റഷ്യന് അസംസ്കൃത എണ്ണയുമായി ആദ്യത്തെ കപ്പല് ശനിയാഴ്ച വൈകുന്നേരം ന്യൂ മംഗളൂരു തുറമുഖത്തെത്തി
പശ്ചിമേഷ്യന് യുദ്ധ പ്രതിസന്ധിക്കിടയില് റഷ്യന് അസംസ്കൃത എണ്ണയുമായി ആദ്യത്തെ കപ്പല് ശനിയാഴ്ച വൈകുന്നേരം ന്യൂ മംഗളൂരു തുറമുഖത്തെത്തി. യുദ്ധ സാഹചര്യത്തെ തുടര്ന്ന് ഹോര്മുസ് കടലിടുക്ക് അടഞ്ഞത് ഇന്ത്യയുടെ ഊര്ജ്ജ സുരക്ഷയ്ക്ക് വലിയ ഭീഷണിയായിരുന്നു. 'അക്വാ ടൈറ്റന്' എന്ന കപ്പലാണ് ഇന്ത്യന് തീരം തൊട്ടത്. ചൈന ലക്ഷ്യമാക്കി നീങ്ങിയിരുന്ന ഈ കപ്പല്, ഇന്ത്യയുടെ ഊര്ജ്ജ ആവശ്യങ്ങള് മുന്നിര്ത്തി പാതിവഴിയില് യാത്ര തിരിച്ചുവിടുകയായിരുന്നു.
ജനുവരി അവസാനത്തില് ബാള്ട്ടിക് കടലില് നിന്ന് പുറപ്പെട്ട ഈ കപ്പല് ചൈനയിലെ റിഷാവോ തുറമുഖത്തേക്കായിരുന്നു പോകേണ്ടിയിരുന്നത്. റഷ്യന് എണ്ണ വാങ്ങാന് ഇന്ത്യ തീരുമാനിച്ചതോടെ മാര്ച്ച് പകുതിയില് കപ്പല് ഇന്ത്യയിലേക്ക് ദിശ മാറ്റി. ഇത്തരത്തില് ചൈനയിലേക്ക് പോകേണ്ടിയിരുന്ന ഏഴ് റഷ്യന് എണ്ണക്കപ്പലുകളാണ് ഇപ്പോള് ഇന്ത്യയിലേക്ക് വരുന്നത്. ഇത് രാജ്യത്തെ നിലവിലെ അസംസ്കൃത എണ്ണക്ഷാമം പരിഹരിക്കാന് സഹായിക്കുമെന്ന് പ്രതീക്ഷിക്കുന്നു.
ഇന്ത്യയെ സംബന്ധിച്ചിടത്തോളം ഹോര്മുസ് കടലിടുക്ക് അതീവ പ്രാധാന്യമുള്ളതാണ്. രാജ്യത്തെ അസംസ്കൃത എണ്ണ ഇറക്കുമതിയുടെ 40 മുതല് 50 ശതമാനം വരെയും എല്എന്ജി, എല്പിജി ഇറക്കുമതിയുടെ വലിയൊരു ഭാഗവും ഈ പാതയിലൂടെയാണ് നടക്കുന്നത്. 'സൂയസ്മാക്സ് സുസു എന്' എന്ന മറ്റൊരു കപ്പല് മാര്ച്ച് 25ഓടെ ഗുജറാത്തിലെ സിക്ക തുറമുഖത്തെത്തുമെന്നാണ് കരുതുന്നത്.
രാജ്യത്ത് നിലനില്ക്കുന്ന പാചകവാതക പ്രതിസന്ധിക്ക് പരിഹാരമായി അമേരിക്കയിലെ ടെക്സസില് നിന്നുള്ള വലിയൊരു എല്പിജി കപ്പലും മംഗളൂരുവില് എത്തിയിട്ടുണ്ട്. 'പിക്സിസ് പയനിയര്' എന്ന കപ്പലാണ് ഞായറാഴ്ച തുറമുഖത്ത് എത്തിയത്. ആവശ്യമായ സുരക്ഷാ പരിശോധനകള്ക്ക് ശേഷം എല്പിജി ഇറക്കാനുള്ള നടപടികള് തുറമുഖത്ത് ആരംഭിച്ചു.
https://www.facebook.com/Malayalivartha
