ഉറി സൈനീകക്യാമ്പിന് നേരെയുണ്ടായ ഭീകരാക്രമണത്തിന് തിരിച്ചടിയായി ഇന്ത്യ നിയന്ത്രണരേഖ കടന്ന് ആക്രമണം നടത്തിയതായി മുതിര്‍ന്ന പോലീസ് ഉദ്യോഗസ്ഥന്റെ വെളിപ്പെടുത്തല്‍. അഞ്ച് പട്ടാളക്കാരും ആക്രമണത്തില്‍ കൊല്ലപ്പെട്ടതായി പാക് അധിനിവേശ കശ്മീരിലെ മിര്‍പൂര്‍ റേഞ്ച് സൂപ്രണ്ട് ഓഫ് പൊലീസ് (സ്‌പെഷല്‍ ബ്രാഞ്ച്) ഗുലാം അക്ബര്‍ ഒരു ദേശീയ മാധ്യമത്തോടാണ് അദ്ദേഹം ഇക്കാര്യം സമ്മതിച്ചത്.
സെപ്തംബര്‍ 28 രാത്രിയിലാണ് ആക്രമണമുണ്ടായത്. ഇന്ത്യ ആക്രമണം നടത്തിയിട്ടില്ലെന്നാണ് ഇതുവരെ പാക് സൈന്യവും സര്‍ക്കാരും ഇത് സംബന്ധിച്ച് വാര്‍ത്തകളോട് പ്രതികരിച്ചിരുന്നത്. ഇന്ത്യന്‍ ആക്രമണത്തെക്കുറിച്ച് പാക്ക് സൈന്യത്തിനു യാതൊരുവിധ സൂചനയും ലഭിച്ചിരുന്നില്ല. ഇന്ത്യ നടത്തിയ തിരിച്ചടിയില്‍ പാക് സൈനികരടക്കം നിരവധി ഭീകരരും കൊല്ലപ്പെട്ടിരുന്നു. പാക് അധീന കശ്മീരിലെ നാലിടങ്ങളിലാണ് സൈന്യം ആക്രമണം നടത്തിയത്.
സാംമ്‌നയിലെ ഭീംബേര്‍, പൂഞ്ചിലെ ഹസീറ, നീലംമിലെ ദുഹ്നിയാല്‍, ഹാത്തിയാന്‍ ബാലയിലെ കയാനി എന്നിവിടങ്ങളിലായിരുന്നു ഇന്ത്യന്‍ ആക്രമണം. പുലര്‍ച്ചെ രണ്ടിനും അഞ്ചിനും ഇടയ്ക്കായിരുന്നു ആക്രമണം. മൂന്നു മുതല്‍ നാലു മണിക്കൂറോളം ആക്രമണം നീണ്ടുനിന്നുവെന്നാണ് വിവരം. ഒരേസമയം വിവിധ ഇടങ്ങളിലായിട്ടായിരുന്നു ആക്രമണമെന്നും ഗുലാം അക്ബര്‍ ടെലിവിഷന്‍ ചാനലിനോട് പറഞ്ഞു. ഐജി മുഷ്താഖ് എന്ന പേരില്‍ സിഎന്‍എന്‍ ലേഖകന്‍ എസ്പിയുമായി നടത്തിയ സംഭാഷണത്തിലാണ് കൂടുതല്‍ വിവരങ്ങള്‍ പുറത്തുവന്നത്. 
ഇന്ത്യയുടെ മിന്നലാക്രമണത്തിന് പിന്നാലെ പാക് സൈന്യം സംഭവസ്ഥലത്തെത്തി പ്രദേശം ഒഴിപ്പിച്ചതേയും സംഭാഷണത്തില്‍ പറയുന്നു. മൃതദേഹങ്ങള്‍ അവിടെത്തന്നെ കുഴിച്ചുമൂടുകയായിരുന്നുവെന്നും അദ്ദേഹം പറഞ്ഞു. ഇന്ത്യന്‍ സൈന്യം അതിര്‍ത്തി ലംഘിച്ച് മൂന്നു കിലോമീറ്റര്‍ അപ്പുറം ആക്രമണം നടത്തിയതായി ലഫ്.ജനറല്‍ രണ്‍ബീര്‍ സിങ് വാര്‍ത്താസമ്മേളനത്തില്‍ അറിയിച്ചിരുന്നു. ഈ പ്രദേശത്തുനിന്നും കനത്ത വെടിവെപ്പിന്റെയും സ്‌ഫോടനത്തിന്റെയും ശബ്ദം കേട്ടതായും ദൃക്‌സാക്ഷികളില്‍നിന്നുള്ള വിവരങ്ങളുടെ അടിസ്ഥാനത്തില്‍ ദേശീയ ദിനപ്പത്രം കഴിഞ്ഞ ദിവസം റിപ്പോര്‍ട്ടു ചെയ്തിരുന്നു. കൊല്ലപ്പെട്ട ഭീകരരുടെ മൃതദേഹങ്ങള്‍ ട്രക്കുകളില്‍ കയറ്റി അജ്ഞാത കേന്ദ്രങ്ങളിലേക്ക് മാറ്റിയതായും സാക്ഷിമൊഴികളില്‍ പറഞ്ഞിരുന്നു. ഡല്‍ഹി മുഖ്യമന്ത്രി അരവിന്ദ് കേജരിവാളും ചില കോണ്‍ഗ്രസ് നേതാക്കളും ഇത്തരം ആക്രമണം നടത്തില്‍ സംശയം പ്രകടിപ്പിച്ചിരുന്നു.