വെനസ്വേലയിലെ അമേരിക്കന്‍ ആക്രമണത്തിന് പിന്നാലെ ആഗോള സാമ്പത്തിക രംഗത്ത് ആശങ്ക പെരുകുന്നു. വെനസ്വേല അമേരിക്ക സംഘര്‍ഷം യുദ്ധത്തിലേക്ക് നീങ്ങിയാല്‍ രാജ്യാന്തര വിപണിയില്‍ ക്രൂഡ് ഓയില്‍, സ്വര്‍ണം, വെള്ളി, ഭക്ഷ്യസാധനങ്ങള്‍ എന്നിവയുടെ വില കുത്തനെ വര്‍ദ്ധിക്കും. യുഎസ് വെനസ്വേലയില്‍ നടത്തിയ നീക്കത്തിന്റെ പ്രതിഫലനം തിങ്കളാഴ്ചയോടെ വിപണിയില്‍ പ്രതിഫലിക്കും. ശനിയും ഞായറും രാജ്യാന്തര വിപണികള്‍ അവധിയിലായതിനാല്‍ തിങ്കളാഴ്ച എങ്ങനെയാകും ആഗോളവിപണിയിലെ പ്രതിഫലനമെന്ന് ഉറ്റുനോക്കുകയാണ് ലോകം.

രാജ്യാന്തര വിപണിയില്‍ സ്വര്‍ണം, വെള്ളി അടക്കമുള്ള ലോഹങ്ങളുടെ വില കുതിക്കാനാണ് സാധ്യതയെന്നാണ് വിലയിരുത്തല്‍. ലോഹങ്ങള്‍, ക്രൂഡ് ഓയില്‍, മറ്റ് ഊര്‍ജ്ജ ഉല്‍പ്പന്നങ്ങള്‍ എന്നിവയുടെ വില ഉയരുമെന്ന് പ്രതീക്ഷിക്കുന്നതായി 'യാ വെല്‍ത്ത്' ഡയറക്ടര്‍ അനുജ് ഗുപ്ത പറഞ്ഞു. കോമെക്‌സ് വിപണിയില്‍ സ്വര്‍ണ്ണവില ഔണ്‍സിന് 4,345.50 ഡോളറിലാണ് ക്ലോസ് ചെയ്തത്. അടുത്ത തിങ്കളാഴ്ച വ്യാപാരം പുനരാരംഭിക്കുമ്പോള്‍ ഇത് 4,380 ഡോളറിലേക്ക് ഉയര്‍ന്നേക്കാം. വെള്ളി നിരക്ക് ഔണ്‍സിന് 75 മുതല്‍ 78 ഡോളര്‍ വരെ എത്തിയേക്കാം. അതുപോലെ ബ്രെന്റ് ക്രൂഡ് ഓയില്‍ വില ബാരലിന് 62 മുതല്‍ 65 ഡോളര്‍ വരെ ഉയരാന്‍ സാധ്യതയുണ്ട്. ഇന്ത്യന്‍ വിപണിയില്‍ സ്വര്‍ണ്ണവില 10 ഗ്രാമിന് 1,40,000 രൂപയായും വെള്ളി കിലോയ്ക്ക് 2,45,000 രൂപയായും ഉയര്‍ന്നേക്കാം. എംസിഎക്‌സില്‍ ക്രൂഡ് ഓയില്‍ വില ബാരലിന് 5,200 മുതല്‍ 5,300 രൂപ വരെയാകാനും സാധ്യതയുണ്ട്.'

യുഎസ്‌വെനസ്വേല സംഘര്‍ഷം വെള്ളി കയറ്റുമതിയില്‍ വലിയ തിരിച്ചടിയാകുമെന്നാണ് സാമ്പത്തിക വിദഗ്ധര്‍ പറയുന്നത്. യുഎസ്‌വെനസ്വേല പ്രതിസന്ധി ലോകത്തിലെ ഏറ്റവും വലിയ വെള്ളി കയറ്റുമതിക്കാരായ പെറുവും ചാഡും ഉപയോഗിക്കുന്ന സമുദ്രപാതയെ പ്രതികൂലമായി ബാധിച്ചിട്ടുണ്ട്. ഇത് വിതരണ തടസ്സങ്ങള്‍ക്കും വിലക്കയറ്റത്തിനും കാരണമാകും. അതേസമയം ലോകത്തെ ക്രൂഡ് ഓയില്‍ സമ്പത്തിന്റെ അഞ്ചിലൊന്ന് സ്വന്തമായുള്ള രാജ്യമാണ് വെനസ്വേല. എന്നാല്‍ എണ്ണ വിതരണ രംഗത്ത് വെനസ്വേല വിലയ ശക്തിയല്ല. നിലവിലെ പ്രതിസന്ധി രാജ്യാന്തര എണ്ണ വിപണിയെ നിലവില്‍ സാരമായി ബാധിക്കില്ല.