ചൈനീസ് പൗരന്മാരെ കൊന്നുതള്ളി പാകിസ്ഥാന് ഒന്നും മിണ്ടാതെ ഷീ പൗരന്മാരുടെ ജീവന് പുല്ലുവില
ചൈനപാകിസ്ഥാന് സാമ്പത്തിക ഇടനാഴി (സിപിഇസി) ആരംഭിച്ചത് മുതല്, പാകിസ്ഥാനിലെ സിന്ധ്, ബലൂചിസ്ഥാന്, ഖൈബര് പഖ്തൂണ്ഖ്വ പ്രവിശ്യകളിലും പാക് അധിനിവേശ കശ്മീര് മേഖലയിലും ചൈനീസ് പൗരന്മാര്ക്ക് നേരെ ആവര്ത്തിച്ചുള്ള ആക്രമണങ്ങള് വര്ദ്ധിച്ചതായി റിപ്പോര്ട്ട്. കഴിഞ്ഞ ആറ് വര്ഷത്തിനിടയില്, പ്രത്യേകിച്ച് സിപിഇസി പദ്ധതികളുമായി ബന്ധപ്പെട്ട് പാകിസ്ഥാനിലേക്ക് കൂടുതല് ചൈനക്കാര് എത്തിയതിന് പിന്നാലെ പാകിസ്ഥാനിലെ വിവിധ തീവ്രവാദ ഗ്രൂപ്പുകള് രാജ്യത്തിനുള്ളിലെ തങ്ങളുടെ ആക്രമണ ലക്ഷ്യമായി ചൈനയുടെ നിര്മ്മാണ മേഖലയെ ലക്ഷ്യം വയ്ക്കുന്നതായി റിപ്പോര്ട്ടുകള് സൂചിപ്പിക്കുന്നു.
കഴിഞ്ഞ ബുധനാഴ്ച, കറാച്ചിയിലെ സദ്ദാര് ഏരിയയിലെ ഡെന്റല് ക്ലിനിക്കിനുള്ളില് അജ്ഞാതന് വെടിയുതിര്ത്തതിനെ തുടര്ന്ന് ഒരു ചൈനീസ് പൗരന് കൊല്ലപ്പെടുകയും രണ്ട് പേര്ക്ക് പരിക്കേല്ക്കുകയും ചെയ്തു. ഷെഹ്ബാസ് ഷെരീഫ് സര്ക്കാര് അധികാരത്തില് വന്നതിന് ശേഷം കറാച്ചിയില് ചൈനീസ് പൗരന്മാര്ക്ക് നേരെ നടക്കുന്ന രണ്ടാമത്തെ ആക്രമണമാണിതെന്ന് ഏഷ്യന് ലൈറ്റ് റിപ്പോര്ട്ട് ചെയ്തു. 2016 ല്, ചൈനപാകിസ്ഥാന് സാമ്പത്തിക ഇടനാഴി (സിപിഇസി) ആരംഭിച്ചതിന് ശേഷം, ഇത് ചൈനീസ് പൗരന്മാര്ക്കും പാകിസ്ഥാനിലെ താല്പ്പര്യങ്ങള്ക്കും നേരെയുള്ള പത്താമത്തെ ആക്രമണമാണെന്ന് റിപ്പോര്ട്ടുകള് പറയുന്നു.
