പാരിസ്, കാലിഫോര്‍ണിയ ആക്രമണങ്ങള്‍ക്ക് ശേഷം അമേരിക്കയില്‍ മുസ്ലീങ്ങള്‍ക്കെതിരായ അതിക്രമങ്ങളില്‍ 300 മടങ്ങ് വര്‍ധിച്ചതായി റിപ്പോര്‍ട്ട്. ഒരു മാസത്തിനുള്ളില്‍ പതിനഞ്ചോളം ആക്രമണങ്ങളാണ് മുസ്ലീങ്ങള്‍ക്കും പള്ളികള്‍ക്കും നേരെയുണ്ടായതെന്ന് റിപ്പോര്‍ട്ടുകള്‍ വെളിപ്പെടുത്തുന്നു.
ഹിജാബ് ധരിച്ച കുട്ടികള്‍ക്കും പള്ളികള്‍ക്കും നേരെയും അതിക്രമങ്ങളുണ്ടായി. ഇസ്ലാം മതവിശ്വാസികള്‍ നടത്തുന്ന സ്ഥാപനങ്ങള്‍ക്ക് നേരെയും ആക്രമണങ്ങളും വെടിവെപ്പുമുണ്ടായി. കഴിഞ്ഞ ഏതാനും വര്‍ഷങ്ങളായി മുസ്ലീങ്ങള്‍ക്കെതിരെ ശരാശരി 12 ആക്രമണങ്ങള്‍ നടന്നിരുന്നതായാണ് കണക്ക്. എന്നാല്‍ നവംബര്‍ 13ന് പാരിസില്‍ ഇസ്ലാമിക് സ്‌റ്റേറ്റ് ഭീകരര്‍ നടത്തിയ ആക്രമണത്തിന് ശേഷം ഇത് മൂന്നിരട്ടിയിലധികമായി ഉയര്‍ന്നു. ഡിസംബര്‍ രണ്ടിന് കാലിഫോര്‍ണിയയില്‍ നടന്ന വെടിവെപ്പിന് ശേഷം ഇതുവരെ മുസ്ലീങ്ങള്‍ക്കെതിരെ ഇരുപതോളം ആക്രമണങ്ങള്‍ നടന്നതായാണ് റിപ്പോര്‍ട്ട്.
2001 സെപ്റ്റംബര്‍ 11ലെ വേള്‍ഡ് ട്രേഡ് സെന്റര്‍ ആക്രമണത്തിന് ശേഷം മുസ്ലീങ്ങള്‍ക്ക് നേരിടേണ്ടി വന്നത് ഇതിലും വലിയ അതിക്രമങ്ങളായിരുന്നെന്നും റിപ്പോര്‍ട്ട് വ്യക്തമാക്കുന്നു. നൂറുകണക്കിന് ആക്രമണങ്ങളാണ് അന്ന് റിപ്പോര്‍ട്ട് ചെയ്യപ്പെട്ടത്. മുസ്ലീങ്ങള്‍ കൂടാതെ മുസ്ലീങ്ങളെന്ന് തെറ്റിദ്ധരിച്ച് സിഖുകാരും ആക്രമണങ്ങള്‍ക്കിരയായി. പാരിസ്, കാലിഫോര്‍ണിയ ആക്രമണങ്ങളുടെ പശ്ചാത്തലത്തില്‍ മുസ്ലീങ്ങള്‍ക്കെതിരെ ആക്രമണങ്ങള്‍ നടക്കാന്‍ സാധ്യതയുണ്ടെന്ന് പ്രസിഡന്റ് ബറാക് ഒബാമ ഉള്‍പ്പെടെയുള്ളവര്‍ മുന്നറിയിപ്പ് നല്‍കിയിരുന്നു. എന്നാല്‍ ഇക്കാര്യം സ്ഥിരീകരിച്ചുകൊണ്ട് ആദ്യം പുറത്ത് വരുന്ന റിപ്പോര്‍ട്ടാണിത്. കാലിഫോര്‍ണിയ സ്‌റ്റേറ്റ് സര്‍വകലാശാലയിലെ ഗവേഷകരാണ് പുതിയ റിപ്പോര്‍ട്ട് പുറത്ത് വിട്ടത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha