ചുങ്കം ചുമത്തി ട്രംപ്; വാണിജ്യയുദ്ധം വരുമെന്ന് ആശങ്ക; യൂറോപ്യന്‍ ഉല്‍പന്നങ്ങള്‍ക്ക് ഇനിമുതല്‍ ഇറക്കുമതിചുങ്കം; തിരിച്ചടിക്കുമെന്ന് രാജ്യങ്ങള്‍
യൂറോപ്യന്‍ രാജ്യങ്ങളില്‍നിന്നും കാനഡ, മെക്‌സിക്കോ എന്നിവിടങ്ങളില്‍ നിന്നുമുള്ള സ്റ്റീല്‍, അലൂമിനിയം ഉല്‍പന്നങ്ങള്‍ക്ക് ഇറക്കുമതിച്ചുങ്കം ഏര്‍പ്പെടുത്തി യുഎസ് പ്രസിഡന്റ് ഡോണള്‍ഡ് ട്രംപ്. അമേരിക്കന്‍ ഉത്പന്നങ്ങള്‍ക്ക് ഇറക്കുമതിച്ചുങ്കം ഏര്‍പ്പെടുത്തി തിരിച്ചടിക്കുമെന്ന് രാജ്യങ്ങള്‍ പ്രതികരിച്ചു. യൂറോപ്പും അമേരിക്കയും തമ്മില്‍ വാണിജ്യയുദ്ധം ഉണ്ടാവുമോ എന്ന ആശങ്കയും ഉയര്‍ന്നു.
ജൂണ്‍ ഒന്നുമുതലാണ് സ്റ്റീലിന് 25%, അലൂമിനിയത്തിന് 10% എന്നിങ്ങനെ ഇറക്കുമതിച്ചുങ്കം ഏര്‍പ്പെടുത്തിയത്. അമേരിക്കന്‍ ഉത്പന്നങ്ങളായ ഹാര്‍ലി ഡേവിഡ്‌സണ്‍ ബൈക്ക് മുതല്‍ ബോര്‍ബോണ്‍ വിസ്‌കി വരെ തങ്ങളും ഇറക്കുമതിച്ചുങ്കം ഏര്‍പ്പെടുത്തുമെന്ന് യൂറോപ്യന്‍ വാണിജ്യമന്ത്രിമാര്‍ പ്രസ്താവിച്ചു. കാനഡയാകട്ടെ നിരവധി അമേരിക്കന്‍ ഉത്പന്നങ്ങള്‍ക്ക് ഇറക്കുമതിച്ചുങ്കം ബദലായി ഏര്‍പ്പെടുത്തി. അമേരിക്കയില്‍ നിന്നു വരുന്ന ബീഫ്, കോഫി, പ്‌ളൈവുഡ്, മിഠായി തുടങ്ങിയവയ്ക്കും സ്റ്റീലിനും അലൂമിനിയത്തിനുമാണ് ഇറക്കുമതിച്ചുങ്കം.
അമേരിക്കന്‍ പന്നിയിറച്ചി, സോസേജ്, ആപ്പിള്‍, മുന്തിരി, ചീസ്, പോര്‍ക്ക്, സ്റ്റീല്‍ ഷീറ്റ് എന്നിവയ്ക്ക് ഇറക്കുമതിച്ചുങ്കം ഏര്‍പ്പെടുത്തുമെന്ന് മെക്‌സിക്കോയും അറിയിച്ചു. ലോകവാണിജ്യ സംഘടനയില്‍ (ഡബ്ല്യുടിഒ) അമേരിക്കന്‍ നടപടിക്കെതിരെ കേസ് കൊടുക്കാനൊരുങ്ങുകയാണ് യൂറോപ്പ്. രാജ്യാന്തര വാണിജ്യ നിയമങ്ങളുടെ ലംഘനമാണ് യുഎസ് നടത്തിയതെന്നാണു വാദം. ഏതൊക്കെ അമേരിക്കന്‍ ഉത്പന്നങ്ങള്‍ക്ക് ബദല്‍ ഇറക്കുമതി ചുങ്കം ഏര്‍പ്പെടുത്തണമെന്ന് യൂറോപ്യന്‍ യൂണിയന്‍ (ഇയു) തീരുമാനമെടുത്തിട്ടില്ല.
https://www.facebook.com/Malayalivartha
