ക്രൈമിയ ഇപ്പോള്‍ മേഘാവൃതമാണ്, പക്ഷേ എത്ര ഇരുണ്ടതാണെങ്കിലും നമ്മുടെ ഭാവി പ്രസന്നമായിരിക്കുമെന്ന് യുക്രൈന്‍കാര്‍ക്ക് അറിയാം', യുദ്ധം കൊടുമ്പിരി കൊള്ളുമ്പോള്‍ ഏറെ ആത്മവിശ്വാസത്തോടെ യുക്രൈന്‍ പ്രസിഡന്റ് വ്‌ലാഡിമര്‍ സെലന്‍സ്‌കി പറഞ്ഞ വാക്കുകളാണിത്.

അത്ഭുതം എന്നല്ലതാതെ മറ്റൊരു വാക്കുകൊണ്ട് യുക്രൈന്റെ മുന്നേറ്റങ്ങളെ വിശേഷിപ്പിക്കാനാകില്ല. റഷ്യയുടെ ഭാഗത്തു നിന്ന് നോക്കുകയാണെങ്കില്‍ ഇപ്പോള്‍ യുദ്ധം നടക്കുന്നത് യുക്രൈനിലല്ല റഷ്യയിലാണ്. കാരണം ഇതുവരെ റഷ്യ കൈവശപ്പെടുത്തി അവരുടേതാണെന്ന് ഔദ്യോഗികമായി പ്രഖ്യാപിച്ച മേഘലയിലാണ് യുദ്ധം നടക്കുന്നത്. റഷ്യയുടെ 2,500 ചതുരശ്ര കിലോമീറ്റര്‍ പ്രദേശം യുക്രൈന്‍ സൈന്യം ഇതിനോടകം തന്നെ തിരിച്ചുപിടിച്ചുകഴിഞ്ഞു.

ഈ ആഴ്ച മാത്രം കിഴക്കന്‍ യുക്രെയിനില്‍ 776 ചതുരശ്ര കിലോമീറ്റര്‍ പ്രദേശവും ലുഹാന്‍സ്‌കിലെ ആറെണ്ണം ഉള്‍പ്പെടെ 29 ജനവാസ കേന്ദ്രങ്ങളാണ് യുക്രൈന്‍ തിരിച്ചുപിടിച്ചത്. യുക്രെയിന്റെ നാല് പ്രവിശ്യകള്‍ തങ്ങള്‍ക്കൊപ്പം ചേര്‍ത്തെന്ന് റഷ്യന്‍ പ്രസിഡന്റ് വ്‌ലാഡിമിര്‍ പുട്ടിന്‍ പ്രഖ്യാപിച്ചതിന് പിന്നാലെയാണ് ഈ മേഖലകള്‍ കേന്ദ്രീകരിച്ച് യുക്രെയിന്‍ മുന്നേറ്റം തുടങ്ങിയത് എന്നുള്ളതാണ് ശ്രദ്ധേയമായ കാര്യം. സെപ്തംബര്‍ 6 മുതല്‍ 12 വരെ നടന്ന ആദ്യ ഘട്ടത്തില്‍ 8,000 ചതുരശ്ര കിലോമീറ്റര്‍ പ്രദേശം യുക്രെയിന്‍ തിരിച്ചുപിടിച്ചിരുന്നു.

അതിനേക്കാളൊക്കെ ഞെട്ടിക്കുന്ന മുന്നേറ്റം എന്നുള്ളത്. മുമ്പു നടന്ന യുദ്ധത്തില്‍ യുക്രൈനില്‍ നിന്നും റഷ്യ കൈവശപ്പെടുത്തിയ ക്രിമിയയും യുക്രൈന്‍ ഉടന്‍ പിടിച്ചടക്കും എന്നുള്ളതാണ്. ഇതിന്റെ ആദ്യ ഘട്ടം എന്ന രീതിയില്‍ ക്രൈമിയന്‍ മുനമ്പിനെ റഷ്യയുമായി ബന്ധിപ്പിക്കുന്ന സുപ്രധാന കെര്‍ച്ച് പാലം സ്‌ഫോടനത്തില്‍ തകര്‍ത്തിരിക്കുകയാണ് യുക്രൈന്‍. പുര്‍ണമായും ഒറ്റപ്പെട്ട ഈ പ്രദേശം യുക്രൈന് പിടിച്ചടക്കാന്‍ വലിയ പ്രയാസമൊന്നുമുണ്ടാകില്ല. എന്നാല്‍ സ്‌ഫോടനത്തിനുപിന്നില്‍ യുക്രൈയ്ന്‍ ആണെന്ന് റഷ്യ ആരോപിക്കുമ്പോഴും തന്ത്രപരമായി ആ ഉത്തരവാദിത്വം ഏറ്റെടുക്കാതെ പുതിനെയും റഷ്യയെയും പരിഹസിക്കുകയാണ് യുക്രൈയ്ന്‍.

സ്‌ഫോടനത്തിനുപിന്നില്‍ യുക്രൈനാണെന്ന് ക്രൈമിയയിലെ റഷ്യന്‍ നിയമിത പാര്‍ലമെന്റിന്റെ സ്പീക്കര്‍ ആരോപിച്ചുകഴിഞ്ഞു. സാധാരണക്കാരുടെ അടിസ്ഥാനസൗകര്യങ്ങള്‍ തകര്‍ച്ചനേരിടുമ്പോള്‍ യുക്രൈന്റെ പ്രതികരണം തീവ്രവാദസ്വഭാവമുള്ളതാണെന്ന് റഷ്യന്‍ വിദേശകാര്യ വക്താവ് മരിയ സാഖറോവ കുറ്റപ്പെടുത്തി. ഉത്തരവാദിത്വം ഔദ്യോഗികമായി ഏറ്റെടുത്തില്ലെങ്കിലും പാലം തകര്‍ക്കല്‍ തുടക്കമാണെന്നും നിയമവിരുദ്ധമായതെല്ലാം തകര്‍ക്കപ്പെടണമെന്നും യുക്രൈന്‍ പ്രസിഡന്റിന്റെ ഉപദേഷ്ടാവ് മിഖൈലോ പൊഡോളിയാക് ട്വീറ്റു ചെയ്തത് റഷ്യയെ ചൊടിപ്പിച്ചിട്ടുണ്ട്.