രക്തമില്ലാതെ ഒരു പുതിയ നഗരം പണിയുന്നു;കൊല്ലപ്പെടും മുന്‍പ് ഹിബ എഴുതിയ കുറിപ്പ് ഏറ്റെടുത്ത് സോഷ്യല്‍മീഡിയ,നരകമാണ് ഗാസ പിഞ്ചുകുഞ്ഞുങ്ങള്‍ പോലും ചിതറി തെറിക്കുന്നു,ഞങ്ങളെ രക്ഷിക്കൂ പലസ്തീന്‍ ജനത കേഴുന്നു
സ്വര്‍ഗത്തില്‍ ഒരു പുതിയ ഗാസ രൂപം കൊണ്ടിരിക്കുന്നു. രക്തമില്ലാതെ ഒരു പുതിയ നഗരം പണിയുന്നു. അവള്‍ കൊല്ലപ്പെടുന്നതിന് മുന്‍പ് കുറിച്ചു. പലസ്തീന്‍ എഴുത്തുകാരി ഹിബ കമാല്‍ അബു നദ ഒടുവില്‍ തന്റെ ടൈം ലൈനില്‍ കുറിച്ച ഈ വരികള്‍ ഏറ്റെടുത്തിരിക്കുകയാണ് സോഷ്യല്‍മീഡിയ. പലസ്തീന്‍ സാംസ്‌കാരികവകുപ്പാണ് ഹിബയുടെ മരണം സ്ഥിരീകരിച്ചുകൊണ്ടുള്ള വിശദാംശങ്ങള്‍ ഔദ്യോഗിക വെബ്‌സൈറ്റിലൂടെ പുറത്തുവിട്ടത്. നാം ചര്‍ച്ച ചെയ്യുന്നത് ഇസ്രയേല്‍-ഹമാസ് യുദ്ധമാണ്. അതിനപ്പുറത്തേക്ക് പലസ്തീനിലെ സാധാരണ ജനത അനുഭവിക്കുന്ന ക്രൂരതകള്‍ കാണാതെ പോകരുത്. നരകമാണ് ഗാസ, പിഞ്ചുകുഞ്ഞുങ്ങള്‍ പോലും ചിതറി തെറിക്കുന്നത് മാതാപിതാക്കള്‍ക്ക് കാണേണ്ടി വരുന്ന അവസ്ഥ ഒന്ന് ചിന്തിച്ച് നോക്കൂ. യുദ്ധം നശിപ്പിക്കുന്നത് കുറേ മനുഷ്യരേക്കൂടെയാണ്. അവരുടെ സ്വപ്‌നങ്ങളും കൂടിയാണ്.
ഹിബ കുറിച്ചത് ഇങ്ങനെ...
ഞങ്ങള്‍ ഇപ്പോള്‍ ഉയര്‍ന്ന ആകാശത്തിലാണ്, രോഗികളില്ലാതെ, രക്തമില്ലാതെ ഒരു പുതിയ നഗരം പണിയുന്നു. വിദ്യാര്‍ഥികള്‍ക്ക് നേരെ ആക്രോശിക്കുകയോ തിരക്കുകൂട്ടുകയോ ചെയ്യാത്ത അദ്ധ്യാപകര്‍, വേദനയും സങ്കടവുമില്ലാത്ത പുതിയ കുടുംബങ്ങള്‍, സ്വര്‍ഗം ചിത്രീകരിക്കുന്ന റിപ്പോര്‍ട്ടര്‍മാര്‍, ശാശ്വതപ്രണയം പാടുന്ന കവികള്‍, എല്ലാവരും ഗാസയില്‍ നിന്നുള്ളവരാണ്. എല്ലാവരും സ്വര്‍ഗത്തില്‍, ഇപ്പോള്‍ ഒരു പുതിയ ഗാസ രൂപം കൊണ്ടിരിക്കുന്നു; ഉപരോധമില്ലാത്ത ഗാസ''ഏറ്റവും ഒടുവിലായി തന്റെ ടൈം ലൈനില്‍ ഹിബ കുറിച്ചു.
പലസ്തീന്‍ സാംസ്‌കാരിക വകുപ്പാണ് ഹിബയുടെ മരണം സ്ഥിരീകരിച്ചുകൊണ്ടുള്ള വിശദാംശങ്ങള്‍ ഔദ്യോഗിക വെബ്‌സൈറ്റിലൂടെ പുറത്തുവിട്ടത്. കഥകളും കവിതകളും നോവലുകളും എഴുതി പലസ്തീനിന്റെ സാംസ്‌കാരിക പൈതൃകം ഉയര്‍ത്തിപ്പിടിക്കുന്നതില്‍ മുഖ്യ പങ്കുവഹിച്ചിട്ടുള്ള എഴുത്തുകാരിയായിരുന്നു മുപ്പത്തിരണ്ടുകാരിയായ ഹിബ.
1991ല്‍ സൗദി അറേബ്യയിലാണ് ഹിബ ജനിച്ചത്. പലസ്തീനിലെ സംഘര്‍ഷാവസ്ഥയില്‍ നിന്നും രക്ഷ തേടി സൗദിയിലേക്ക് പലായനം ചെയ്ത് കുടുംബത്തിലെ അംഗമായിരുന്നു ഹിബ. ബയോ കെമിസ്ട്രിയില്‍ ബിരുദം നേടി എഡ്യുക്കഷണല്‍ റീഹാബിലിറ്റേഷനില്‍ പ്രാഗത്ഭ്യം തെളിയിച്ച ഹിബ കര്‍മമണ്ഡലമായി തിരഞ്ഞെടുത്തതും വിദ്യാഭ്യാസ മേഖലയായിരുന്നു. സര്‍ഗാത്മകസാഹിത്യത്തില്‍ അനവധി പുരസ്‌കാരങ്ങള്‍ കരസ്ഥമാക്കിയിട്ടുണ്ട്. മികച്ച ചെറുകഥയ്ക്കുള്ള അംഗീകാരം ജന്മനാട്ടില്‍ നിന്നും ലഭിച്ചു. 'ഓക്‌സിജന്‍ ഈസ് നോട്ട് ഫോര്‍ ദ ഡെഡ്' എന്ന നോവല്‍ അറബ് സാഹിത്യലോകത്ത് ഏറെ ശ്രദ്ധനേടുകയും അറബ് സാഹിത്യത്തിനുള്ള ഷാര്‍ജ പുരസ്‌കാരം നേടുകയും ചെയ്തിരുന്നു.
ഇസ്രയേല്‍ പലസ്തീന്‍ യുദ്ധം പതിനാറുനാളുകള്‍ പിന്നിടുമ്പോള്‍ ഗാസയില്‍ അവശേഷിക്കുന്നത് തകര്‍ന്നടിഞ്ഞ കെട്ടിടങ്ങളും ഛിന്നഭിന്നമായിപ്പോയ മനുഷ്യജീവിതങ്ങളുമാണ്. ഗാസ ആരോഗ്യ മന്ത്രാലയത്തിന്റെ കണക്കുകള്‍ പ്രകാരം യുദ്ധത്തില്‍ ഇതിനോടകം കൊല്ലപ്പെട്ടത് 4385 പേരാണ്. 13561 പേര്‍ ഗുരുതരമായി പരിക്കേറ്റ് ചികിത്സയില്‍ കഴിയുന്നുണ്ട്.
https://www.facebook.com/Malayalivartha
