കതിരൂരില്‍ ആര്‍.എസ്.എസ്. നേതാവ് മനോജ് വധിക്കപ്പെട്ട കേസില്‍ പ്രതി വിക്രമന് ശസ്ത്രക്രിയ നടത്തി തെളിവു ശേഖരിയ്ക്കുന്നത് അപൂര്‍വ സംഭവമാകുന്നു. കുറ്റകൃത്യത്തില്‍ പങ്കാളിയാണെന്ന് തെളിയിക്കാന്‍ പ്രതിയുടെ ശരീരത്തില്‍ തുളച്ചു കയറിയ ഇരുമ്പാണിക്ക് സമാനമായ വസ്തു ശസ്ത്രക്രിയയിലൂടെ പുറത്തെടുത്ത് അത് തൊണ്ടിയായി രേഖപ്പെടുത്തുന്നത് കേസില്‍ നിര്‍ണായക തെളിവാകുമെന്ന് കണ്ടാണ് ക്രൈംബ്രാഞ്ച് കോടതി വഴി ശസ്ത്രക്രിയക്ക് അനുമതി നേടിയത്. ഒമ്‌നി വാന്‍ ഓടിച്ചു വന്ന മനോജിനെ ബോംബെറിഞ്ഞശേഷമാണ് കൊല നടത്തിയതെന്നാണ് പോലീസിന്റെ കണ്ടെത്തല്‍.
ബോംബു സ്‌ഫോടനത്തില്‍ വിക്രമന് പരിക്കേറ്റിരുന്നു. എക്‌സ്‌റേ പരിശോധനയില്‍ വിക്രമന്റെ വലതു കാലില്‍ ബോംബിന്റെ അവശിഷ്ടമുണ്ടെന്ന് കണ്ടെത്തി. കോഴിക്കോട് മെഡിക്കല്‍ കോളേജില്‍ നടത്തിയ ഫോറന്‍സിക് പരിശോധനയിലും വിക്രമന് പരിക്കേറ്റത് ബോംബു സ്‌ഫോടനത്തിലാണെന്ന് സ്ഥിതീകരിച്ചിരുന്നു.
ബോംബു നിര്‍മ്മിച്ചതും വിക്രമന്‍ തന്നെയാണെന്ന് ക്രൈംബ്രാഞ്ചിന് വിവിരം ലഭിച്ചിട്ടുണ്ട്. കുറ്റാന്വേഷണത്തില്‍ തെളിവു ശേഖരണത്തിന് നിരവധി മാര്‍ഗ്ഗങ്ങള്‍ സ്വീകരിക്കാറുണ്ടെങ്കിലും പ്രതിയെ ശസ്ത്രക്രീയ നടത്തി തെളിവിനുള്ള വസ്തുശേഖരിയ്ക്കുന്നത് അപൂര്‍വങ്ങളില്‍ അപൂര്‍വമാണെന്ന് കുറ്റാന്വേഷണ വിദഗ്ധര്‍ പറയുന്നു.
കണ്ണൂര്‍ ജില്ലാശുപത്രിയില്‍ ശസ്ത്രക്രിയ നടത്താനാണ് തീരുമാനം. അതേ സമയം കൊലക്കേസ് അന്വേഷണം ഏറ്റെടുക്കുന്നതിന്റെ ഭാഗമായി സി.ബി.ഐ. ഉദ്യോഗസ്ഥര്‍ അടുത്ത ദിവസം തലശ്ശേരിയിലെത്തുമെന്ന് അറിയുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha