യുവതിപ്രവേശനം അനുവദിച്ചുകൊണ്ടുള്ള സുപ്രീംകോടതി വിധിയുടെ പശ്ചാത്തലത്തിൽ ഇരുമുടിയേന്തി യുവതികൾ ശബരിമലയിലെത്തിയിരുന്നു. എന്നാൽ അയ്യപ്പ ഭക്തരുടെ കടുത്ത പ്രതിഷേധത്തിൽ ശബരിമലയിലെത്തിയ യുവതികൾക്ക് തിരികെ മടങ്ങേണ്ടതായി വന്നു.

അതേസമയം യുവതി പ്രവേശനത്തിൽ പ്രതിഷേധങ്ങൾ ശക്തമാകുന്ന വേളയിൽ യുവതികളെ കയറ്റില്ലെന്ന് പ്രഖ്യാപിച്ച് നടക്കുന്ന സമരങ്ങളെ വിമര്‍ശിച്ച് എഴുത്തുകാരി തസ്‌ലീമ നസ്റിന്‍ രംഗത്തെത്തിയിരിക്കുകയാണ്.

യുവതികളെ മാത്രമാണോ കയറ്റില്ലെന്ന ചോദ്യം ഉന്നയിച്ച തസ്ലിമ നിരീശ്വര വാദികളുടെ കാര്യത്തിലെ അഭിപ്രായം എന്താണെന്നും ആരാഞ്ഞു. തനിക്ക് 56 വയസ്സായെന്നും താനൊരു നിരീശ്വരവാദിയാണെന്നും ശബരിമലയിൽ കയറാനാകുമോ എന്നായിരുന്നു തസ്‌ലീമ ട്വിറ്ററിൽ കുറിച്ചത്.

ആക്ടിവിസ്റ്റുകള്‍ക്കെതിരായ മന്ത്രി കടകംപള്ളിയുടെ ഇന്നലത്തെ പ്രസ്താവനയോടുള്ള പ്രതിഷേധം കൂടിയാണ് എഴുത്തുകാരി അറിയിച്ചതെന്ന വിലയിരുത്തലാണ് സമൂഹമാധ്യമങ്ങളിൽ ഉയരുന്നത്.

അതേസമയം നിരവധി ആളുകളാണ് തസ്ലീമ നസ്‌റിന്റെ ട്വീറ്റിന് താഴെ പ്രതികരണവുമായി എത്തിയിരിക്കുന്നത്. ഒരു അവിശ്വാസിയായ നിങ്ങള്‍ എന്തിനാണ് ക്ഷേത്രത്തില്‍ പോവുന്നത്, നിങ്ങള്‍ക്ക് ശബരിമലയില്‍ കയറണമെങ്കില്‍ ആദ്യം ഹിന്ദുമതത്തില്‍ വിശ്വസിക്കൂ എന്ന പ്രതികരണമാണ് അധിക ആളുകളും നടത്തിയിരിക്കുന്നത്.

തസ്‌ലീമ നസ്റിന്റെ ട്വിറ്റർ പോസ്റ്റ്.......

"എനിക്ക് 56 വയസ്സായി, എനിക്ക് ശബരിമലയില്‍ കയറാന്‍ പറ്റുമോ ?, പക്ഷെ ഞാന്‍ നിരീശ്വരവാദിയാണ്"
"I am 56. Can I enter #Sabarimala temple? BTW, I am an atheist."