സ്‌കൂട്ടര്‍ ചോദിച്ചപ്പോള്‍ താക്കോല്‍ നല്‍കിയില്ല, 14 കാരന്‍ 32 കാരന്റെ മുഖത്തേക്ക് ആസിഡ് ഒഴിച്ചു, യുവാവിന്റെ ഇരുകണ്ണുകളുടേയും കാഴ്ച നഷ്ടമായി
സ്‌കൂട്ടര്‍ ചോദിച്ചപ്പോള്‍ താക്കോല്‍ നല്‍കാത്തതിനെ തുടര്‍ന്ന് 14 കാരന്‍ 32 കാരന്റെ മുഖത്തേക്ക് ആസിഡ് ഒഴിച്ചു. സ്‌കൂട്ടര്‍ മോഷ്ടിക്കാന്‍ 14 കാരായ സ്‌കൂള്‍ വിദ്യാര്‍ത്ഥികള്‍ നടത്തിയ ആസിഡ് ആക്രമണത്തില്‍ യുവാവിന്റെ ഇരുകണ്ണുകളുടേയും കാഴ്ച നഷ്ടമായി. ബ്രിട്ടനിലെ വല്‍ത്താം സ്‌റ്റോവില്‍ വ്യാഴാഴ്ച വൈകുന്നേരം ആറുമണിയോടെ നടന്ന സംഭവത്തില്‍ പിസാ ഡെലിവറി ജോലി ചെയ്തിരുന്ന ബംഗ്ലാദേശ് വംശജന്‍ മുഹമ്മദ് നൗഷദ് കമാലിനാണ് കാഴ്ച നഷ്ടമായത്.
ഇയാളുടെ മുഖത്ത് ഗുരുതരമായി പൊള്ളലേറ്റിട്ടുണ്ട്. സംഭവത്തില്‍ പോലീസ് വിദ്യാര്‍ത്ഥികളില്‍ ഒരാളെ അറസ്റ്റ് ചെയ്തു. വ്യാഴാഴ്ച ആറു മണിയോടെ കിഴക്കന്‍ ലണ്ടനിലെ വല്‍ത്താംസ്‌റ്റോവിലെ ഒരു വിലാസത്തില്‍ ഓര്‍ഡര്‍ ചെയ്ത പിസാ ഡെലിവറി ചെയ്യാനായി പോയതായിരുന്നു മൊഹമ്മദ്. പിസാ കൊടുത്തതിന് പിന്നാലെ മറ്റൊരു സ്‌കൂട്ടറില്‍ എത്തിയ കുട്ടികള്‍ സ്‌കൂട്ടറിന്റെ താക്കോല്‍ തങ്ങളുടെ കയ്യില്‍ തരാന്‍ മൊഹമ്മദിനോട് ആവശ്യപ്പെട്ടു.
എന്നാല്‍ ഇത് നിരസിച്ച മൊഹമ്മദിന്റെ മുഖത്തേക്ക് കുട്ടികള്‍ ആസിഡ് സ്‌പ്രേ ചെയ്യുകയായിരുന്നു. പിസാ കൊടുത്ത വീടിന്റെ വാതിലില്‍ മുഹമ്മദ് പേടിച്ചരണ്ട് മുട്ടി വിളിച്ചെങ്കിലും വാതില്‍ തുറക്കാന്‍ ഇടപാടുകാരന്‍ തയ്യാറായില്ല.
ഇതിനിടെ കുട്ടികള്‍ വീടിന്റെ വാതിലിന് മുന്നിലിട്ട് പല തവണ ഇയാളുടെ മുഖത്തേയ്ക്ക് ആസിഡ് സ്‌പ്രേ ചെയ്തു.തൊട്ടടുത്തുണ്ടായിരുന്ന ഒരു സ്ത്രീ ഇത് കാണാനിടയാവുകയും അവര്‍ ബഹളം വെക്കുകയും ചെയ്തതോടെയാണ് മറ്റുള്ളവര്‍ ആക്രമണം അറിയുന്നത്.
ഉടന്‍ തന്നെ പോലീസും അഗ്‌നിശമന വിഭാഗവും ഓടിയെത്തി മുഖത്ത് വെള്ളം തളിച്ചെങ്കിലും ഇതിനകം ആസിഡ് ശ്വസിച്ച് മൊഹമ്മദിന് ശ്വാസ തടസം അനുഭവപ്പെട്ടു. എട്ടു വര്‍ഷമായി ബ്രിട്ടനില്‍ താമസിച്ചുവരികയാണ് മൊഹമ്മദ്.
അതേസമയം സംഭവം നടന്ന് അര മണിക്കൂര്‍ തികയുന്നതിന് മുമ്പ് മൈലുകള്‍ക്ക് അപ്പുറത്ത് ടോട്ടന്‍ഹാമിലും സമാനമായ അനുഭവം ഉണ്ടായി. എന്നാല്‍ ഇയാളുടെ പരിക്ക് ഗുരുതരമല്ലെന്നാണ് അറിയാന്‍ കഴിഞ്ഞത്. വെള്ളിയാഴ്ച അറസ്റ്റുചെയ്ത 14കാരനെ പോലീസ് ചോദ്യം ചെയ്യുന്നു.
https://www.facebook.com/Malayalivartha
