പ്രസവ ശസ്ത്രക്രിയ നടത്താന്‍ കുടുംബം അനുവദിക്കാത്തതിനെ തുടര്‍ന്ന് പൂര്‍ണ ഗര്‍ഭിണിയായ യുവതി ആശുപത്രി കെട്ടിടത്തിനു മുകളില്‍നിന്നും ചാടി ജീവനൊടുക്കി. ചൈനയിലെ വടക്കന്‍ ഷാന്‍സി പ്രവിശ്യയിലായിരുന്നു സംഭവം. ഇരുപത്തിയാറുകാരിയായ മാ എന്ന യുവതിയാണ് ജീവനൊടുക്കിയത്. വീഴ്ചയുടെ ആഘാതത്തില്‍ കുട്ടിയും മരിച്ചു.

പ്രസവവേദനയെ തുടര്‍ന്ന് പലവട്ടം കുടുംബാംഗങ്ങളെ സമീപിച്ച് മാ സിസേറിയന്‍ ആവശ്യപ്പെട്ടു. എന്നാല്‍ കുടുംബം ഇത് നിഷേധിച്ചു. ഇതിനെ തുടര്‍ന്ന് ഇവര്‍ ആശുപത്രിയുടെ ജനാവലി വഴി താഴേക്ക് ചാടുകയായിരുന്നു. മാ 10 മാസം ഗര്‍ഭിണിയായിരുന്നു.

കുട്ടിയുടെ തല വലുതായിരുന്നതിനാല്‍ സ്വഭാവിക പ്രസവത്തിന് ബുദ്ധിമുട്ടായിരുന്നു. ഡോക്ടര്‍മാര്‍ ഈ വിവരം കുടുംബാംഗങ്ങളെ അറിയിച്ചു. എന്നാല്‍ സീസേറിയന്‍ നടത്തുന്നതിന് അവര്‍ തയ്യാറായിരുന്നില്ല. സ്വഭാവിക പ്രസവം നടക്കുന്നതിന് കാത്തിരിക്കാമെന്നായിരുന്നു കുടുംബാംഗങ്ങളുടെ നിര്‍ദേശം.