ക്ഷീണവും തളര്‍ച്ചയും തോന്നി ഡോക്ടറെ സമീപിച്ചതിന് പിന്നാലെ 23കാരിയുടെ പ്രസവം നടന്നതാണ് ഇപ്പോള്‍ സമൂഹമാദ്ധ്യമങ്ങളില്‍ ചര്‍ച്ചയാകുന്നത്. പെയ്ടണ്‍ സ്‌റ്റോവര്‍ എന്ന 23കാരിയായ യുവതി യുഎസിലെ ഒമാഹയിലുള്ള അദ്ധ്യാപികയാണ്. ക്ഷീണവും തളര്‍ച്ചയും തോന്നി ഡോക്ടറെ സമീപിച്ചതിന് പിന്നാലെയാണ് ഗര്‍ഭിണിയാണെന്ന വിവരമറിഞ്ഞതും തൊട്ടുപിന്നാലെ പ്രസവിക്കേണ്ടി വന്നതെന്നുമെന്ന് സ്‌റ്റോവര്‍ പറയുന്നു.

തനിക്ക് നാളുകളായി അനുഭവപ്പെട്ടിരുന്ന ക്ഷീണത്തിന് കാരണം ഗര്‍ഭാവസ്ഥയായിരുന്നുവെന്ന് യുവതി അറിഞ്ഞില്ല. തൊഴില്‍പരമായ പല സമ്മര്‍ദ്ദങ്ങളും നേരിട്ടിരുന്നതാണ് ക്ഷീണം തോന്നാന്‍ കാരണമെന്നായിരുന്നു യുവതി കരുതിയിരുന്നത്. ക്ഷീണത്തിന് മരുന്ന് വാങ്ങാന്‍ വന്നതോടെ ഗര്‍ഭിണിയാണെന്ന വിവരം ഡോക്ടര്‍ അറിയിക്കുകയായിരുന്നു. എന്നാല്‍ ഇത് വിശ്വസിക്കാന്‍ കഴിയാതിരുന്ന യുവതി മറ്റ് ടെസ്റ്റുകള്‍ നടത്തണമെന്ന് ഡോക്ടറോട് ആവശ്യപ്പെട്ടു. അല്‍ട്രാസൗണ്ട് സ്‌കാനിംഗ് നടത്തിയതോടെ യുവതി ഗര്‍ഭിണിയാണെന്ന് തന്നെ ഡോക്ടര്‍ ആവര്‍ത്തിച്ചു. ഒപ്പം യുവതിയെ ഞെട്ടിപ്പിക്കുന്ന മറ്റൊരു കാര്യവും ഡോക്ടര്‍ അവരെ അറിയിച്ചു.

യുവതിയുടെ വൃക്കകളുടെയും കരളിന്റെയും പ്രവര്‍ത്തനത്തില്‍ തകരാറുണ്ടെന്നായിരുന്നു കണ്ടെത്തല്‍. പ്ലീക്ലാംപ്‌സിയ എന്ന അസുഖമാണ് യുവതിക്കുണ്ടായത്. ഗര്‍ഭധാരണം മൂലം ശരീരത്തിലെ മറ്റ് അവയവങ്ങളുടെ പ്രവര്‍ത്തനത്തില്‍ തകരാര്‍ സംഭവിക്കുന്നതാണ് പ്ലീക്ലാംപ്‌സിയ എന്ന രോഗാവസ്ഥ. ഈ രോഗം പിടിപെട്ടാല്‍ വയറ്റിലുള്ള കുഞ്ഞിന് ഗര്‍ഭാശയത്തില്‍ അതിജീവിക്കാന്‍ കഴിയില്ല. മാത്രവുമല്ല, കുഞ്ഞ് വയറ്റില്‍ തന്നെ തുടരുന്നത് അമ്മയുടെ ജീവന്‍ അപകടത്തിലാക്കുകയും ചെയ്യും.

ഈ സാഹചര്യത്തില്‍ അടിയന്തിരമായി സിസേറിയന്‍ നടത്തി കുഞ്ഞിനെ പുറത്തെടുക്കാന്‍ ഡോക്ടര്‍മാര്‍ തീരുമാനിച്ചു. പ്രസവം നടക്കേണ്ടതിന് പത്ത് ആഴ്ചകള്‍ മുമ്ബ് തന്നെ കുഞ്ഞിനെ പുറത്തെടുക്കേണ്ടി വന്നു. ഇതോടെ നാല് പൗണ്ട് (1.81 കിലോ ഗ്രാം) തൂക്കം മാത്രമുള്ള ആണ്‍കുഞ്ഞിനെ യുവതിയുടെ വയറ്റില്‍ നിന്നും സിസേറിയനിലൂടെ പുറത്തെടുത്തു.

ഭാവിയില്‍ തനിക്ക് കുഞ്ഞ് വേണമെന്ന് ആഗ്രഹിച്ചിരുന്നുവെങ്കിലും ഇത്രപെട്ടെന്ന് യാതൊരു മുന്നറിയിപ്പുമില്ലാതെ അത് സംഭവിക്കുമെന്ന് കരുതിയില്ലെന്നാണ് യുവതിയും പങ്കാളിയും പ്രതികരിച്ചത്. നിലവില്‍ മെതോഡിസ്റ്റ് വിമണ്‍ ഹോസ്പിറ്റലില്‍ അമ്മയും കുഞ്ഞും സുരക്ഷിതരാണ്.