ഏതാനും മാസങ്ങൾക്ക് മുമ്പ് പൂർത്തിയായ പാലം മണ്ണിടിച്ചിലിനെ തുടർന്ന് തകർന്നുവീണു. തെക്കുപടിഞ്ഞാറൻ ചൈനയിലെ സിചുവാൻ പ്രവിശ്യയിലെ മേർകാങ്ങിലുള്ള ഹോങ്കി പാലം നിർമ്മാണം പൂർത്തിയായി മാസങ്ങൾ മാത്രം കഴിഞ്ഞപ്പോൾ ആണ് തകർന്നത്.

റിപ്പോർട്ട് പ്രകാരം, മധ്യ ചൈനയെ ടിബറ്റുമായി ബന്ധിപ്പിക്കുന്ന ഒരു പ്രധാന ഹൈവേയുടെ ഭാഗമായ 758 മീറ്റർ നീളമുള്ള പാലം ഈ ആഴ്ചയുടെ തുടക്കത്തിൽ തന്നെ അപകടത്തിന്റെ ലക്ഷണങ്ങൾ കാണിച്ചിരുന്നു. തിങ്കളാഴ്ച ഉച്ചകഴിഞ്ഞ്, എഞ്ചിനീയർമാർ റോഡരികിലും സമീപ ചരിവുകളിലും വിള്ളലുകൾ ശ്രദ്ധയിൽപ്പെടുകയും പാലത്തിൽ ഗതാഗതം നിർത്തി വയ്ക്കുകയും ചെയ്തു.

ചൊവ്വാഴ്ച ഉച്ചയോടെ, ആ വിള്ളലുകൾ വികസിക്കുകയും മണ്ണിടിച്ചിലിന് കാരണമാവുകയും പാലത്തിന്റെ അപ്രോച്ച് ഘടനയുടെ ചില ഭാഗങ്ങൾ താഴെയുള്ള താഴ്‌വരയിലേക്ക് തകരുകയും ചെയ്തു. ഓൺലൈനിൽ പ്രചരിക്കുന്ന ദൃശ്യങ്ങൾ പാലത്തിന്റെ ഒരു വലിയ ഭാഗം നിമിഷങ്ങൾക്കുള്ളിൽ തകർന്നുവീഴുകയും പൊടിപടലങ്ങളും അവശിഷ്ടങ്ങളും പുറത്തേക്ക് ഉയരുകയും ചെയ്യുന്നതായി കാണിക്കുന്നു.

പാലത്തിന്റെ ഘടനാപരമായ നേരിട്ടുള്ള തകരാറല്ല, മറിച്ച് പർവത ചരിവുകളിലെ അസ്ഥിരതയാണ് തകർച്ചയ്ക്ക് കാരണമെന്ന് സിചുവാൻ പ്രവിശ്യാ സർക്കാർ സ്ഥിരീകരിച്ചു. ടിബറ്റിലേക്കുള്ള കണക്റ്റിവിറ്റി വർദ്ധിപ്പിക്കുന്നതിനായി രൂപകൽപ്പന ചെയ്ത ഒരു പ്രാദേശിക ഗതാഗത ലിങ്കിന്റെ പ്രധാന ഭാഗമായി ഈ വർഷം ആദ്യം ഹോങ്കി പാലം പൂർത്തിയായിരുന്നു.

പാലത്തിന്റെ അടിത്തട്ടിൽ നിന്ന് മലയിടുക്കിന്റെ അടിഭാഗം വരെ 2050 അടി ഉയരമുണ്ടായിരുന്നു. ഷുവാങ്ജിയാങ്കു ജലവൈദ്യുത നിലയത്തിന് സമീപമാണ് പാലം സ്ഥിതി ചെയ്യുന്നത്, ദാദു നദിയിലെ ഒരു മലയിടുക്കിലാണ് അണക്കെട്ട് നിർമ്മിക്കുന്നത്. ഏകദേശം ഒരു പതിറ്റാണ്ടായി അണക്കെട്ടിന്റെ നിർമ്മാണത്തിലാണ്. പൂർത്തിയാകുമ്പോൾ, ലോകത്തിലെ ഏറ്റവും ഉയരം കൂടിയ അണക്കെട്ടായിരിക്കും ഇത്.