ചൈനയുടെ പ്രകോപനങ്ങള്‍ അതിരു വിടുന്ന സാഹചര്യത്തില്‍ ഇന്ത്യ ഏറെ കരുതലോടു കൂടിയാണ് നീങ്ങുന്നത്. കൂടുതല്‍ ആയുധങ്ങള്‍ ആവനാഴിയിലെത്തിച്ചും സംയുക്ത സൈനീകാഭ്യാസമൊക്കെ നടത്തിയും കരുത്ത് കൂട്ടുകയാണ് ഇന്ത്യ. എന്നാല്‍ ഏറ്റവും ഒടുവിലായി ശ്രീലങ്കയില്‍ ചാരക്കപ്പലയച്ച് ഇന്ത്യയുടെ വിവരങ്ങള്‍ ചോര്‍ത്താനുള്ള നീക്കം വരെ ഉണ്ടായി.

ചൈനയുടെ ഈ അഹങ്കാരത്തിന് മറുപടി നല്‍കാനും. ആകാശക്കരുത്ത് വര്‍ദ്ധിപ്പിക്കാനുമായി റഫേലിന് പിന്നാലെ കരുത്തായ റഷ്യന്‍ വിമാനം സ്വന്തമാക്കാന്‍ ഒരുങ്ങുകയാണ് ഇന്ത്യ. സൂപ്പര്‍സോണിക് കരുത്തുള്ള റഷ്യയുടെ വൈറ്റ് സ്വാന്‍ എന്ന വിളിപ്പേരുള്ള ബോംബറാണ് ഇന്ത്യ സ്വന്തമാക്കാന്‍ ഒരുങ്ങുന്നതായി വാര്‍ത്തകള്‍ പുറത്തുവരുന്നത്. തുപ്ലോവ്ടിയു160 എന്ന പരമ്പരയിലെ യുദ്ധവിമാനം അതീവ പ്രഹരശേഷിയുള്ളതും അതിവേഗതയുള്ളതുമാണ്. കോണ്‍കോര്‍ഡിന് സമാനമാണ് രൂപകല്‍പ്പന. അതിര്‍ത്തിയില്‍ ചൈനയുടെ വെല്ലുവിളി വര്‍ദ്ധിക്കുന്ന സാഹചര്യത്തില്‍ റഷ്യഇന്ത്യാ വ്യോമപ്രതിരോധ കരാര്‍ ഈ വര്‍ഷം ഒപ്പിടുമെന്നാണ് സൂചന.

വലുപ്പമാണ് റഷ്യയുടെ വൈറ്റ് സ്വാനിനെ വ്യത്യസ്തമാക്കുന്നത്. വിശാലമായ ചിറകുകളും പ്രത്യേകതയാണ്. ഒപ്പം മുന്‍ഭാഗത്തിന്റെ നീളവും കൂടുതലാണ്. ശീതയുദ്ധകാലം മുതലേ സൂപ്പര്‍സോണിക് ബോംബര്‍ വിമാനമെന്നത് റഷ്യയുടെ സ്വപ്‌നമാണ്. ആണവപ്രഹര ശേഷിയുള്ള വിമാനം നിലയില്‍ ഭാവിയുദ്ധ സാഹചര്യത്തില്‍ റഷ്യയ്ക്ക് മേല്‍കൈ നല്‍കുന്നതാണ് തുപ്ലോവ് ബോംബറുകള്‍.

നാല് ടര്‍ബോ ഫാന്‍ എന്‍ജിനുകളാണ് തുപ്ലോവിനെ വായുവേഗത്തില്‍ മുന്നേറാന്‍ സഹായിക്കുന്നത്. സമാറാ എന്ന കമ്പനിയാണ് റഷ്യയ്ക്കായി തുപ്ലോവ് രൂപകല്‍പ്പന ചെയ്തത്. ഇതിനെ വെല്ലുന്ന വിമാനം നിലവിലുള്ളത് അമേരിക്കയ്ക്കാണ്. ബി70 വാല്‍കൈറീ എന്ന സൂപ്പര്‍സോണിക് ആണവ ബോംബര്‍വിമാനം ആദ്യമുണ്ടാക്കിയെങ്കിലും റോക്‌വെല്‍ബി1 ലാന്‍സറാണ് പിന്നീട് യുഎസ് പ്രതിരോധ വിഭാഗം വികസിപ്പിച്ചത്. അതീവ പ്രഹരശേഷിയും അതിവേഗതയുള്ളതുമാണ് ലാന്‍സര്‍ ബോംബര്‍ വിമാനങ്ങള്‍.