ഹോങ്കോങ്കില്‍ നിന്ന് ലണ്ടനിലേക്ക് പറന്നുയര്‍ന്ന വിമാനത്തില്‍ വച്ച് 60കാരി മരിച്ചു. ഹോങ്കോങ്കില്‍ നിന്ന് ലണ്ടനിലേക്ക് പോയ ബ്രിട്ടീഷ് എയര്‍വേയ്‌സ് വിമാനമായ ബി എ 32ലാണ് സംഭവം. സ്ത്രീ മരിച്ചിട്ടും അടിയന്തര ലാന്‍ഡിംഗ് ചെയ്താതെ വിമാനം ലണ്ടനിലേക്ക് പറന്നു. ഏകദേശം 13 മണിക്കൂറാണ് യാത്രക്കാര്‍ മൃതദേഹത്തിനൊപ്പം ചെലവഴിച്ചത്. 331 യാത്രക്കാരാണ് വിമാനത്തില്‍ ഉണ്ടായിരുന്നത്.

ഒരാളുടെ മരണം മെഡിക്കല്‍ എമര്‍ജന്‍സിയായി കണക്കിലാക്കാന്‍ കഴിയില്ലെന്ന് പറഞ്ഞ് വിമാനം അടിയന്തര ലാന്‍ഡിംഗ് ചെയ്യാതെ പൈലറ്റ് ലണ്ടനിലേക്ക് വിമാനം പറത്തുകയായിരുന്നു. തുടര്‍ന്ന് ക്രൂ അംഗങ്ങള്‍ മൃതദേഹം പൊതിഞ്ഞ് വിമാനത്തിന് പിന്നിലെ ഗാലിയിലേക്ക് മാറ്റി. സ്ത്രീയോടൊപ്പം കുടുംബവും വിമാനത്തില്‍ ഉണ്ടായിരുന്നുവെന്നാണ് വിവരം.

എന്നാല്‍ മൃതദേഹത്തില്‍ നിന്ന് രൂക്ഷഗന്ധം ക്യാബിനില്‍ വ്യാപിച്ചിരുന്നതായും റിപ്പോര്‍ട്ടുണ്ട്. ലണ്ടനില്‍ ലാന്‍ഡ് ചെയ്ത ഉടന്‍ പൊലീസ് വിമാനത്തിനുള്ളില്‍ കയറി സംഭവത്തില്‍ അന്വേഷണം നടത്തിയെന്നും റിപ്പോര്‍ട്ടുണ്ട്. തുടര്‍ന്ന് യാത്രക്കാര്‍ ഉള്‍പ്പടെയുള്ള ജീവനക്കാര്‍ 45 മിനിറ്റോളം വീണ്ടും വിമാനത്തില്‍ തുടര്‍ന്നു. സംഭവസമയത്ത് എല്ലാ നടപടികളും കൃത്യമായി പാലിച്ചെന്നാണ് ബ്രിട്ടീഷ് എയര്‍വേയ്‌സ് അറിയിച്ചത്.