ശബരിമല സന്നിധാനത്തെ നടപ്പന്തലില്‍ യുവതിയെത്തിയെന്ന സംശയത്തെ തുടര്‍ന്ന് ഭക്തരുടെ പ്രതിഷേധം. ഇരുമുടിക്കെട്ടുമായെത്തിയ തമിഴ്‌നാട് തിരുച്ചിറപ്പള്ളി സ്വദേശിനി ലതയെ തടയാന്‍ ഭക്തര്‍ ശ്രമിച്ചു.

 നടപ്പന്തലിലെത്തിയ സ്ത്രീയുടെ പ്രായം സംബന്ധിച്ച് അവിടെയുണ്ടായിരുന്ന ചിലര്‍ക്ക് സംശയം തോന്നിയതാണ് ആശയക്കുഴപ്പങ്ങള്‍ക്ക് കാരണമായത്. വളരെപ്പെട്ടന്നാണ് സമാധാന അന്തരീക്ഷം മാറി നടപ്പന്തലില്‍ പ്രതിഷേധമുയര്‍ന്നത്.

പതിനെട്ടാംപടിക്ക് വളരെ അടുത്ത് വരെ അവര്‍ എത്തിയിരുന്നു. ഈ സാഹചര്യത്തിലാണ് ശരണം വിളികള്‍ മുഴക്കി ഒരുകൂട്ടം ഭക്തര്‍ സംഘടിച്ചതും പ്രതിഷേധിച്ചതും. ഒരു യുവതി വലിയ നടപ്പന്തലില്‍ എത്തിയെന്ന സംശയത്തെത്തുടര്‍ന്നാണ് ഭക്തര്‍ പ്രതിഷേധിച്ചത്.

സ്ത്രീക്ക് അമ്പത് വയസിന് മുകളില്‍ പ്രായമുണ്ടെന്ന് പോലീസ് പറയുകയും അവര്‍ ഐഡി കാര്‍ഡ് കാണിച്ചതോടെ പ്രായം സ്ഥിരീകരിക്കുകയും ചെയ്തതോടെ പ്രതിഷേധം അവസാനിപ്പിക്കുകയായിരുന്നു. എന്തായാലും പോലീസ് സുരക്ഷയോടെ മാത്രമാണ് അവര്‍ക്ക് പതിനെട്ടാം പടി കയറാനായത്. പ്രകോപന സാധ്യത കണക്കിലെടുത്ത് പോലീസ് സംരക്ഷണവലയം തീര്‍ത്തിരുന്നു. തമിഴ്‌നാട് സ്വദേശിനിയായ ലത എന്ന അമ്പത്തിരണ്ടുകാരിക്കാണ് പ്രതിഷേധം നേരിടേണ്ടിവന്നത്. ഭര്‍ത്താവിനും മകനുമൊപ്പമാണ് ഇവര്‍ എത്തിയത്. ഇത് രണ്ടാം തവണയാണ് ശബരിമലയില്‍ ദര്‍ശനത്തിനെത്തുന്നതെന്നും അവര്‍ അറിയിച്ചു.

യുവതികളായ പത്തിലധികം പേര്‍ ഇന്ന് ക്ഷേത്രദര്‍ശനത്തിനെത്തുമെന്ന അഭ്യൂഹങ്ങളെത്തുടര്‍ന്ന് വ്യാപക പ്രചാരണമാണ് ശബരിമലയില്‍ നടക്കുന്നത്. ഏതു സമയത്തും പ്രതിഷേധത്തിന് തയ്യാറായാണ് ഭക്തര്‍ എന്ന സൂചനയും സന്നിധാനത്ത് നിന്ന് ലഭിക്കുന്നു.