ബ്രിട്ടീഷ് രാജ്ഞി എലിസബത്ത് അടക്കമുള്ള പ്രമുഖര്‍ നികുതി വെട്ടിപ്പ് നടത്താന്‍ വിദേശ നിക്ഷേപങ്ങള്‍ നടത്തിയതിന്റെ തെളിവുകളുമായി പുതിയ വെളിപ്പെടുത്തല്‍. പാരഡൈസ് പേപ്പേഴ്‌സ് എന്നാണ് ഇതു വിശേഷിപ്പിക്കപ്പെടുന്നത്.

യുഎസ് പ്രസിഡന്റ് ഡോണള്‍ഡ് ട്രംപിന്റെ കൊമേഴ്‌സ് സെക്രട്ടറിക്ക് റഷ്യയിലെ ഉപരോധം നേരിടുന്ന കമ്പനിയില്‍ പങ്കാളിത്തമുണ്ടെന്നതാണ് മറ്റൊരു പ്രധാന വെളിപ്പെടുത്തല്‍.13.4 മില്യന്‍ രേഖകളാണ് പാരഡൈസ് പേപ്പേഴ്‌സിലുള്ളത്.

ബിബിസി പനോരമ അടക്കം നൂറോളം മാധ്യമ ഗ്രൂപ്പുകള്‍ പങ്കെടുത്ത അന്വേഷണത്തിലാണ് രഹസ്യങ്ങള്‍ പുറത്തുവന്നത്. രേഖകളിലൂടെ വെളിച്ചത്തു വരുന്ന രഹസ്യങ്ങളില്‍ ധാര്‍മിക സമസ്യകളാണ് ഏറെയും അടങ്ങിയിട്ടുള്ളത്.

വിദേശത്തു നടത്തിയിരിക്കുന്ന നിക്ഷേപങ്ങളില്‍ അധികവും നിയമവിധേയവുമാണ്.എലിസബത്ത് രാജ്ഞിയുടെ സ്വകാര്യ സമ്പാദ്യത്തിലെ പത്തു മില്യന്‍ പൗണ്ടാണ് വിദേശ ബാങ്കുകളില്‍ നിക്ഷേപിച്ചിരിക്കുന്നത്. കേമാന്‍ ഐലന്‍ഡ്‌സ്, ബര്‍മുഡ എന്നിവിടങ്ങളിലാണിത്.

ഇത് നിയമവിധേയമായി തന്നെയാണ് ചെയ്തിരിക്കുന്നതെങ്കിലും, ബ്രിട്ടന്റെരാജ്ഞി എന്തിന് വിദേശ രാജ്യത്തെ ബാങ്കുകളില്‍ പണം നിക്ഷേപിക്കണം എന്ന ചോദ്യം ഉയരുന്നു.