ലോകത്തെ കായിക പ്രേമികളെ നടുക്കുന്ന വാര്‍ത്തയാണ് ഇപ്പോള്‍ പുറത്തുവരുന്നത്. 20-20 മത്സരത്തിനിടെ ബോംബ് സ്‌ഫോടനം 19 പേരാണ് ഈ സ്‌ഫോടത്തില്‍ മരിച്ചത്. അഫ്ഗാനിസ്താനിലെ കാബൂളിലുള്ള അന്താരാഷ്ട്ര ക്രിക്കറ്റ് സ്റ്റേഡിയത്തിലാണ് സംഭവം നടന്നിരിക്കുന്നത്. വെള്ളിയാഴ്ച നടന്ന ബോംബ് സ്‌ഫോടനത്തില്‍ മരിച്ചത് 19 പേരെന്ന് ഔദ്യോഗിക റിപ്പോര്‍ട്ട്. യുഎന്‍ സെക്രട്ടറി ജനറല്‍ അന്റോണിയോ ഗുട്ടാറസ് ആണ് ഇക്കാര്യം ട്വിറ്ററിലൂടെ അറിയിച്ചത്. ഭീകരാക്രമണത്തില്‍ അപലപിക്കുന്നതായും അദ്ദേഹം ട്വീറ്റ് ചെയ്തപ്പോഴാണ് ഈ വാര്‍ത്ത പുറം ലോകം അറിഞ്ഞത്.

ടി20 മത്സരം നടക്കുന്നതിനിടെ സ്‌റ്റേഡിയത്തില്‍ നടന്ന സ്‌ഫോടനത്തില്‍ 19 പേര്‍ക്ക് ജീവഹാനി സംഭവിച്ചുവെന്നും നിരവധി പേര്‍ക്ക് പരിക്കേറ്റുവെന്നുമായിരുന്നു യുഎന്‍ സെക്രട്ടറി ജനറലിന്റെ ട്വീറ്റ്. എന്നാല്‍ താലിബാന്‍ ഇക്കാര്യം സ്ഥിരീകരിച്ചിട്ടില്ല. ചാവേര്‍ സ്‌ഫോടനമാണ് നടന്നതെന്നുമുള്ള തരത്തില്‍ സൂചനകള്‍ പുറത്തുവരുന്നുണ്ട്. ആക്രമണത്തിന്റെ ഉത്തരവാദിത്വം ഭീകരസംഘടനകള്‍ ആരും തന്നെ ഏറ്റെടുത്തിട്ടില്ല. അതേസമയം സ്‌ഫോടനത്തെ തുടര്‍ന്ന് സ്‌റ്റേഡിയത്തില്‍ നടന്നുകൊണ്ടിരുന്ന ഷ്പാഗീസാ ലീഗ് മത്സരം മണിക്കൂറുകള്‍ക്ക് ശേഷം അതേ സ്റ്റേഡിയത്തില്‍ തന്നെ പുനരാരംഭിച്ചു. താലിബാന്‍ വക്താവാണ് ഇക്കാര്യം അറിയിച്ചത്. പൊട്ടിത്തെറിക്ക് പിന്നാലെ കായികതാരങ്ങള്‍ എല്ലാവരെയും അധികൃതര്‍ സുരക്ഷിത സ്ഥാനത്തേക്ക് മാറ്റിയിരുന്നു. തുടര്‍ന്ന് കുറച്ചുനേരം മത്സരം നിര്‍ത്തിവെച്ചുവെന്നും പിന്നീട് സ്റ്റേഡിയം വൃത്തിയാക്കിയ ശേഷം മത്സരം പുനരാരംഭിച്ചുവെന്നുമാണ് വക്താവ് ഖാലിദ് സദ്രാന്‍ അറിയിച്ചത്.

വെള്ളിയാഴ്ച വൈകിട്ട് 4.30നായിരുന്നു കാബൂള്‍ അന്താരാഷ്ട്ര സ്റ്റേഡിയത്തിനുള്ളില്‍ മത്സരം നടക്കുന്നതിനിടെ സ്‌ഫോടനം നടന്നത്. തുടര്‍ന്ന് കാണികള്‍ പരിഭ്രാന്തരായി ഓടുന്ന ദൃശ്യങ്ങള്‍ പലതും പുറത്തുവന്നിരുന്നു. യുഎന്‍ സെക്രട്ടറി ജനറലിന്റെ ട്വീറ്റില്‍ നിന്നാണ് ആക്രമണത്തില്‍ കാണികള്‍ കൊല്ലപ്പെട്ടിട്ടുണ്ടെന്ന വിവരം ലഭിച്ചത്. യഥാര്‍ത്ഥ കണക്ക് ഇനിയും പുറത്തുവരേണ്ടതുണ്ട്.