കാബൂള് സൈനിക അക്കാഡമിയില് ഐഎസ് ആക്രമണം; 11 മരണം
കാബൂളിലെ സൈനിക അക്കാഡമിയെ ലക്ഷ്യമിട്ട് ഐഎസ് ഭീകരര് തിങ്കളാഴ്ച പുലര്ച്ചെ നടത്തിയ ചാവേര് ആക്രമണത്തില് 11 അഫ്ഗാന് സൈനികര് കൊല്ലപ്പെട്ടു. 16 പേര്ക്കു പരിക്കേറ്റു. ഒരാഴ്ചയ്ക്കുള്ളിലുണ്ടാവുന്ന നാലാമത്തെ വന് ആക്രമണമാണിത്. കാബൂളിലെ മാര്ഷല് ഫാഹിം സൈനിക അക്കാഡമിയില് നടത്തിയ ആക്രമണത്തിന്റെ ഉത്തരവാദിത്വം ഐഎസ് ഏറ്റെടുത്തു. ആക്രമണം നടത്തിയ അഞ്ചു ചാവേറുകളില് രണ്ടു പേരെ സുരക്ഷാ സൈനികര് വെടിവച്ചുകൊന്നു. മറ്റു രണ്ടു പേര് സ്ഫോടനത്തില് മരിച്ചു. അഞ്ചാമനെ സ്ഫോടകവസ്തുനിറച്ച ബെല്റ്റ് സഹിതം കസ്റ്റഡിയിലെടുത്തു.
സ്ഫോടകവസ്തു നിറച്ച ആംബുലന്സ് ഉപയോഗിച്ചു ശനിയാഴ്ച കാബൂളില് ഭീകരര് നടത്തിയ ആക്രമണത്തില് 103 പേര്ക്കു ജീവഹാനി നേരിടുകയും 235 പേര്ക്കു പരിക്കേല്ക്കുകയും ചെയ്തിരുന്നു. ഇതിന്റെ ഞെട്ടലില്നിന്നു രാജ്യം വിമുക്തമാവുന്നതിനു മുന്പുതന്നെ ഭീകരര് വീണ്ടും ആഞ്ഞടിച്ചത് അഫ്ഗാന് സര്ക്കാരിന്റെ സുരക്ഷാവീഴ്ചയായി കണക്കാക്കപ്പെടുന്നു.
ആംബുലന്സ് ആക്രമണത്തിന്റെ ഉത്തരവാദിത്വം താലിബാന് ഏറ്റെുടുത്തിരുന്നു. ഏതാനും ദിവസം മുന്പു കാബൂളിലെ ഇന്റര്കോണ്ടിനെന്റല് ഹോട്ടലില് താലിബാന് നടത്തിയ മറ്റൊരാക്രമണത്തില് 14 വിദേശികള് ഉള്പ്പെടെ 22 പേര്ക്കു ജീവാനി നേരിട്ടു. മാര്ഷല് ഫാഹിം സൈനിക അക്കാഡമിയിലെ ചാവേര് ആക്രമണത്തിനു ശേഷം മണിക്കൂറുകള്ക്കകം ഇന്തോനേഷ്യന് പ്രസിഡന്റ് ജോക്കോ വിഡോഡോ കാബൂളില് സന്ദര്ശനത്തിനെത്തുകയുണ്ടായി.
പാക്കിസ്ഥാനിലെ സന്ദര്ശനത്തിനുശേഷമാണു വിഡോഡോ അഫ്ഗാനിസ്ഥാനിലെത്തിയത്.
അഫ്ഗാനിസ്ഥാനില് സമാധാനം സ്ഥാപിക്കുന്നതിനുള്ള ശ്രമങ്ങളുടെ ഭാഗമായി ഇന്തോനേഷ്യ, പാക്കിസ്ഥാന്, അഫ്ഗാനിസ്ഥാന് എന്നിവിടങ്ങളില്നിന്നുള്ള മതപണ്ഡിതരുടെ നേതൃത്വത്തില് കമ്മിറ്റി രൂപീകരിക്കണമെന്ന് വിഡോഡോ പാക് സന്ദര്ശനവേളയില് നിര്ദേശിച്ചു.
https://www.facebook.com/Malayalivartha
