ഗാസയ്ക്കെതിരായ യുദ്ധം ഒന്നര മാസം പിന്നിട്ടിട്ടും ഹമാസ് ബന്ദികളാക്കിയ 240ഓളം പേരില്‍ ഒരാളെ പോലും കണ്ടെത്താനോ മോചിപ്പിക്കാനോ സാധിക്കാതെ തലകുനിച്ച് പ്രധാനമന്ത്രി ബെഞ്ചമിന്‍ നെതന്യാഹു. ബന്ദികളുടെ ബന്ധുക്കളില്‍ നിന്നും പൊതുജനങ്ങളില്‍ നിന്നുമുള്ള സമ്മര്‍ദം ശക്തമായതോടെയാണ് ഒടുവില്‍ 50 ബന്ദികളെയെങ്കിലും മോചിപ്പിച്ച് മുഖം രക്ഷിക്കാന്‍ ഹമാസുമായി താല്‍ക്കാലിക വെടിനിര്‍ത്തല്‍ ഉടമ്പടിക്ക് ഇസ്രായേല്‍ ഗവണ്‍മെന്റിന് വഴങ്ങേണ്ടി വന്നത്.

ഹമാസ് ബന്ദികളാക്കിയ തങ്ങളുടെ പ്രിയപ്പെട്ടവരെ തിരികെ കൊണ്ടുവരുന്നത് പവിത്രവും പരമോന്നതവുമായ ദൗത്യമാണെന്ന് നെതന്യാഹു പറഞ്ഞു. ഹമാസുമായുള്ള വെടിനിര്‍ത്തല്‍ കരാര്‍ മന്ത്രിസഭ അംഗീകരിച്ച ശേഷം ഇസ്രായേലിനെ അഭിമുഖീകരിക്കുകയായിരുന്നു നെതന്യാഹു. എന്നാല്‍, ഗാസയ്ക്കെതിരായ യുദ്ധം അവസാനിപ്പിക്കാന്‍ തനിക്ക് ഉദ്ദേശ്യമില്ലെന്നും അദ്ദേഹം പറഞ്ഞു.

'ഹമാസിനെ ഉന്മൂലനം ചെയ്യുക, ബന്ദികളാക്കിയവരെയെല്ലാം തിരികെ എത്തിക്കുക, ഗാസ ഇനി ഇസ്രായേലിനെ ഭീഷണിപ്പെടുത്തില്ലെന്ന് ഉറപ്പാക്കുക തുടങ്ങിയ ലക്ഷ്യങ്ങള്‍ കൈവരിക്കുന്നത് വരെ ഇസ്രായേല്‍ യുദ്ധം നിര്‍ത്തില്ല, എന്നാണ് നെതന്യാഹു പറഞ്ഞത്. ബന്ദികളാക്കിയവരെയെല്ലാം നാട്ടിലേക്ക് തിരികെ കൊണ്ടുവരാന്‍ തങ്ങള്‍ ബാധ്യസ്ഥരാണെന്ന് ഇസ്രായേല്‍ സര്‍ക്കാര്‍ വ്യക്തമാക്കി.

''ഈ ലക്ഷ്യം കൈവരിക്കുന്നതിനുള്ള ആദ്യ ഘട്ട രൂപരേഖ സര്‍ക്കാര്‍ അംഗീകരിച്ചു. അതനുസരിച്ച് സ്ത്രീകളും കുട്ടികളുമടങ്ങിയ 50 ബന്ദികളെ നാല് ദിവസത്തിനുള്ളില്‍ മോചിപ്പിക്കും. ഈ സമയത്ത് പോരാട്ടം താല്‍ക്കാലികമായി നിര്‍ത്തും. ഓരോ 10 ബന്ദികളെയും വിട്ടയയ്ക്കുന്നതിനനുസരിച്ച് ഒരു ദിവസം അധികം വെടിനിര്‍ത്തല്‍ നടപ്പാക്കും എന്നാണ് നെതന്യാഹു സര്‍ക്കാര്‍ വ്യക്തമാക്കിയത്.

അതിനിടെ, ഹമാസ് തടവിലാക്കിയവരെ മോചിപ്പിക്കാനുള്ള കരാറിനെ പ്രത്യേകം സ്വാഗതം ചെയ്തുകൊണ്ട് യുഎസ് പ്രസിഡന്റ് ജോ ബൈഡന്‍ പ്രസ്താവന ഇറക്കി. ഖത്തറിലെ ഷെയ്ഖ് തമീം ബിന്‍ ഹമദ് അല്‍താനിക്കും ഈജിപ്തിലെ പ്രസിഡന്റ് അബ്ദുല്‍ ഫത്താഹ് എല്‍ സിസിക്കും ''ഈ കരാറിലെത്താനുള്ള അവരുടെ നിര്‍ണായക നേതൃത്വത്തിനും പങ്കാളിത്തത്തിനും'' ബൈഡന്‍ നന്ദി പറഞ്ഞു.

പ്രധാനമന്ത്രി നെതന്യാഹുവും അദ്ദേഹത്തിന്റെ ഗവണ്‍മെന്റും ഒരു നീണ്ട ഇടവേളയെ പിന്തുണയ്ക്കുന്നതില്‍ നടത്തിയ പ്രതിബദ്ധതയെ താന്‍ അഭിനന്ദിക്കുന്നുവെന്നും അദ്ദേഹം കൂട്ടിച്ചേര്‍ത്തു. ഇന്നത്തെ കരാര്‍ കൂടുതല്‍ അമേരിക്കന്‍ ബന്ദികളെ വീട്ടിലെത്തിക്കും, അവരെയെല്ലാം മോചിപ്പിക്കുന്നതു വരെ ഞാന്‍ നിര്‍ത്തില്ല,'' എന്നും ബൈഡന്‍ പറഞ്ഞു.