പത്തനംതിട്ടയിൽ നിന്ന്​ കാണാതായ കോളജ് വിദ്യാര്‍ഥിനി ജെസ്‌ന മറിയ ജെയിംസി​​ന്റെ തിരോധാനത്തിൽ സി.ബി.ഐ അന്വേഷണം​ ആവശ്യപ്പെട്ട്​ സമർപ്പിച്ച ഹർജി ഹൈകോടതി ഇന്ന് പരിഗണിക്കും. കേസ് സി.ബി.​ഐ.ക്കു വിടണമെന്നാവശ്യപ്പെട്ട് ജെസ്​നയുടെ സഹോദരന്‍ ജെയ്‌സ് ജോണ്‍ ജെയിംസും കെ.എസ്​.യു സംസ്ഥാന പ്രസിഡൻറ്​ കെ.എം. അഭിജിത്തും നൽകിയ ഹർജിയാണ് ഹൈകോടതി പരിഗണിക്കുന്നത്.

മാര്‍ച്ച് 22 നാണ് കോട്ടയം കാഞ്ഞിരപ്പളളി സ​​െൻറ്​ ഡൊമിനിക്‌സ് കോളജ് രണ്ടാംവര്‍ഷ ബി.കോം വിദ്യാർഥിനി ആയിരുന്ന ജെസ്‌നയെ കാണാതാകുന്നത്. ജെസ്നയെ കണ്ടെത്താൻ വിവിധ തലങ്ങളിൽ പൊലീസ് അന്വേഷണം നടത്തിയിട്ടും ഫലമുണ്ടായിരുന്നില്ല. തുടർന്നാണ് സഹോദരൻ സി.ബി.ഐ അന്വേഷണം ആവശ്യപ്പെട്ട് ഹർജി നൽകിയത്.

സംഭവം സംബന്ധിച്ച്​ നിർണായക വിവരങ്ങൾ ലഭിച്ചിട്ടുണ്ടെന്ന്​ കഴിഞ്ഞ മാസം സർക്കാർ ഹൈകോടതിയെ അറിയിച്ചിരുന്നു. അന്വേഷണത്തിലെ നിർണായക കണ്ടെത്തലുകൾ പരസ്യമാക്കാനാവില്ലെന്ന് വ്യക്തമാക്കിയ സർക്കാർ, ഇതു സംബന്ധിച്ച റിപ്പോർട്ട്​ ഗവ. പ്ലീഡർ മുഖേന മുദ്രവെച്ച കവറിൽ കോടതിക്ക്​ സമർപ്പിക്കുകയായിരുന്നു.