വിമാനത്തില്‍ സഹയാത്രക്കാരനെ ആക്രമിച്ച് ഇന്ത്യന്‍ യുവാവ്
വിമാനത്തില്‍ സഹയാത്രികനെ ആക്രമിച്ചതിന് ഇന്ത്യന്‍ വംശജന്‍ അറസ്റ്റില്‍. ന്യൂവാര്‍ക്കില്‍ നിന്നുള്ള 21 വയസ്സുകാരനായ ഇഷാന്‍ ശര്‍മ്മയാണ് അറസ്റ്റിലായത്. ഫിലാഡല്‍ഫിയയില്‍ നിന്ന് മയാമിയിലേക്ക് പോകുകയായിരുന്ന ഫ്രോണ്ടിയര്‍ എയര്‍ലൈന്‍സിന്റെ വിമാനത്തിലായിരുന്നു സംഭവം. വിമാനത്തില്‍ വച്ച് 'പ്രകോപനമില്ലാതെ' കീനു ഇവാന്‍സ് എന്ന യാത്രക്കാരനെ ഇഷാന്‍ ആക്രമിക്കുകയായിരുന്നു.
റിപ്പോര്‍ട്ടുകള്‍ പ്രകാരം, വിമാനം പറന്നുയര്‍ന്നതിന് തൊട്ടുപിന്നാലെ, വ്യക്തമായ കാരണമില്ലാതെ ഇഷാന്‍ ഇവാന്‍സിനെ ആക്രമിക്കുകയായിരുന്നു. ഇവാന്‍സ് മാധ്യമങ്ങളോട് പറഞ്ഞതനുസരിച്ച്, ഇഷാന്‍ ആദ്യം വിചിത്രമായി സംസാരിക്കാന്‍ തുടങ്ങി. പിന്നീട് വധഭീഷണി മുഴക്കുകയായിരുന്നു. 'ഹാ ഹ ഹ ഹ ഹ' എന്ന് ഉറക്കെ ചിരിക്കുകയും, 'നീ എന്നെ വെല്ലുവിളിച്ചാല്‍ നിന്നെ ഞാന്‍ കൊല്ലും' എന്ന് ഭീഷണിപ്പെടുത്തുകയും ചെയ്തുവെന്ന് ഇവാന്‍സ് പറഞ്ഞു.
ഇഷാന്റെ അസാധാരണമായ പെരുമാറ്റത്തില്‍ അസ്വസ്ഥനായ ഇവാന്‍സ് കാബിന്‍ ക്രൂവിനെ വിളിക്കാന്‍ ശ്രമിച്ചു. ഇത് ഇഷാനെ കൂടുതല്‍ പ്രകോപിതനാക്കി. തുടര്‍ന്ന് ഇഷാന്‍ ഇവാന്‍സിന്റെ നേര്‍ക്ക് തിരിയുകയും കഴുത്തില്‍ പിടിച്ച് ആക്രമിക്കുകയും ചെയ്തു. തുടര്‍ന്ന് ഇവാന്‍സ് ആക്രമണത്തെ പ്രതിരോധിച്ചു. ഈ ദൃശ്യങ്ങള്‍ സമൂഹമാധ്യമത്തില്‍ പ്രചരിക്കുന്ന വിഡിയോയില്‍ കാണാം. ഇത് കണ്ട് മറ്റ് യാത്രക്കാര്‍ നിലവിളിക്കുന്നതായും വിഡിയോയില്‍ കേള്‍ക്കാം.
മയാമിയില്‍ വിമാനം ഇറങ്ങിയ ഉടന്‍ ഇഷാനെ അറസ്റ്റ് ചെയ്തു. അതേസമയം തന്റെ കക്ഷി വിമാനത്തില്‍ ധ്യാനിക്കുകയായിരുന്നുവെന്നും 'ഇത് സഹയാത്രക്കാരന് ഇഷ്ടപ്പെട്ടില്ല,' അദ്ദേഹത്തിന്റെ ധ്യാനം ഇവാന്‍സിന് ഭീഷണിയായി തോന്നിയതാണെന്നുമാണ് ഇഷാന്റെ അഭിഭാഷകന്‍ മാധ്യമങ്ങളളോട് പറഞ്ഞത്.
https://www.facebook.com/Malayalivartha
