അനുമതിയില്ലാതെ ദക്ഷിണ ചൈനക്കടലില്‍ യു.എസ് യുദ്ധക്കപ്പല്‍ പ്രവേശിച്ചതില്‍ മുന്നറിയിപ്പുമായി ചൈന
അനുമതിയില്ലാതെ ദക്ഷിണ ചൈനക്കടലില്‍ യു.എസ് യുദ്ധക്കപ്പല്‍ പ്രവേശിച്ചതില്‍ ചൈനയുടെ മുന്നറിയിപ്പ്. രാജ്യത്തിന്റെ പരമാധികാരം സംരക്ഷിക്കുന്നതിന് ആവശ്യമായ നടപടി സ്വീകരിക്കുമെന്ന് ചൈന വ്യക്തമാക്കി.
ദക്ഷിണ ചൈനക്കടലിലെ ഹുയാങ്‌യാന്‍ എന്ന ദ്വീപിന് 12 നോട്ടിക്കല്‍ മൈല്‍ ദൂരത്തില്‍ അമേരിക്കന്‍ കപ്പലായ യു.എസ്.എസ് ഹോപ്പര്‍ സഞ്ചരിച്ചതായാണ് ആരോപണം. ഹുയാങ്‌യാന്‍ ചൈനയും ഫിലിപ്പീന്‍സും തമ്മില്‍ അവകാശത്തര്‍ക്കമുള്ള ദ്വീപാണ്. ഇവിടെ സഞ്ചരിക്കണമെങ്കില്‍ തങ്ങളുടെ അനുവാദം വേണമെന്നാണ് ചൈനയുടെ വാദം. ഇത് ലംഘിച്ചതായി ചൂണ്ടിക്കാട്ടിയാണ് യു.എസിനെതിരെ രംഗത്തുവന്നിരിക്കുന്നത്.
ചൈനയുടെ പരമാധികാരത്തെയും സുരക്ഷ താല്‍പര്യങ്ങളെയും യു.എസ് കപ്പല്‍ ലംഘിച്ചിരിക്കയാണ്. ഇവിടെയുള്ള ചൈനയുടെ കപ്പലുകള്‍ക്കും സുരക്ഷ ഉദ്യോഗസ്ഥര്‍ക്കും ഭീഷണിയാണിത്. അന്താരാഷ്ട്ര ബന്ധത്തിന്റെ അടിസ്ഥാന തത്ത്വത്തിന്റെ ലംഘനവുമാണ്. ചൈന ഇക്കാര്യത്തില്‍ അസംതൃപ്തിയിലാണ്അദ്ദേഹം കൂട്ടിച്ചേര്‍ത്തു.
ദക്ഷിണ ചൈനക്കടലിലെ വിവിധ ദ്വീപുകളുടെയും പ്രദേശങ്ങളുടെയും കാര്യത്തില്‍ ചൈനയും വിവിധ രാജ്യങ്ങളും തമ്മില്‍ തര്‍ക്കമുണ്ട്. ഫിലിപ്പീന്‍സ്, വിയറ്റ്‌നാം, മലേഷ്യ, ബ്രൂണെ, തായ്‌വാന്‍ എന്നീ രാജ്യങ്ങള്‍ക്കും ഈ പ്രദേശത്ത് അവകാശവാദമുണ്ട്.
എന്നാല്‍, ഇത് പരിഗണിക്കാതെ ചൈന സുരക്ഷ സജ്ജീകരണങ്ങള്‍ ശക്തമാക്കിയിട്ടുണ്ട്. ധാരാളം ചരക്കുനീക്കം നടക്കുന്ന പ്രദേശം ചൈനയുടെ നിയന്ത്രണത്തിലാവുന്നത് തടയല്‍ യു.എസ് നയമാണ്. ഇക്കാര്യത്തില്‍ ഇരു രാജ്യങ്ങളും തമ്മിലുള്ള വാക്തര്‍ക്കം നേരത്തെയുമുണ്ടായിട്ടുണ്ട്.
https://www.facebook.com/Malayalivartha
