ് റിപ്പബ്ലിക്കിന്റെ റഷ്യന്‍ അനുകൂല വിഘടനവാദി തലവന്‍ ഡെനിസ് പുഷ്‌ലിന്‍ സ്ഥിരീകരിച്ചിട്ടുമുണ്ട്. ഫാക്ടറി ഏരിയയില്‍ നിന്ന് പുകയും ചാരവും പടരുന്നത് കണ്ടതായി ടാസ് വാര്‍ത്താ ഏജന്‍സിയും സ്ഥിരീകരിച്ചു. റഷ്യന്‍ അധീനതയിലുള്ള ഈ പ്രദേശത്തു നിന്നാണ് യുക്രൈനിലെ റഷ്യന്‍ സൈനീകര്‍ക്കുവേണ്ടിയുള്ള ഇന്ധനങ്ങള്‍ സപ്ലെ ചെയ്യപ്പെടുന്നത്.

ആക്രമണത്തിന് ശേഷം പ്രദേശത്ത് കറുത്ത പുക ഉയരുന്നതിന്റെ വീഡിയോകള്‍ ഉക്രേനിയന്‍ മാധ്യമങ്ങളും പുറത്തുവിട്ടു. ആക്രമണത്തില്‍ മകിവ്കയിലെ എണ്ണ ഡിപ്പോയില്‍, നാല് വലിയ ശേഷിയുള്ള ടാങ്കുകള്‍, അയ്യായിരം ടണ്‍ വീതം കത്തി നശിച്ചതായാണ് വിവരം,'

ഡിപ്പോയെ വിഴുങ്ങിയ തീ അണയ്ക്കാന്‍ ഒരു ഡസന്‍ ഫയര്‍ ബ്രിഗേഡ് എഞ്ചിനുകള്‍ സ്ഥലത്തുണ്ടെന്നാണ് ഡൊനെറ്റ്‌സ്‌ക് ന്യൂസ് ഏജന്‍സി റിപ്പോര്‍ട്ട് ചെയ്യുന്നത്. മറ്റ് ടാങ്കുകളിലേക്ക് പടരുമെന്ന ഭീഷണിയെ തുടര്‍ന്ന് തീപിടിത്തം അണയ്ക്കാന്‍ അഗ്‌നിശമന സേനാംഗങ്ങള്‍ പാടുപെടുകയാണെന്നാണ് പുറത്തു വരുന്ന റിപ്പോര്‍ട്ടുകള്‍.

നേരത്തെ യുക്രൈനിലെ അവ്ദിവ്ക കോക്ക് പ്ലാന്റില്‍ റഷ്യന്‍ ഷെല്ലാക്രമണത്തില്‍ 10 പേര്‍ കൊല്ലപ്പെടുകയും 15 പേര്‍ക്ക് പരിക്കേല്‍ക്കുകയും ചെയ്തിരുന്നു. ഫാക്ടറിയിലെ ഷിഫ്റ്റ് കഴിഞ്ഞ് ഷട്ടില്‍ ബസില്‍ കയറാന്‍ തൊഴിലാളികള്‍ കാത്തുനില്‍ക്കുമ്പോഴാണ് റഷ്യ ആക്രമണം നടത്തിയത്. 'റഷ്യക്കാര്‍ക്ക് അവര്‍ എവിടെയാണ് ലക്ഷ്യമിടുന്നതെന്ന് അറിയാമായിരുന്നു,' അദ്ദേഹം പറഞ്ഞു, ആക്രമണത്തെ 'സിനിക്കല്‍ ക്രൈം' എന്നാണ് അദേഹം വിളിച്ചത്. 'നിന്ദ്യമായ' പ്രവൃത്തികള്‍ക്ക് ക്രെംലിന്‍ ഉത്തരവാദിയാകണമെന്ന് അദ്ദേഹം വ്യക്തമാക്കി മണിക്കൂറുകള്‍ക്കുള്ളിലാണ് യുക്രൈന്റെ തിരിച്ചടി ഉണ്ടാകുന്നത്.