ഒരു ഇന്ത്യന് വംശജന്‍ ബ്രിട്ടന്‍ പ്രധാനമന്ത്രിയാകുന്നതും കാത്തിരിക്കുകയായിരുന്നു പലരും, എന്നാല്‍ പ്രധാനമന്ത്രി പദത്തിലേക്കുള്ള മത്സരത്തില്‍ ഓരോ ദിവസം കഴിയുന്തോറും വിദേശകാര്യ സെക്രട്ടറി ലിസ് ട്രസ്സിന്റെ സാധ്യത കൂടിവരികയും. ഋഷിയുടെ സാധ്യത മങ്ങുകയും ചെയ്യുന്ന കാഴ്ചയാണ് കാണാനാകുന്നത്. മാത്രമല്ല ഇന്നലെ പര്‍ട്ടി അംഗങ്ങളുടെ ചോദ്യങ്ങള്‍ക്ക് ഉത്തരം പറയുന്ന പരിപാടി കഴിഞ്ഞതോടെ ലിസിന്റെ സാധ്യത ഇരട്ടിച്ചു എന്നാണ് ചില രാഷ്ട്രീയ നേതാക്കള്‍ പറയുന്നത്. തന്റെ ജന്മനഗരമായ ലീഡ്‌സിലെ ചടങ്ങില്‍ തികഞ്ഞ ആത്മവിശ്വാസത്തോടെയായിരുന്നു ലിസ് പങ്കെടുത്തത്. ബോറിസ് ജോണ്‍സന് കീഴില്‍ ജോലി ചെയ്തു എന്നതില്‍ അഭിമാനിക്കുന്നു എന്നും അവര്‍ തുറന്നു പറഞ്ഞു. 

അതേസമയം, ബോറിസ് ജോണ്‍സന്റെ പുറത്തുപോകലുമായി അത്ര സുഖകരമല്ലാത്ത ചോദ്യങ്ങളായിരുന്നു ഋഷി സുനാകിന് നേരിടേണ്ടി വന്നത്. ചിലര്‍ പറയുന്നത്, ഋഷി ബോറിസ് ജോണ്‍സനെ പുറകില്‍ നിന്നും കുത്തുകയായിരുന്നു എന്നാണെന്ന് ഒരു പാര്‍ട്ടിം അംഗം അദ്ദേഹത്തോട് നേരിട്ട് പറയുകയും ചെയ്തു. ബോറിസ് ജോണ്‍സന്റെ പേരും ബലറ്റില്‍ ഉള്‍പ്പെടുത്തണമെന്ന് അവതാരക നിക്ക് ഫെറാരി പറഞ്ഞപ്പോള്‍ വലിയൊരു കരഘോഷമായിരുന്നു മുഴങ്ങിയിരുന്നത്.ബോറിസ് ജോണ്‍സന്റെ പേരുകൂടി ബാലറ്റില്‍ വേണമെന്ന് ആവശ്യപ്പെട്ട പാര്‍ട്ടി അംഗങ്ങളുടെ എണ്ണം ഇതുവരെ 14,000 ആയി എന്ന് അവതാരകന്‍ പറഞ്ഞപ്പോഴായിരുന്നു കരഘോഷം മുഴങ്ങിയത്.

ഇതിനെ കുറിച്ചുള്ള അഭിപ്രായം ചോദിച്ചപ്പോള്‍, ബോറിസ് ബാലറ്റില്‍ ഉണ്ടായാലും ഇല്ലെങ്കിലും, നിങ്ങളുടെ എം പി മരുടെ വിശ്വാസം കണക്കിലെടുക്കേണ്ടതുണ്ട് എന്നായിരുന്നു ഋഷിയുടെ മറുപടി. സര്‍ക്കാരില്‍ നിന്നും 60ഓളം എം പി മാരായിരുന്നു രാജി വെച്ചതെന്നും അദ്ദേഹം ചൂണ്ടിക്കാട്ടി. താന്‍ പ്രധാനമന്ത്രിയായാല്‍ അതില്‍ ബോറിസ് ജോണ്‍സന് ഇടമുണ്ടാകില്ല എന്ന് പറഞ്ഞ ഋഷി, ഗ്രമര്‍ സ്‌കൂളുകള്‍ തിരികെ കൊണ്ടു വരുമെന്നും പ്രഖ്യാപിച്ചു.

അതേസമയം, ബോറിസ് ജോണ്‍സനൊപ്പം ഉടച്ചു നില്‍ക്കുന്ന നിലപാടായിരുന്നു ലിസ് ട്രസ്സിന്റെത്. ബോറിസിനു കീഴില്‍ പ്രവര്‍ത്തിക്കാന്‍ കഴിഞ്ഞതില്‍ അഭിമാനമുണ്ട് എന്നു പറഞ്ഞ ലിസ് ട്രസ്സ് താന്‍ എന്നും അദ്ദേഹത്തിന്റെ ഒരു ആരാധികയാണെന്നും പറഞ്ഞു. രാജ്യത്തിന്റെ വിവിധ ഭാഗങ്ങളിലായി, മത്സരാര്‍ത്ഥികളുമായി, പാര്‍ട്ടി അംഗങ്ങള്‍ക്ക് നേരിട്ട് സംവേദിക്കാന്‍ 12 വേദികളാണ് ഒരുക്കിയിട്ടുള്ളത്. അതില്‍ അദ്യത്തേതായിരുന്നു ഇന്നലെ കഴിഞ്ഞത്.