വടക്കന്‍ തുര്‍ക്കിയിലെ കര്‍ക്കരി ഖനിയിലുണ്ടായ സ്‌ഫോടനത്തില്‍ 25 പേര്‍ മരിച്ചു. 12-ലധികം പേര്‍ അപകടമുണ്ടായ ഖനിയില്‍ കുടുങ്ങിക്കിടക്കുകയാണ്. രക്ഷാപ്രവര്‍ത്തനം പുരോഗമിക്കുന്നു.

തുര്‍ക്കിയ ഞെട്ടിച്ച് വെള്ളിയാഴ്ച വൈകുന്നേരമുണ്ടായ സ്‌ഫോടനത്തില്‍ 11 പേരെ രക്ഷപ്പെടുത്താന്‍ കഴിഞ്ഞതായി തുര്‍ക്കി ആരോഗ്യമന്ത്രി ട്വീറ്റ് ചെയ്തു. മരണസംഖ്യ സ്ഥിരീകരിച്ചുകൊണ്ടുള്ള ട്വീറ്റില്‍ രക്ഷപ്പെടുത്തിയ 11 പേര്‍ ചികിത്സയിലാണെന്നും അദ്ദേഹം അറിയിച്ചു. 'ഞങ്ങള്‍ വളരെ ദുഃഖകരമായ അവസ്ഥയിലാണ്' ആഭ്യന്തരമന്ത്രി അറിയിച്ചു.

110 തൊഴിലാളികളാണ് അപകട സമയത്ത് ഖനിയില്‍ ജോലി ചെയ്തിരുന്നത്. രണ്ട് സ്ഥലത്തായി 985 - 1150 അടി താഴെ ഖനിത്തൊഴിലാളികള്‍ കുടുങ്ങിയെന്നാണ് ആദ്യ റിപ്പോര്‍ട്ടുകള്‍.

അപകടസ്ഥലത്ത് പ്രിയപ്പെട്ടവരേയും കുടുംബാംഗങ്ങളേയും തിരഞ്ഞെത്തിയവര്‍ കണ്ണീരുമായി കാത്തുനില്‍ക്കുന്നത് ടെലിവിഷന്‍ ദൃശ്യങ്ങളില്‍ സങ്കടക്കാഴ്ചയായി. തുര്‍ക്കി പ്രസിഡന്റ് ഉര്‍ദുഗാന്‍ ഔദ്യോഗിക പരിപാടികളെല്ലാം മാറ്റിവെച്ച് അപകടസ്ഥലം സന്ദര്‍ശിക്കും. ഖനിയില്‍ കുടുങ്ങിയവരെ ജീവനോടെ രക്ഷപ്പെടുത്തും. അതിനായുള്ള ശ്രമം തുടരുകയാണ്'-അദ്ദേഹം ട്വിറ്ററില്‍ കുറിച്ചു.