കേരളത്തില് കപ്പല് നിര്മ്മാണ ശാല സ്ഥാപിക്കാന് ടാറ്റ ഗ്രൂപ്പ് താത്പര്യം പ്രകടിപ്പിച്ചതായി മുഖ്യമന്ത്രി
കേരളത്തില് കപ്പല് നിര്മ്മാണ ശാല സ്ഥാപിക്കാന് ടാറ്റ ഗ്രൂപ്പ് താത്പര്യം പ്രകടിപ്പിച്ചതായി മുഖ്യമന്ത്രി വി.ഡി. സതീശന്. 100 കോടി ഡോളര് (ഏകദേശം 10000 കോടി രൂപ) നിക്ഷേപിക്കാനുള്ള പദ്ധതിക്ക് ടാറ്റ ഗ്രൂപ്പ് അനുമതി തേടിയതായി വി.ഡി. സതീശന് പറഞ്ഞു.
ബ്ലൂംബര്ഗിന് നല്കിയ അഭിമുഖത്തിലാണ് അദ്ദേഹം ഇക്കാര്യം വെളിപ്പെടുത്തിയത്. ടാറ്റയുടെ നിര്ദ്ദേശം സര്ക്കാര് ഗൗരവമായി പരിഗണിക്കുകയാണെന്നും ഒരു മാസത്തിനുള്ളില് അന്തിമ തീരുമാനം എടുക്കുമെന്നും മുഖ്യമന്ത്രി പറഞ്ഞു. പദ്ധതിക്ക് ആവശ്യമായ സ്ഥലം സര്ക്കാര് വിട്ടുനല്കുമെന്നും മുഖ്യമന്ത്രി അഭിമുഖത്തില് വ്യക്തമാക്കി.
കപ്പല് നിര്മ്മാണ മേഖലയിലേക്ക് ആദ്യമായാണ് ടാറ്റ ഗ്രൂപ്പ് കടക്കുന്നത്. വിഴിഞ്ഞത്തെയും കൊച്ചിയിലെയും തുറമുഖങ്ങള്ക്ക് സമീപം കപ്പല് നിര്മ്മാണം, അനുബന്ധ സേവനങ്ങള് എന്നിവയ്ക്ക് കേരളം പദ്ധതി ആവിഷ്കരിക്കുന്നുണ്ട്. കൂടുതല് തുറമുഖങ്ങള് നിര്മ്മിക്കാനും തിരുവനന്തപുരം, കൊല്ലം, ആലപ്പുഴ ജില്ലകള് കേന്ദ്രീകരിച്ച് പുതിയ സമുദ്ര പാത പദ്ധതി കേരളം ലക്ഷ്യമിടുന്ന വേളയിലാണ് കപ്പല് നിര്മ്മാണ ശാലയുമായി ടാറ്റ വരുന്നത്. അതേസമയം ഇക്കാര്യത്തില് ടാറ്റയുടെ ഔദ്യോഗിക പ്രതികരണം വന്നിട്ടില്ല.
അതിനിടെ വിഴിഞ്ഞം തുറമുഖവുമായി ബന്ധപ്പെട്ട അദാനി ഗ്രൂപ്പിന്റെ ഓഹരിയില് ഒരുഭാഗം ആഗോളകപ്പല് കമ്പനിയായ എം.എസ്.സിക്ക് വിറ്റുവെന്ന റിപ്പോര്ട്ടുകള് പുറത്തുവന്നിരുന്നു. അദാനിയും എം.എസ്.സിയും തമ്മിലുള്ള കരാര് നിലവില് സര്ക്കാരിന്റെ പരിഗണനയിലാണ്.
https://www.facebook.com/Malayalivartha
