രാഹുല് മാങ്കൂട്ടത്തില് നാളെ പാലക്കാട്ട് വോട്ട് ചെയ്യാനെത്തിയേക്കും
ലൈംഗിക പീഡനക്കേസില് മുന്കൂര് ജാമ്യം ലഭിച്ചതിന് പിന്നാലെ ഒളിവില് കഴിയുന്ന രാഹുല് മാങ്കൂട്ടത്തില് എംഎല്എ നാളെ വോട്ട് ചെയ്യാന് പാലക്കാട്ടേക്ക് എത്തിയേക്കുമെന്ന് വിവരം. പാലക്കാട് നഗരസഭയിലെ കുന്നത്തൂര്മേട് സൗത്തിലെ സെന്റ് സെബാസ്റ്റ്യന്സ് സ്കൂളിലെ ബൂത്ത് നമ്പര് രണ്ടിലാണ് രാഹുലിന് വോട്ട്. രാഹുല് താമസിക്കുന്ന ഫ്ളാറ്റ് ഈ വാര്ഡിലാണ്. കോണ്ഗ്രസിന്റെ സിറ്റിംഗ് സീറ്റാണിത്.
ബംഗളൂരു സ്വദേശിയായ യുവതി നല്കിയ പീഡനക്കേസില് മുന്കൂര് ജാമ്യം ലഭിച്ചതിന് പിന്നാലെയാണ് രാഹുല് ഒളിവുജീവിതം അവസാനിപ്പിക്കുന്നത്. തിരുവനന്തപുരം പ്രിന്സിപ്പല് സെഷന്സ് കോടതിയാണ് ഹര്ജി പരിഗണിച്ച് ഉപാധികളോടെ ജാമ്യം അനുവദിച്ചത്. എല്ലാ തിങ്കളാഴ്ചയും അന്വേഷണ സംഘത്തിന് മുന്നില് ഹാജരാക്കണം, സാക്ഷികളെ സ്വാധീനിക്കരുത് എന്നിവയാണ് ഉപാധികള്.
രാഹുല് മാങ്കൂട്ടത്തിലിനെതിരായ ആദ്യത്തെ കേസില് ഹൈക്കോടതി അറസ്റ്റ് ചെയ്യുന്നത് വിലക്കിയിരുന്നു. ഈ കേസില് വാദം നടക്കുന്നതിനിടെയാണ് രണ്ടാമത്തെ കേസ് രജിസ്റ്റര് ചെയ്തത്. കെപിസിസിക്ക് വന്ന ഇ മെയില് പരാതി പൊലീസിന് കൈമാറുകയായിരുന്നു. കേസില് പരാതിക്കാരി മൊഴി നല്കിയിരുന്നു. എസ് പി പുങ്കൂഴലിയാണ് മൊഴി രേഖപ്പെടുത്തിയത്. രക്ഷപ്പെടാന് കരഞ്ഞ് കാലുപിടിച്ചിട്ടും ബലാത്സംഗം ചെയ്തുവെന്നാണ് മൊഴി. പല പ്രാവശ്യം ഭീഷണിപ്പെടുത്തിയെന്നും പേടി കാരണമാണ് ഇത്രയും നാള് പുറത്ത് പറയാതിരുന്നതെന്നുമാണ് പരാതിക്കാരിയുടെ മൊഴിയില് പറയുന്നത്.
https://www.facebook.com/Malayalivartha
