മഞ്ചേശ്വരം എംഎല്‍എയും മുസ്ലീംലീഗ് ദേശീയ എക്‌സിക്യുട്ടീവ് അംഗവുമായ പി.ബി.അബ്ദുള്‍ റസാഖ് (63) അന്തരിച്ചതിന്റെ വേദന നിലനില്‍ക്കുമ്പോള്‍ മഞ്ചേശ്വരം നിയോജക മണ്ഡലത്തിന്റെ ഭാവി കൂടി ചര്‍ച്ചയിലാകുകയാണ്. മഞ്ചേശ്വരത്ത് നിന്നും വെറും 89 വോട്ടിന് അബ്ദുള്‍ റസാഖില്‍ നിന്ന് തോറ്റ ബിജെപി നേതാവ് കെ സുരേന്ദ്രന്റെ എംഎല്‍എ സ്വപ്നത്തിന് വീണ്ടും പൂവണിയുന്നു. ഇല്ലാത്ത പ്രവാസികളുടെ പേരില്‍ കള്ളവോട്ട് നേടി ജയിച്ചെന്ന കേസ് കോടതിയില്‍ നിലനില്‍ക്കുന്നതിനിടെ അപ്രതീക്ഷിതമായി പിബി അബ്ദുള്‍ റസാഖ് അന്തരിച്ചത്. ഇതിനിടെ പല പ്രാവശ്യം സുരേന്ദ്രന്‍ എംഎല്‍എ ആകുമെന്ന വാര്‍ത്തയും വന്നിരുന്നു. 

2011 മുതല്‍ മഞ്ചേശ്വരത്ത് നിന്നും എം.എല്‍.എയാണ് അബ്ദുള്‍ റസാഖ്. അവസാന തവണ ബി.ജെ.പിയിലെ കെ.സുരേന്ദ്രനെയാണ് പരാജയപ്പെടുത്തിയത്. വെറും 89 വോട്ടിനായിരുന്നു അവസാന തെരഞ്ഞെടുപ്പിലെ ജയം. നേരിയ ഭൂരിപക്ഷത്തിനായിരുന്നു കഴിഞ്ഞ തവണത്തെ ജയം എന്നതിനാല്‍ 2016ലെ നിയമസഭാ തിരഞ്ഞെടുപ്പ് സംബന്ധിച്ച് കെ.സുരേന്ദ്രന്റെ പരാതിയിന്‍മേലുള്ള കേസ് ഇപ്പോഴും നിലനില്ക്കുന്നുണ്ട്.

ഇപ്പോഴും കള്ളവോട്ടില്‍ ഹൈക്കോടതിയില്‍ കേസ് തുടരുകയാണ്. ഇനി ഈ കേസ് തന്നെ അപ്രസക്തമാണ്. മഞ്ചേശ്വരത്ത് പുതിയ എംഎല്‍എ അനിവാര്യമായിരിക്കുകയാണ്.

ചെര്‍ക്കളം അബ്ദുള്ള കോട്ടയാക്കിയതാണ് മഞ്ചേശ്വരം. ഇടയ്ക്ക് വിള്ളലുണ്ടാക്കി ഇടതു പക്ഷം എത്തിയപ്പോള്‍ മുസ്ലിം ലീഗ് ആകെ പ്രതിസന്ധിയിലായി. കാസര്‍ഗോഡിന്റെ രാഷ്ട്രീയം ലീഗിന് എതിരാകാനുള്ള സാധ്യത പോലും തിരിച്ചറിഞ്ഞു. കേരളത്തിന്റെ വടക്കേ അറ്റത്തെ മഞ്ചേശ്വരത്തില്‍ ബിജെപിയും എന്നും കരുത്തരായിരുന്നു. ഈ ത്രികോണ പോരിന്റെ ചൂടില്‍ ചെര്‍ക്കുളം 2006ല്‍ മൂന്നാമതായി. ഇതോടെ ലീഗിന് തിരിച്ചടി നേരിട്ടെന്ന് ഏവരും കരുതി. ഈ മൂന്നാം സ്ഥാനത്ത് നിന്ന് മഞ്ചേശ്വരത്തെ പിടിച്ചെടുക്കാന്‍ ലീഗ് കണ്ടെത്തിയ തുറുപ്പ് ചീട്ടായിരുന്നു അബ്ദുള്‍ റസാഖ്. മഞ്ചേശ്വരത്തെ സിപിഎം കോട്ടയാക്കിയെന്ന് കരുതിയ ഇടതുപക്ഷത്തെ ഞെട്ടിച്ച് ന്യൂനപക്ഷ വോട്ടുകള്‍ വീണ്ടും ലീഗ് ചിഹ്നത്തില്‍ എത്തി. 5828 വോട്ടിന് വീണ്ടും അതിര്‍ത്തി മണ്ഡലത്തെ വലതു പക്ഷത്ത് എത്തിച്ചു. 2016ല്‍ 89 വോട്ടിനും നിലനിര്‍ത്തി. ശബരിമല വിഷയത്തോടെ ശക്തി പ്രാപിച്ച ബിജെപിയുടെ ഇനി നോട്ടം മഞ്ചേശ്വരമാണ്.