ശബരിമല വിഷയം ചര്‍ച്ച ചെയ്യാന്‍ തലസ്ഥാനത്ത് ഇന്ന് ഉന്നത പോലീസ് ഉദ്യോഗസ്ഥരുടെ യോഗം ചേരും. മുഖ്യമന്ത്രി പങ്കെടുക്കുന്ന യോഗം രാവിലെ 11 മണിക്കാണ് ചേരുന്നത്. ശബരിമലയില്‍ തുലമാസപൂജയ്ക്കിടയില്‍ നടന്ന സംഭവവികാസങ്ങളും ദര്‍ശനത്തിന് എത്തിയ സ്ത്രീകള്‍ക്ക് നേരിടേണ്ടി വന്ന പ്രതിഷേധവും യോഗം വിലയിരുത്തും. പ്രതിഷേധങ്ങളില്‍ പോലീസ് റജിസ്റ്റര്‍ ചെയ്ത കേസുകളെക്കുറിച്ചും ചര്‍ച്ച ചെയ്യും. ലോക്‌നാഥ് ബെഹ്‌റ, മനോജ് ഏബ്രഹാം, ശ്രീജിത്ത് എന്നിവര്‍ക്ക് പുറമേ കോട്ടയത്തെയും പത്തനംതിട്ടയിലെയും ഉന്നത പോലീസ് ഉദ്യോഗസ്ഥര്‍ എന്നിവരും യോഗത്തില്‍ പങ്കെടുക്കുന്നുണ്ട്.
ശബരിമലയില്‍ സുപ്രീംകോടതി വിധി നടപ്പാക്കുന്ന കാര്യത്തില്‍ സര്‍ക്കാര്‍ ഉറച്ചു തന്നെയാണെന്ന് കഴിഞ്ഞ ദിവസം തന്നെ മുഖ്യമന്ത്രി വ്യക്തമാക്കിയിരുന്നു. ക്ഷേത്രത്തില്‍ പന്തളം കൊട്ടാരത്തിന് അധികാരമില്ലെന്നും തന്ത്രിയുടേത് അതിരുവിട്ട അവകാശവാദമാണെന്നും മുഖ്യമന്ത്രി പറഞ്ഞിരുന്നു. സംഘര്‍ഷങ്ങള്‍ സംഘപരിവാര്‍ സൃഷ്ടിയാണെന്നും സന്നിധാനത്ത് പ്രതിഷേധം പോലെയുള്ള കാര്യങ്ങള്‍ സംഘടിപ്പിക്കുന്ന രീതിയില്‍ തങ്ങാന്‍ ആരേയും അനുവദിക്കില്ലെന്നും മുഖ്യമന്ത്രി പറഞ്ഞു.

ക്ഷേത്രം അടയ്ക്കുകയോ തുറക്കുകയോ ചെയ്യുന്നതു ദേവസ്വം ബോര്‍ഡിന്റെ അധികാരപരിധിയില്‍പ്പെട്ട കാര്യമാണ്. ബോര്‍ഡിന്റെ ചില്ലിക്കാശുപോലും സര്‍ക്കാര്‍ എടുക്കുന്നില്ലെന്നും മുഖ്യമന്ത്രി ഓര്‍മിപ്പിച്ചു. തുറന്ന ക്ഷേത്രം എങ്ങനെ പ്രവര്‍ത്തിക്കണമെന്നു തീരുമാനിക്കാനുള്ള അവകാശം മാത്രമാണു തന്ത്രിക്കുള്ളത്.പന്തളം കൊട്ടാരത്തിനെതിരേ ഇന്നലെ മുഖ്യമന്ത്രി ആഞ്ഞടിച്ചിരുന്നു. 1949ല്‍ തിരുവിതാംകൂര്‍, കൊച്ചി രാജവംശങ്ങളും കേന്ദ്രസര്‍ക്കാരുമായി ഉണ്ടാക്കിയ കവനന്റ് (ഉടമ്പടി) പ്രകാരം പന്തളം കൊട്ടാരത്തിനു ശബരിമലയില്‍ യാതൊരു അധികാരവുമില്ല. ഉടമ്പടിയില്‍ പന്തളം കൊട്ടാരത്തെക്കുറിച്ചു പരാമര്‍ശവുമില്ല. ഉത്സവകാലത്തും മറ്റും പന്തളം കൊട്ടാരത്തിനു ശബരിമലയില്‍ ചില ഉത്തരവാദിത്വങ്ങള്‍ നിലവിലുണ്ട്. അത് ഇല്ലാതാക്കുക സര്‍ക്കാരിന്റെ നയമല്ല. ക്ഷേത്രം തുറക്കാനും അടയ്ക്കാനുമുളള അധികാരം ദേവസ്വം ബോര്‍ഡിനാണ്.
മണ്ഡലമകരവിളക്കുകാലത്തെ തിരക്കു കുറയ്ക്കുന്നതിന്റെ ഭാഗമായി എല്ലാമാസവും അഞ്ചുദിവസം നട തുറക്കാന്‍ തീരുമാനിച്ചതും ബോര്‍ഡാണെന്നും പറഞ്ഞിരുന്നു. അതിനിടയില്‍ ശബരിമലയുമായി ബന്ധപ്പെട്ട് രണ്ടു ഹര്‍ജികള്‍ ഇന്ന് ഹൈക്കോടതി പരിശോധിക്കുന്നുണ്ട്.