റഷ്യയെ ഉപരോധങ്ങള്‍ കൊണ്ട് വരിഞ്ഞു മുറുക്കി യുദ്ധം നിര്‍ത്തലാക്കാന്‍ ഇറങ്ങിത്തിരിച്ച അമേരിക്കയും യൂറോപ്പുമാണ് ഇപ്പോള്‍ ഏറ്റവും വലിയ പ്രതിസന്ധിയിലൂടെ കടന്നു പോകുന്നത്. ഇന്ത്യയുടെയും ചൈനയുടെയും സഹായത്തോടെ തകര്‍ച്ചയില്‍ നിന്നും സാധാരണ നിലയിലേയ്ക്ക് വന്ന റഷ്യ യൂറോപ്പിനെതിരായ പ്രതികാര നടപടികള്‍ ആരംഭിച്ചു കഴിുഞ്ഞു. യൂറോപ്പിനെ സംബന്ധിച്ച് പ്രകൃതി വാതകം അവരുടെ സാധാരണ ജീവിതത്തില്‍ വഹിക്കുന്ന പങ്ക് വളരെ വലുതാണ്. ഹാനോവര്‍ എന്ന നഗരത്തിലെ ജന ജീവിതം ആകെ താറുമാറായിക്കഴിഞ്ഞു. അറ്റകുറ്റപ്പണികളുടെ പേര് പറഞ്ഞാണ് വാതക വിതരണം റഷ്യ വെട്ടിക്കുറച്ചതെങ്കിലും. ഇതൊരു പകരം വീട്ടലാണെന്നത് പരസ്യമായൊരു രഹസ്യമാണ്.

ഇതോടെ പല യൂറോപ്പ്യന്‍ രാജ്യങ്ങളിലേയും സ്ഥിതിഗതികള്‍ വഷളാകാന്‍ തുടങ്ങിയിട്ടുണ്ട്. യൂറോപ്പിലെ പ്രധാന ഊര്‍ജ്ജസ്രോതസ്സായ റഷ്യ പ്രകൃതി വാതകത്തിന്റെ വിതരണം വെട്ടിക്കുറച്ചുകൊണ്ടാണ് ഇപ്പോള്‍ പ്രതികരിക്കുന്നത്. പൈപ്പ് ലൈനുകളുടെ കേടുപാടുകള്‍ തീര്‍ക്കുന്ന പണിനടക്കുന്നതിനാലാണ് ഇതെന്ന് റഷ്യ ഔദ്യോഗിക വിശദീകരണം നല്‍കുമ്പോഴും, ഇതിനു പിന്നിലുള്ളത് റഷ്യയുടെ പ്രതികാരം തന്നെയാണെന്നാണ് നിരീക്ഷകര്‍ വിലയിരുത്തുന്നത്.

ജര്‍മ്മന്‍ നഗരമായ ഹാനോവര്‍ പബ്ലിക് കെട്ടിടങ്ങളില്‍ ചൂടുവെള്ളവും സെന്‍ട്രല്‍ ഹീറ്റിംഗും നിരോധിച്ചുകൊണ്ട് ഉത്തരവിറക്കി. പ്രകൃതിവാതക ക്ഷാമം കനത്തത്തോടെ, ഇത്തരത്തില്‍ കര്‍ശന നടപടി കൈക്കൊള്ളുന്ന യൂറോപ്പിലെ ആദ്യ നഗരമായി മാറിയിരിക്കുകയാണ് ഹാനോവര്‍. മറ്റു പല നഗരങ്ങളും ഇത്തരത്തിലുള്ള നടപടികള്‍ ആലോചിച്ച് വരികയാണെന്ന് റിപ്പോര്‍ട്ടുകളും പുറത്തു വരുന്നു. ദൈനംദിന ജീവിതത്തെ പ്രതികൂലമായി ബാധിക്കുന്ന തരത്തില്‍ ഗ്യാസ് റേഷനിംഗും വൈദ്യൂതി ബില്‍ വര്‍ദ്ധനവും ഉണ്ടായേക്കാമെന്ന് ജര്‍മ്മനി മുന്നറിയിപ്പ് നല്‍കിയ പശ്ചാത്തലത്തിലാണ് ഇത്തരമൊരു നടപടി.

