ടുണീഷ്യയില്‍ അഭയാര്‍ഥി കപ്പല്‍ തകര്‍ന്നുണ്ടായ അപകടത്തില്‍ മരിച്ചവരുടെ എണ്ണം 112 ആയി. പുതിയ നാവിക പാതയിലൂടെ സഞ്ചരിക്കവേയാണ് കപ്പല്‍ അപകടത്തില്‍പ്പെട്ടതെന്നാണ് വിവരം. 180 പേരാണ് കപ്പലിലുണ്ടായിരുന്നത്. ബാക്കിയുള്ള യാത്രക്കാരെ തീരസംരക്ഷണ സേന രക്ഷപ്പെടുത്തി. കപ്പലിലുണ്ടായിരുന്ന 180ല്‍ 100 പേരും ടുണീഷ്യന്‍ സ്വദേശികളായിരുന്നു. 

ഇന്റര്‍നാഷണല്‍ ഓര്‍ഗനൈസേഷന്‍ ഓഫ് മൈഗ്രേഷന്‍ (ഐഒഎം) ആണ് ഇത് സംബന്ധിച്ച വിവരം പുറത്ത് വിട്ടത്. തൊഴില്‍ രഹിതരായ ടുണീഷ്യക്കാരും മറ്റ് ആഫ്രിക്കന്‍ വംശജരും ഇത്തരത്തില്‍ കടല്‍ കടന്നാണ് യൂറോപ്യന്‍ രാജ്യങ്ങളില്‍ അഭയം തേടുന്നത്. 32,000ലേറെ ആളുകളാണ് കടല്‍ മാര്‍ഗം യൂറോപ്പിലെത്തിയത്. 660 പേരാണ് ഇത്തരം യാത്രകളില്‍ മരണപ്പെട്ടതെന്നാണ് കണക്ക്.