ചെറിയ കുറ്റകൃത്യങ്ങള്ക്ക് തടവുശിക്ഷക്കു പകരം സ്മാര്ട്ട് വള
ചെറിയ കുറ്റകൃത്യങ്ങളില് ശിക്ഷിക്കപ്പെടുന്നവര്ക്ക് തടവുശിക്ഷക്കു പകരം സ്മാര്ട്ട് വള നല്കുന്ന സമ്പ്രദായം നടപ്പിലാക്കുമെന്ന് സൗദി അറേബ്യ. അതിനുള്ള ഇലക്ട്രോണിക് സ്മാര്ട്ട് വള വികസിപ്പിച്ചെടുത്തതായി ജയില് വിഭാഗം അറിയിച്ചു. അടുത്ത ഷുറാ കൗണ്സില് ഇതു സംബന്ധിച്ച ബില് പരിഗണിക്കും.
മദ്യപാനം, അടിപിടി തുടങ്ങിയ ചെറിയ കുറ്റകൃത്യങ്ങളില് പ്രതികളായവര്ക്കായിരിക്കും ജയില് ശിക്ഷക്ക് പകരം ഇലക്ട്രോണിക് സ്മാര്ട്ട് വളകള് നല്കുക. കാലില് ഘടിപ്പിക്കുന്ന വിധമായിരിക്കും വളകള്. സ്മാര്ട്ട് വളകള് ധരിക്കുന്ന കുറ്റവാളികളെ സാറ്റലൈറ്റിന്റെ സഹായത്തോടെ കണ്ട്രോള് റൂമിലിരുന്ന് തന്നെ നിരീക്ഷിക്കാനാകും.
വലിയ കുറ്റകൃത്യങ്ങളില് അന്വേഷണം പൂര്ത്തിയാക്കാന് പ്രതികള് ജയിലില് തന്നെ ഉണ്ടാവേണ്ടത് അത്യാവശ്യമാണ്. അതിനാല് മയക്കുമരുന്ന് കടത്ത്, മയക്കുമരുന്ന് വില്പന, മോഷണം തുടങ്ങിയ വലിയ കുറ്റകൃത്യങ്ങളില് ഏര്പ്പെടുന്നവര്ക്ക് സ്മാര്ട്ട് വളകള് നല്കുന്ന സംവിധാനം ബാധകമാക്കില്ല. കരുതല് തടവിനും വീട്ടുതടവിനും പരോളില് ഇറങ്ങുമ്പോഴും കുറ്റവാളികളെ സ്മാര്ട്ട് വളകള് അണിയിക്കും.
സ്മാര്ട്ട് വളകള് ഘടിപ്പിക്കുന്ന പദ്ധതി അവസാന ഘട്ടത്തിലാണ്. പദ്ധതിക്ക് ആഭ്യന്തര മന്ത്രാലയത്തിന്റെ അംഗീകാരം ലഭിച്ചിട്ടുണ്ട്. തടവുശിക്ഷക്കു പകരമായി സ്മാര്ട്ട് വള ഘടിപ്പിക്കുന്ന നിയമത്തിനുള്ള അംഗീകാരത്തിനായി അടുത്ത ഷൂറ കൗണ്സിലില് ബില് അവതരപ്പിക്കും. നിയമമായി പ്രാബല്യത്തില് വന്നാല് മാത്രമേ ശിക്ഷയായി ഇത് നടപ്പിലാക്കാന് ജഡ്ജിമാര്ക്ക് സാധിക്കുകയുള്ളൂ.
അമേരിക്കയില് 1980 മുതല് സ്മാര്ട്ട് വളകള് പ്രാബല്യത്തിലുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivarthahttps://www.facebook.com/Malayalivartha
