സുഹൃത്തുക്കള്‍ക്ക് ബാച്ചിലേഴ്‌സ് പാര്‍ട്ടി നല്‍കാനാണ് മിന ബസ്‌റന്‍ എന്ന 28കാരി ദുബൈയിലെത്തിയത്. ഷാര്‍ജയില്‍ നിന്ന് പുറപ്പെട്ട വിമാനത്തിലാണ് മിന സുഹൃത്തുക്കളായ ഏഴു പേരോടൊപ്പം യാത്ര തിരിച്ചത്. അച്ഛന്‍ ഹുസൈന്റെ ഉടമസ്ഥതയിലുള്ള സ്വകാര്യ ജെറ്റിലാണ് ഇവര്‍ പാര്‍ട്ടി ആഘോഷത്തിന് ദുബൈയിലേക്ക് പറന്നത്. സുഹൃത്തുക്കള്‍ക്കൊപ്പം പാര്‍ട്ടി ആഘോഷിച്ച് മടങ്ങവെയാണ് മിന ഉള്‍പ്പെടയുള്ളവര്‍ ആ ദുരന്തത്തിന് കീഴടങ്ങിയത്.

പാര്‍ട്ടി കഴിഞ്ഞ് മടങ്ങവെയാണ് ഷാര്‍ജയില്‍ നിന്നു പുറപ്പെട്ട സ്വകാര്യ തുര്‍ക്കി വിമാനം ഇറാനില്‍ തകര്‍ന്നു വീഴുകയും വിമാനത്തിലുണ്ടായിരുന്നവരെല്ലാം മരിക്കുകയും ചെയ്തത്. വിമാന ജീവനക്കാര്‍ ഉള്‍പ്പെടെ 11 പേരാണ് അപകടത്തില്‍ മരിച്ചത്. എല്ലാവരും സ്ത്രീകളായിരുന്നു.

ഹുസൈന്റെ രണ്ടു മക്കളില്‍ ഒരാളാണ് മിന. ആഡംബര ജീവിതം നയിച്ചിരുന്ന മിന തന്റെ ചിത്രങ്ങള്‍ സമൂഹമാധ്യമങ്ങളില്‍ സ്ഥിരമായി പങ്കുവെയ്ക്കാറുണ്ടായിരുന്നു. ബാച്ചിലര്‍ പാര്‍ട്ടി ആഘോഷിക്കാന്‍ ദുബൈയിലെത്തിയ മിനയുടെയും സുഹൃത്തുക്കളുടെയും ചിത്രങ്ങള്‍ ഇന്‍സ്റ്റഗ്രാമില്‍ പോസ്റ്റ് ചെയ്തിട്ടുണ്ട്. അപകടത്തില്‍പ്പെട്ട സ്വകാര്യ വിമാനത്തില്‍ വെച്ച് എടുത്ത ചിത്രങ്ങളും ഇക്കൂട്ടത്തിലുണ്ട്. മൂന്നു ദിവസത്തെ ആഘോഷമായിരുന്നു ഇവിടെ. ആഘോഷത്തിനു ശേഷം ഷാര്‍ജയില്‍ നിന്നാണ് സംഘം ഇസ്താംബുള്ളിലേക്ക് തിരിച്ചുപോയതെന്നും റിപ്പോര്‍ട്ടില്‍ പറയുന്നു.

ഞായറാഴ്ച പുലര്‍ച്ചെ 5.16ന് പുറപ്പെട്ട ജെറ്റ് 7.30 മുതല്‍ യുഎഇ വ്യോമ മേഖലയില്‍ നിന്നു പുറത്തുകടന്ന ശേഷം റഡാറില്‍ നിന്ന് അപ്രത്യക്ഷമാവുകയായിരുന്നു. മോശം കാലാവസ്ഥയെ തുടര്‍ന്ന് തെക്കന്‍ ഇറാനിലെ മലനിരകളിലാണു വിമാനം തകര്‍ന്നതെന്ന് ഇറാനിയന്‍ ടെലിവിഷന്‍ റിപ്പോര്‍ട്ട് ചെയ്തു. തകരുന്നതിനു മുന്‍പു വിമാനത്തിന്റെ ഒരു എന്‍ജിനു തീപിടിച്ചിരുന്നുവെന്നു ദൃക്‌സാക്ഷികള്‍ പറഞ്ഞു.

ഏപ്രില്‍ 14നാണ് ബിസിനസുകാരനായ മുറാത് ജെന്‍സറുമായുള്ള മിനയുടെ വിവാഹം ഉറപ്പിച്ചിരുന്നത്. അതിന് കാത്തുനില്‍ക്കാതെയാണ് മിനയുടെ മരണം സംഭവിച്ചത്. പിതാവിന്റെ ബിസിനസുകള്‍ മകളെ ഏല്‍പ്പിക്കാനും തീരുമാനിച്ചിരുന്നുവെന്നാണ് റിപ്പോര്‍ട്ടുകള്‍. കെട്ടിടനിര്‍മാണം, ടൂറിസം, ഏവിയേഷന്‍, ഹോട്ടലുകള്‍, ഭക്ഷണം, ഊര്‍ജം തുടങ്ങി വിവിധ മേഖലകളില്‍ വമ്പന്‍ ബിസിനസ് നടത്തുന്നയാളാണ് മിനയുടെ പിതാവ്.