കാസര്‍കോട് മഞ്ചേശ്വരം എം.എല്‍.എ. പി.ബി. അബ്ദുല്‍ റസാഖ്(63) നിര്യാതനായി. ഇന്ന് പുലര്‍ച്ചെ കാസര്‍കോട് കെയര്‍വെല്‍ ആശുപത്രിയില്‍ വെച്ചാണ് അന്ത്യം. ഹൃദയസംബന്ധമായ അസുഖത്തെ തുടര്‍ന്ന് ചികിത്‌സയിലായിരുന്നു.
മുസ്‌ലിംലീഗ് എം.എല്‍.എയായിരുന്ന അബ്ദുല്‍ റസാഖ് 2011 മുതല്‍ മഞ്ചേശ്വരത്തെ പ്രതിനിധീകരിക്കുന്നുണ്ട്. 2016ല്‍ ബിജെപിയിലെ കെ.സുരേന്ദ്രനെ 89 വോട്ടിന് പരാജയപ്പെടുത്തിയാണ് വീണ്ടും നിയമസഭയിലെത്തിയത്. 

1955 ഒക്ടോബര്‍ ഒന്നിന് ബീരാന്‍ മൊയ്തീന്‍ ഹാജിയുടെയും ബീഫാത്തിമയുടെയും മകനായി കാസര്‍ഗോഡ്, ചെങ്കളയിലാണ് ജനനം. മുസ്ലീം യൂത്ത് ലീഗിന്റെ ജനറല്‍ സെക്രട്ടറിയായിരുന്നു. ചെങ്കള ഗ്രാമ പഞ്ചായത്ത് പ്രസിഡന്റായും കാസര്‍ഗോഡ് ജില്ലാ പഞ്ചായത്ത് അംഗമായും പ്രവര്‍ത്തിച്ചു. നെല്ലിക്കാട്ടെ പി. ബീരാന്‍ മൊയ്തീന്‍ ഇംഗ്ലീഷ് മീഡിയം ഹയര്‍സെക്കണ്ടറി സ്‌കൂളിന്റെയും അബേദ്ക്കര്‍ എഡ്യൂക്കേഷണല്‍ ട്രസ്റ്റിന്റെയും ചെയര്‍മാനാണ്. ചെങ്കള എ.എല്‍.പി.സ്‌കൂളിന്റെയും മാനേജരായിരുന്നു.