പിണറായി വിജയന്റെ യുഎഇ സന്ദര്‍ശനം വിജയത്തിലേക്ക് നീങ്ങുമ്പോള്‍ കേരളത്തില്‍ മന്ത്രിമാര്‍ തമ്മിലുള്ള പോര് രൂക്ഷം. നേതാക്കളും അണികളും അസംതൃപ്തര്‍. ശബരിമല പ്രശ്‌നം കൈകാര്യം ചെയ്തു കുളമാക്കി എന്നാണ് പൊതുവെയുള്ള വിലയിരുത്തല്‍.

മുഖ്യമന്ത്രിയോട് അടുപ്പം പുലര്‍ത്തുന്ന കടകംപള്ളി സുരേന്ദ്രന്‍ ദേവസ്വം ഇടപെടലുകളില്‍ പലപ്പോഴും വ്യത്യസ്ത നിലപാടുകള്‍ സ്വീകരിക്കുന്നു. ദേവസ്വം ബോര്‍ഡിനെ മുന്നില്‍ നിര്‍ത്തി സ്ത്രീ പ്രവേശന വിഷയം മുഖ്യമന്ത്രി കൈകാര്യം ചെയ്തിരുന്നു. എന്നാല്‍ മുഖ്യമന്ത്രിയുടെ അഭാവത്തില്‍ കടകംപള്ളി കളം നിറഞ്ഞ് കളിക്കാന്‍ തുടങ്ങി. ശബരിമലയിലെ എല്ലാ കാര്യങ്ങളും തന്റെ നിര്‍ദ്ദേശ പ്രകാരമേ നടക്കൂ എന്ന ഒരു പ്രതീതിയുണ്ടാക്കി. പാര്‍ട്ടിക്കു വിശ്വസ്തനായ ഐജി ശ്രീജിത്തിനെ ശബരിമലയിലേക്കയച്ചത് പിണറായിയുടെ തീരുമാനമായിരുന്നു. ചുംബന സമരവും രശ്മി നായര്‍ കേസുമൊക്കെ കൈകാര്യം ചെയ്തിരുന്ന ശ്രീജിത്തിന് രഹ്ന ഫാത്തിമയെ അടുത്തറിയാം. അഹിന്ദുവായ രഹ്നയെ അതീവ സുരക്ഷയൊരുക്കി സന്നിധാനത്തിലേക്ക് ആനയിച്ചത് കടകംപള്ളി അറിഞ്ഞിരുന്നില്ലേ ? അതോ എല്ലാം കൈവിടുമെന്നായപ്പോള്‍ പുറത്തിറക്കിയ തന്ത്രമായിരുന്നോ പോലീസിനോട് മടങ്ങാനുള്ള നിര്‍ദ്ദേശം.

എന്നാല്‍ പാര്‍ട്ടി നിലപാട് തുറന്നു പറഞ്ഞ ജയരാജനും കോടിയേരിയും കടകംപള്ളിയെ തള്ളി. സുധാകരന്‍ ഒന്നും മിണ്ടുന്നില്ല. മന്ത്രിമാര്‍ തികഞ്ഞ അഭിപ്രായ ഭിന്നതയിലാണ്. ഗൃഹസന്ദര്‍ശനം നടത്തി ശബരിമല വിഷയം ബോധവത്ക്കരണം എന്ന നിലപാട് പാര്‍ട്ടി അണികള്‍ക്ക് പൊതുവെ സ്വീകാര്യമല്ല. മഞ്ചേശ്വരം ഉപ തെരഞ്ഞെടുപ്പ് ബിജെപിക്കനുകൂലമായാല്‍ എല്ലാം കൈവിട്ടു പോകും. ഹൈന്ദവ വികാരം സിപിഎമ്മിനെതിരായി എന്ന ചിന്ത പാര്‍ട്ടിയെ അലട്ടുന്നുണ്ട്. എപ്പോള്‍ വേണമെങ്കിലും ഒരു പൊട്ടിത്തെറിയിലെത്താം. അതാണ് സ്ഥിതി.