കേരള പ്രോ. വി.സിയുടെ വീടിനുനേരെ ആക്രമണം
കേരള സര്വകലാശാല പ്രോവൈസ് ചാന്സലര് വീരമണികണ്ഠന്റെ വട്ടിയൂര്ക്കാവ് വയലിക്കട മൂന്നാംമൂട് ഹരിതനഗറിലെ \'ദേവധേയം\' വീടിനുനേരെ അക്രമണം. ഇന്നുപുലര്ച്ചെ പന്ത്രണ്ടരയ്ക്കും ഒരു മണിയ്ക്കും ഇടയിലായിരുന്നു ആക്രമണം ഉണ്ടായത്. സംഭവസമയം വീരമണികണ്ഠന് വീട്ടിലുണ്ടായിരുന്നില്ല. ഡല്ഹിയില് ഔദ്യോഗികാവശ്യത്തിന് പോയ അദ്ദേഹം മടങ്ങിവരവെ അസുഖബാധിതയായ മാതാവിനെ കാണാന് തൃശൂരില് ഇറങ്ങി. വീട്ടില് ഭാര്യയും രണ്ടുമക്കളും മാത്രമാണ് ഈ സമയം വീട്ടില് ഉണ്ടായിരുന്നത്. രാത്രിയില് ശബ്ദം കേട്ടെങ്കിലും പേടിച്ച് വീട്ടുകാര് പുറത്തിറങ്ങിയില്ല. ഇന്നുരാവിലെ ഏഴുമണിയോടെ പുറത്തിറങ്ങി പരിശോധിച്ചപ്പോഴാണ് ആക്രമണം നടന്നതായി മനസിലായത്. വിവരം ഉടന് ഹരിത നഗര് റസിഡന്റ്സ് അസോസിയേഷന് ഭാരവാഹികളെ അറിയിച്ചു. അവര് അറിയിച്ചതനുസരിച്ച് വട്ടിയൂര്ക്കാവ് പൊലീസ് സ്ഥലത്തെത്തി തുടര്നടപടികള് സ്വീകരിച്ചു. വീട്ടുമുറ്റത്തുനിന്നും അക്രമികള് എറിയാന് ഉപയോഗിച്ച കല്ലുകള് പൊലീസ് കണ്ടെടുത്തിട്ടുണ്ട്. വീടിനുമുന്നില് പാര്ക്കുചെയ്തിരുന്ന മാരുതി സെന് കാറാണ് തകര്ന്നത്.
കല്ലേറില് വീടിന്റെ മുകള്നിലയിലെ ജനല് ഗ്ലാസുകള് തകര്ന്നു. വീടിനുമുന്നില് പാര്ക്ക് ചെയ്തിരുന്ന കാറിന്റെ പിന്ഭാഗത്തെ ഗ്ലാസും പൂര്ണമായി തകര്ന്നിട്ടുണ്ട്. സംഭവത്തെക്കുറിച്ച് അസിസ്റ്റന്റ് കമ്മീഷ്ണര് അന്വേഷിക്കുമെന്നാണ് അറിയുന്നത്.
https://www.facebook.com/Malayalivartha
