കീ കി ചലഞ്ചുകാരെ തട്ടി സോഷ്യല്‍ മീഡിയയില്‍ നടക്കാന്‍ കഴിയാത്ത അവസ്ഥയാണ്. സംഗതി കേള്‍ക്കുമ്പോള്‍ നല്ല രസമൊക്കെ തോന്നുമെങ്കിലും ചാലഞ്ച് അല്‍പ്പം അപകടം പിടിച്ചതാണെന്ന് പറയേണ്ടതില്ലല്ലോ? ഓടിക്കൊണ്ടിരിക്കുന്ന വാഹനത്തില്‍ നിന്നും പുറത്തിറങ്ങി ഡാന്‍സ് കളിക്കുന്നതാണ് കീ കീ ചലഞ്ച് രീതി. അപകടം പിടിച്ച ഈ കളിക്ക് മുന്നിട്ടിറങ്ങുന്നവരെ പൂട്ടാന്‍ നിയമ പാലകരും രംഗത്തിറങ്ങിയിട്ടുണ്ട്.

ഇപ്പോഴിതാ കണ്ടു പരിചയിച്ച കീകീ ചലഞ്ചില്‍ നിന്നും അല്‍പം അപകടം പിടിച്ചൊരു ഐറ്റം രംഗപ്രവേശം ചെയ്തിരിക്കുകയാണ്. കീകിയുടെ ഏറ്റവും പുതിയ പതിപ്പ് വിമാനത്തില്‍ നിന്ന് ഇറങ്ങി നൃത്തം ചെയ്യുന്ന പൈലറ്റുമാരുടേതാണ്. കണ്ടു നില്‍ക്കുന്നവരുടെ നെഞ്ചിടിക്കും എന്ന് പറയേണ്ടതില്ലല്ലോ വീഡിയോ 

പ്രൈവറ്റ് ജെറ്റ് പൈലറ്റായ യുവതിയാണ് വിമാനത്തില്‍ ഓടിയിറങ്ങി കീകി ചലഞ്ച് നടത്തുന്നത്. കൂട്ടിനായി ഫ്‌ളൈറ്റ് അറ്റന്‍ഡന്റുമുണ്ട്. പൈലറ്റ് വിമാനത്തിന്റെ കോക്പിറ്റില്‍ നിന്ന് റണ്‍വേയിലിറങ്ങുന്നത് വീഡിയോയിലുണ്ട്. സമൂഹമാധ്യമങ്ങളില്‍ വൈറലാണ് ഈ കീകി ചലഞ്ച് വീഡിയോ എന്നാല്‍ വിമാനം ടാക്‌സി ചെയ്ത് വലിച്ചുകൊണ്ട് പോകുമ്പോഴായാരുന്നു എന്നു പറയുന്ന മറ്റൊരു വീഡിയോയുമുണ്ട്.

'കീകി ഡു യു ലൗ മീ, ആര്‍ യു റൈഡിങ്' എന്ന വരികള്‍ കേള്‍ക്കുമ്പോള്‍ കാറില്‍ നിന്ന് ഇറങ്ങുകയും, വാതില്‍ തുറന്ന രീതിയില്‍ പതിയേ ഓടുന്ന കാറിനൊപ്പം നൃത്തം ചെയ്യുകയുമാണ് 'കീകി' ചലഞ്ച്. കനേഡിയന്‍ റാപ്പ് ഗായകന്‍ ഓബ്രി ഡ്രേക് ഗ്രഹാമിന്റെ ' ഇന്‍ മൈ ഫീലിങ്' എന്ന ഗാനം ഇറങ്ങിയപ്പോള്‍ മുതല്‍ തന്നെ ഹിറ്റാണ്. ഗാനത്തിലെ കീകി എന്നു തുടങ്ങുന്ന വരികളാണ് ചലഞ്ചിനായി തെരഞ്ഞെടുക്കുന്നത്.

എന്നാല്‍ നടുറോഡില്‍ ചെയ്യുന്ന ഡാന്‍സ് വലിയപകടങ്ങളാണ് വരുത്തിവെയ്ക്കുന്നത്. സൗദി അടക്കമുള്ള പല രാജ്യങ്ങളും നിയമം ലംഘിച്ചുള്ള റോഡിലെ ഈ ഡാന്‍സ് നിരോധിച്ചുകഴിഞ്ഞു. ഇന്ത്യയിലേയും വിവിധ സംസ്ഥാനങ്ങളുടെ ട്രാഫിക് പൊലീസും കീകി ചലഞ്ചിനെതിരെ രംഗത്ത് വന്നിട്ടുണ്ട്.