ജര്‍മ്മനിയുടെ വടക്ക് പടിഞ്ഞാറന്‍ സംസ്ഥാനമായ ലോവര്‍ സാക്‌സോണീയുടെ തലസ്ഥാനമായ ഹാനോവറിലെ പൊതുയിടങ്ങളിലാന് ചൂടുവെള്ള വിതരണം നിര്‍ത്തലാക്കിയിരിക്കുന്നത്. പൊതു കെട്ടിടങ്ങള്‍, സ്വിമ്മിങ് പൂളുകള്‍, സ്‌പോര്‍ട്‌സ് ഹാളുകള്‍, ജിംനേഷ്യങ്ങള്‍ എന്നിവയെല്ലാം ഇക്കൂട്ടത്തില്‍ പെടും. അതുപോലെ പ്രകൃതി വാതക ഉപഭോഗം നിയന്ത്രിക്കുന്നതിന്റെ ഭാഗമായി പൊതുയിടങ്ങളിലെ ഫൗണ്ടനുകളെല്ലാം പ്രവര്‍ത്തന രഹിതമാക്കിയിട്ടുണ്ട്. ടൗണ്‍ഹാളുകള്‍, മ്യുസിങ്ങള്‍ തുടങ്ങിയ ഇടങ്ങളിലെ രാത്രികാല ദീപാലങ്കാരങ്ങളും നിര്‍ത്തലാക്കി.

ഒഴിവാക്കാനാകാത്ത വാതക ക്ഷാമം മൂലം നഗരത്തിലെ ഊര്‍ജ്ജോപഭോഗം 15 ശതമാനത്തോളം കുറയ്‌ക്കേണ്ടതായി വന്നതായി മേയര്‍ ബെലിറ്റ് ഒനേ പറഞ്ഞു. എല്ലാ വര്‍ഷവും ഏപ്രില്‍ മുതല്‍ സെപ്റ്റംബര്‍ വരെ പൊതു കെട്ടിടങ്ങളിലേക്കുള്ള ഹീറ്റിങ് നിര്‍ത്തി വയ്ക്കാനും, മറ്റു മാസങ്ങളില്‍ ഇവിടങ്ങളിലെ താപനില 20 ഡിഗ്രിയില്‍ ഉയരാതെ നോക്കാനും ഉള്ള പദ്ധതികളും ഇപ്പോള്‍ ആലോചനയിലുണ്ടെന്ന് ചില റിപ്പോര്‍ട്ടുകള്‍ പറയുന്നു. അതുപോലെ എയര്‍ കണ്ടീഷണറുകള്‍, ഹീറ്ററുകള്‍, റേഡിയേറ്ററുകള്‍ എന്നിവ നിരോധിക്കാനുള്ള ഒരു നീക്കവും നടക്കുന്നുണ്ട്.

പുടിന്‍ ശരിക്കും ഇപ്പോള്‍ സന്തോഷിക്കുന്നുണ്ടാകും എന്നാണ് പാശ്ചാത്യ നിരീക്ഷകര്‍ പറയുന്നത്. യൂറോപ്പിലേക്ക് വാതകം വിതരണം ചെയ്യുന്ന റഷ്യന്‍ വാതക വിതരണ കമ്പനിയായ ഗസ്സ്‌പ്രോം നോര്‍ഡ് സ്ട്രീം 1 പൈപ്പ്‌ലൈനിലൂടെയുള്ള വിതരണം ഇടയ്ക്കിടയ്ക്ക് തടസ്സപ്പെടുത്തി പശ്ചിമ യൂറോപ്പിന് ഉറക്കമില്ലാത്ത രാത്രികള്‍ സമ്മാനിക്കുകയാണ്. ജൂണില്‍, അറ്റകുറ്റപ്പണികളുടെ പേര് പറഞ്ഞ് 40 ശതമാനം വിതരനം വര്‍ വെട്ടിക്കുറച്ചിരുന്നു. കഴിഞ്ഞയാഴ്ച്ച മുതല്‍, ശരിയായ അളവിന്റെ 20 ശതമാനം മാത്രമാക്കി വെട്ടിക്കുറച്ചിരിക്കുകയാണ് പൈപ്പിലൂടെയുള്ള വാതകത്തിന്റെ അളവ്.

രാഷ്ട്രീയ പ്രേരിതമാണ് ഈ വെട്ടിച്ചുരുക്കല്‍ എന്ന ആരോപണം യൂറോപ്യന്‍ യൂണിയന്‍ എനര്‍ജി ചീഫ് കാഡ്രി സിംസണ്‍ നിഷേധിക്കുകയാണ്. എന്നാല്‍, ഇത് ഊര്‍ജ്ജ ബില്ലുകള്‍ പരിധിവിട്ട് ഉയരുന്നതിന് കാരണമായിരിക്കുകയാണ്. മാത്രമല്ല, പല വന്‍കിട വ്യവസായ ശാലകള്‍ക്കും തങ്ങളുടെ പ്രവര്‍ത്തനവുമായി മുന്‍പോട്ട് പോകാനാവുമോ എന്ന ആശങ്കയും ഉയര്‍ന്നിരിക്കുന്നു. ശത്രുത പുലര്‍ത്തുന്ന രാജ്യങ്ങള്‍ക്ക് റഷ്യ നല്‍കുന്ന ശിക്ഷയാണിതെന്ന് ചിലര്‍ ആരോപിക്കുമ്പോള്‍ റഷ്യ അക്കാര്യം ശക്തമായി നിഷേധിക്കുകയാണ്.