കഴിഞ്ഞ ജനുവരി 17 ന് ചൈന തങ്ങളുടെ വിഭവങ്ങള് ചൂഷണം ചെയ്യുന്നെന്ന് ആരോപിച്ച് സിന്ധ് പ്രവിശ്യയിലെ രാഷ്ട്രീയ പ്രവര്ത്തകരും പൗരന്മാരും ചേര്ന്ന് വന് ചൈനാ വിരുദ്ധ റാലി സംഘടിപ്പിച്ചിരുന്നു. ചൈനീസ് വിരുദ്ധ മുദ്രാവാക്യങ്ങള്ക്കൊപ്പം സ്വാതന്ത്രാനുകൂല മുദ്രാവാക്യങ്ങളും അന്ന് റാലിയില് ഉയര്ന്ന് കേട്ടു. കഴിഞ്ഞ വര്ഷം ഓഗസ്റ്റില് ചൈനാ പാക് നിയന്ത്രണത്തിലുള്ള ബലൂചിസ്ഥാനിലെ തുറമുഖമായ ഗ്വാദറില് ചൈന അനധികൃത മത്സ്യബന്ധനം നടത്തുന്നതായി ആരോപിച്ച് ജനങ്ങള് പ്രതിഷേധിച്ചിരുന്നു. കഴിഞ്ഞ ജൂലൈയില് പാക്കിസ്ഥാനിലെ ഖൈബര് പഖ്തൂണ്ഖ്വ പ്രവിശ്യയിലെ അപ്പര് കോഹിസ്ഥാന് പ്രദേശത്തെ ചൈനീസ് നിര്മ്മാണമായ ദാസു ജലവൈദ്യുത പദ്ധതിയിലേക്ക് പോവുകയായിരുന്ന ചൈനീസ് തൊഴിലാളികള് സഞ്ചരിച്ചിരുന്ന ബസിന് നേര്ക്ക് ആക്രമണമുണ്ടായി. ഈ ആക്രമണത്തില് ഒമ്പത് ചൈനീസ് തൊഴിലാളികളാണ് കൊല്ലപ്പെട്ടത്.
2021 ഏപ്രിലില് പാക്കിസ്ഥാനിലെ ക്വറ്റയിലെ ആഡംബര ഹോട്ടലില് നടന്ന ചാവേര് ബോംബ് ആക്രമണത്തില് അഞ്ച് പേര് കൊല്ലപ്പെടുകയും 12 പേര്ക്ക് പരിക്കേല്ക്കുകയും ചെയ്തു. 2020 ജൂലൈയില്, നീലം ഝലം, കൊഹാല ജലവൈദ്യുത നിലയങ്ങളുടെ അനധികൃത നിര്മാണത്തെ അപലപിച്ച് ചൈനയ്ക്കെതിരെ പാക് അധീന കശ്മീരിലെ മുസാഫറാബാദില് വന് പ്രതിഷേധമാണ് ഉയര്ന്നത്. 2020 നവംബര് 18 ന്, ആയിരക്കണക്കിന് പാകിസ്ഥാന് തൊഴിലാളികള് ചൈനയ്ക്കെതിരെ കറാച്ചിയില് പ്രതിഷേധ പ്രകടനം നടത്തി. ചൈനീസ് തൊഴിലാളികള്ക്കും പാക് തൊഴിലാളികള്ക്കും രണ്ട് തരം വേതനം എന്നതായിരുന്നു സമരത്തിന് കാരണമെന്ന് ഏഷ്യന് ലൈറ്റ് റിപ്പോര്ട്ട് ചെയ്തു.
ബലൂച് ലിബറേഷന് ആര്മി 2018 നവംബറില് കറാച്ചിയിലെ ചൈനീസ് കോണ്സുലേറ്റ് ആക്രമിച്ചിരുന്നു. അതേ വര്ഷം ഓഗസ്റ്റില് ബലൂചിസ്ഥാനിലെ ദല്ബന്ദിന് നഗരത്തില് ചൈനീസ് എഞ്ചിനീയര്മാര് സഞ്ചരിച്ച ബസ് ചാവേര് ബോംബര്മാര് അക്രമിച്ചു. ഈ ആക്രമണത്തില് നിരവധി പേര്ക്ക് പരിക്കേറ്റു. എന്നാല്, പാകിസ്ഥാനില് ചൈനീസ് തൊഴിലാളികള് നിരന്തരം അക്രമണത്തിന് വിധേയരാകുമ്പോഴും സ്വന്തം പൗരന്മാര്ക്കെതിരെയുള്ള ആക്രമണത്തില് പാകിസ്ഥാന് സര്ക്കാരിനെയോ രാജ്യത്തെ മറ്റ് സര്ക്കാര് ഏജന്സികളെയോ വിമര്ശിക്കാന് ചൈന ഒരിക്കലും തയ്യാറായിട്ടില്ലെന്നത് വിദേശ നിരീക്ഷകര്ക്ക് ആശ്ചര്യമാണെന്നും ഏഷ്യന് ലൈറ്റ് റിപ്പോര്ട്ട് ചെയ്യുന്നു.
https://www.facebook.com/Malayalivartha
