കിം ജോങ് ഉന്നും ട്രംപും തമ്മിലുള്ള ഉച്ചകോടിക്കുള്ള നീക്കങ്ങള്‍ ശക്തമായതിനിടെ ഇരുകൊറിയകളും കൂടുതല്‍ ചര്‍ച്ചകള്‍ക്കു തയാറെടുക്കുകയാണ്. സൈനികതലത്തിലുള്ള ചര്‍ച്ച ജൂണ്‍16ന് പാന്‍മുന്‍ജോമില്‍ നടക്കുമെന്നു കൊറിയന്‍ ഏകീകരണ മന്ത്രാലയം സിയൂളില്‍ അറിയിച്ചു. ഇരുരാജ്യങ്ങളിലെയും റെഡ്‌ക്രോസ് ഉദ്യോഗസ്ഥര്‍ ജൂണ്‍ 22ന് ഉത്തരകൊറിയയിലെ ഡയമണ്ട് മൗണ്ടന്‍ റിസോര്‍ട്ടില്‍ യോഗം ചേരും. സ്‌പോര്‍ട്‌സ് ഉദ്യോഗസ്ഥരുടെ യോഗം ജൂണ്‍ 18നു പാന്‍മുന്‍ജോമില്‍ നടത്താനും തീരുമാനിച്ചിട്ടുണ്ട്. അതിര്‍ത്തിയിലെ പാന്‍മുന്‍ജോം സമാധാനഗ്രാമത്തില്‍ ഇന്നലെ രണ്ടു രാജ്യങ്ങളുടെയും ഉദ്യോഗസ്ഥര്‍ പങ്കെടുത്ത യോഗത്തിലാണ് ഈ തീരുമാനങ്ങള്‍ ഉണ്ടായത്.

1950-53 കാലത്തെ കൊറിയന്‍ യുദ്ധത്തെത്തുടര്‍ന്നു വിഭജിക്കപ്പെട്ടുപോയ കുടുംബങ്ങള്‍ക്ക് വീണ്ടും കണ്ടുമുട്ടുന്നതിന് അവസരമൊരുക്കുന്നതിനും മേഖലയിലെ സംഘര്‍ഷം ലഘൂകരിക്കുന്നതിനും സൈനിക, റെഡ്‌ക്രോസ്തല ചര്‍ച്ചകള്‍ വഴിതെളിക്കുമെന്നു കരുതപ്പെടുന്നു. ഇരു കൊറിയകളും തമ്മിലുള്ള പരസ്പര വിശ്വാസം വളര്‍ത്തേണ്ടത് ഏറെ ആവശ്യമാണെന്ന് ദക്ഷിണകൊറിയ ചൂണ്ടിക്കാട്ടി. ഇരുകൊറിയകളും സംയുക്തമായി നടത്തിയിരുന്ന കെയ്‌സോംഗിലെ വ്യവസായസമുച്ചയത്തില്‍ പുതിയ ലെയ്‌സണ്‍ ഓഫീസ് തുറക്കുന്ന കാര്യത്തിലും ധാരണയായിട്ടുണ്ടെന്ന് സിയൂളിലെ ഏകീകരണ മന്ത്രാലയം അറിയിച്ചു. ഉത്തരകൊറിയ ആണവപരീക്ഷണം നടത്തിയതിനെത്തുടര്‍ന്ന് 2016 ഫെബ്രുവരിയിലാണ് ഈ ഫാക്ടറിസമുച്ചയം അടച്ചുപൂട്ടിയത്.