മരുന്നും ഭക്ഷണവും കുടിവെള്ളവും തീര്‍ന്ന ഗാസയിലേക്ക് റാഫ ഇടനാഴി തുറക്കാന്‍ ഈജിപ്റ്റ് സമ്മതിച്ചത് വന്‍ ആശ്വാസമാകുന്നു... യു.എന്നിന്റേതടക്കം അവശ്യവസ്തുക്കളുമായി കാത്തു കിടക്കുന്ന ട്രക്കുകള്‍ ഇന്നു മുതല്‍ ഗാസയിലേക്ക് തിരിച്ചേക്കും
മരുന്നും ഭക്ഷണവും കുടിവെള്ളവും തീര്‍ന്ന ഗാസയിലേക്ക് റാഫ ഇടനാഴി തുറക്കാന്‍ ഈജിപ്റ്റ് സമ്മതിച്ചത് വന്‍ ആശ്വാസമാകുന്നു. ഇസ്രയേലിന് പുറത്തുനിന്ന് ഗാസയില്‍ സഹായമെത്തിക്കാനുള്ള ഏക മാര്‍ഗമാണ് റാഫ അതിര്‍ത്തി.
യു.എന്നിന്റേതടക്കം അവശ്യവസ്തുക്കളുമായി കാത്തു കിടക്കുന്ന ട്രക്കുകള്‍ ഇന്നു മുതല്‍ ഗാസയിലേക്ക് തിരിച്ചേക്കും. ആദ്യം 20 ട്രക്കുകള്‍ കടത്തിവിടും. 3000 ടണ്‍ വസ്തുക്കളുമായി 200ലേറെ ട്രക്കുകളാണ് കാത്തുകിടക്കുന്നത്.
യു.എസ് പ്രസിഡന്റ് ജോ ബൈഡനുമായുള്ള ഫോണ്‍ സംഭാഷണത്തെ തുടര്‍ന്നാണ് അതിര്‍ത്തി തുറക്കാന്‍ ഈജിപ്ഷ്യന്‍ പ്രസിഡന്റ് അബ്ദുള്‍ ഫത്താ അല്‍ സിസി തയ്യാറായത്. സഹായമെത്തിക്കാനായി കഴിഞ്ഞ ദിവസം ഇസ്രയേല്‍ അനുവാദം നല്‍കിയിട്ടുണ്ടായിരുന്നു.
അവശ്യ വസ്തുക്കള്‍ ഹമാസിന് നല്‍കില്ലെന്നും ഹമാസ് അവ തടയുകയോ പിടിച്ചെടുക്കുകയോ ചെയ്താല്‍ ട്രക്ക് നീക്കം നിറുത്തുമെന്നും കഴിഞ്ഞ ദിവസം യു. എസ് പ്രസിഡന്റ് ബൈഡന്‍ പ്രഖ്യാപിച്ചിരുന്നു.
ഹിസ്ബുള്ളയെ ചെറുക്കാന്‍ ലെബനന്‍ അതിര്‍ത്തിയിലും കൂടുതല്‍ സൈനികരെ ഇസ്രയേല്‍ വിന്യസിച്ചു.തങ്ങളുടെ പൗരന്മാരെല്ലാം ഉടന്‍ ലെബനന്‍ വിടണമെന്ന് സൗദി അറേബ്യ മുന്നറിയിപ്പ് നല്‍കി.
203 പേരെങ്കിലും ഹമാസിന്റെ ബന്ദികളായുണ്ടെന്ന് ഇസ്രയേല്‍ സൈന്യം . വെസ്റ്റ് ബാങ്കില്‍ ഇസ്രയേല്‍ ആക്രമണത്തില്‍ ആറ് പാലസ്തീനികള്‍ കൊല്ലപ്പെടുകയുണ്ടായി. അതേസമയം, ബ്രിട്ടീഷ് പ്രധാനമന്ത്രി ഋഷി സുനക് ഐക്യദാര്‍ഢ്യം പ്രഖ്യാപിച്ച് ഇന്നലെ ഇസ്രയേലിലെത്തി. പ്രധാനമന്ത്രി നെതന്യാഹുവുമായുള്ള കൂടിക്കാഴ്ചയില്‍ ഗാസയിലേക്ക് മാനുഷിക സഹായങ്ങള്‍ അനുവദിക്കാനുള്ള തീരുമാനത്തെ ഋഷി പ്രശംസിച്ചു. പാലസ്തീന് സാമ്പത്തിക സഹായവും പ്രഖ്യാപിച്ചു.
https://www.facebook.com/Malayalivartha
