യൂറോപ്പില്‍ കടുത്ത വ്യാപനം സൃഷ്ടിച്ച വകഭേദമല്ല രാജ്യത്ത് റിപ്പോര്‍ട്ട് ചെയ്തതെന്ന് വ്യക്തമാക്കി ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസേര്‍ച്ച് ഇന്‍സ്റ്റിറ്റ്യൂട്ട് . ഇന്ത്യയില്‍ രാജ്യത്ത് റിപ്പോര്‍ട്ട് ചെയ്യപ്പെട്ട ആദ്യത്തെ രണ്ട് കേസുകളില്‍ കണ്ടെത്തിയ കുരങ്ങുപനി വൈറസ് യൂറോപ്പിലെ വ്യാപനത്തിന് കാരണമായതില്‍ നിന്ന് വ്യത്യസ്തമാണെന്നും പഠന റിപ്പോര്‍ട്ട്. രോഗ ബാധിതരായ രണ്ട് പേരില്‍ ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസേര്‍ച്ച് ഇന്‍സ്റ്റ്യൂട്ടില്‍ നടത്തിയ വിശകലനത്തിലാണ് ഇക്കാര്യം വ്യക്തമായിട്ടുള്ളത്.


യുഎഇയില്‍ നിന്ന് മടങ്ങിയെത്തിയ രണ്ട് രോഗികളുടെ ജീനോം സീക്വന്‍സിംഗില്‍ മങ്കിപോക്സ് വൈറസിന്റെ എ.2 വകഭേദം ബാധിച്ചതായി തെളിഞ്ഞിരുന്നെന്ന് ഐസിഎംആര്‍-എന്‍ഐവിയിലെ മുതിര്‍ന്ന ശാസ്ത്രജ്ഞയായ ഡോ. പ്രജ്ഞാ യാദവിന്റെ നേതൃത്വത്തിലുള്ള ഗവേഷണത്തില്‍ പറയുന്നു.

യൂറോപ്പില്‍ കാണപ്പെടുന്ന വകഭേദം എ.1 ആണ്.ഇത് എത്രത്തോളം പ്രാധാന്യമുള്ളതോ അപകടകരമോ ആണെന്ന് ഇതുവരെ പഠിച്ചിട്ടില്ലെന്ന് എന്‍ഐവിയിലെ ഗവേഷകര്‍ പറഞ്ഞു. എന്നാല്‍ ഇപ്പോള്‍ മങ്കിപോക്സിന്റെ ബി.1 വകഭേഗമാണ് വ്യാപിക്കുന്നത് എന്നാണ് യാദവിന്റെ കണ്ടെത്തല്‍. ഇരു രാജ്യങ്ങളില്‍ നിന്ന് എത്തിയവരില്‍ രോഗ ലക്ഷണങ്ങളും വ്യത്യസ്തമാണെന്നും കണ്ടെത്തി. ഈ രോഗികളില്‍ പനി, പേശിവേദന, ജനനേന്ദ്രിയ ഭാഗത്ത് മുറിവുകള്‍ എന്നിവ പ്രധാന ലക്ഷണങ്ങളായിരുന്നു.

സ്രവ പരിശോധന, രക്ത പരിശോധന തുടങ്ങിയവയുടെ സാമ്പിളുകള്‍ രണ്ട് കേസുകളില്‍ നിന്നും രോഗം സ്ഥിരീകരിച്ചതിന്റെ ഒന്‍പതാം ദിനം പരിശോധിച്ചതിനെ തുടര്‍ന്നാണ് കണ്ടെത്തലുകളില്‍ എത്തിച്ചേര്‍ന്നത്.