ഒന്ന് ആവേശത്തില് നാലാളറിയാന് ശബരിമലയില് പോയ ബിന്ദു ... വാടകവീട്ടിലും സ്കൂളിലും കയറാന് പറ്റുന്നില്ല
ശബരിമല ദര്ശനത്തിനു ശ്രമിച്ച അധ്യാപികയുടെ ജീവിതം മാറി മറിഞ്ഞു. നാലാളറിയാന് വേണ്ടി ഇറങ്ങിപ്പുറപ്പെട്ട ബിന്ദു ശബരിമലയിലും എത്തിയില്ല വീട്ടിലും എത്തിയില്ല. അവസാനം സുഹൃത്തിന്റെ ഫ്ളാറ്റിലും കയറ്റിയില്ല. ഇതോടെ ജീവിതം വഴിമുട്ടുകായണ്. ഇതിനെതിരെ കേസെടുക്കാന് പറ്റില്ലെന്ന് മനുഷ്യാവകാശ കമ്മീഷനും നിലപാടെടുത്തു.
ബിന്ദുവിന് വാടകവീട്ടിലും പഠിപ്പിക്കുന്ന സ്കൂളിലും പ്രവേശന വിലക്കാണ്. കോഴിക്കോട് മെഡിക്കല് കോളജ് ക്യാമ്പസ് ഹയര് സെക്കന്ഡറി സ്കൂള് അധ്യാപിക ബിന്ദു തങ്കം കല്യാണിയാണ് വീട്ടിലും സ്കൂളിലും 'വിലക്ക്' നേരിടുന്നത്. വാടകവീട്ടില്നിന്നും സുഹൃത്തിന്റെ ഫ്ളാറ്റില്നിന്നും പുറത്താക്കപ്പെട്ട ഇവര് പോലീസിന്റെ സഹായം തേടി. കടുത്ത ഭീഷണി നിലനില്ക്കുന്ന സാഹചര്യത്തില് ബിന്ദുവിനെ സുഹൃത്തിന്റെ വീട്ടിലാണ് ഇപ്പോള് താമസിപ്പിച്ചിരിക്കുന്നത്.
നട അടച്ച ദിവസമാണ് ബിന്ദു ശബരിമലയിലെത്തിയത്. ആചാരം ലംഘിച്ചെത്തിയ ഇവരെ ശബരിമല സംരക്ഷണസമിതി പ്രവര്ത്തകര് തടഞ്ഞു. അതോടെ ദര്ശനം നടത്താതെ മടങ്ങി. ജീവനു ഭീഷണിയുള്ളതിനാല് മൂവാറ്റുപുഴ പോലീസാണ് ഇന്നലെ ബിന്ദുവിനെ കോഴിക്കോട് ചാലപ്പുറത്തെ സുഹൃത്തിന്റെ ഫ്ളാറ്റിലെത്തിച്ചത്. പുലര്ച്ചെ നാലിനെത്തിയ അവര് എട്ടുമണി വരെ അവിടെ കിടന്നുറങ്ങി. അപ്പോഴേക്കും സംഘപരിവാര് പ്രവര്ത്തകരും അയ്യപ്പഭക്തരുമെത്തി ഫ്ളാറ്റിന്റെ ഉടമയോടു ബിന്ദുവിനെ ഉടന് പറഞ്ഞയയ്ക്കണമെന്ന് ആവശ്യപ്പെട്ടു.
സുഹൃത്തും വാടകയ്ക്കാണു താമസിക്കുന്നതെന്നും അയാളെ ഫ്ളാറ്റില്നിന്ന് ഇറക്കിവിടുമെന്നും കൈകാല് വെട്ടുമെന്നും ഭീഷണിയുണ്ടായതായും ബിന്ദു പറഞ്ഞു. ഫ്ളാറ്റിന്റെ വാതില് തകര്ത്ത് അകത്തുകയറാനും ശ്രമം നടന്നു.
വരരുതെന്നു വീടുടമ അറിയിച്ചതിനെത്തുടര്ന്നു കോവൂരിലെ വാടകവീട്ടില് പോകാനും ബിന്ദുവിനു സാധിച്ചില്ല. നാട്ടുകാര് വീടു തകര്ക്കാന് സാധ്യതയുണ്ടെന്നും അതിനാല് അവിടേക്ക് വരരുതെന്നുമാണ് ഉടമ ഇവരെ അറിയിച്ചത്. സ്കൂളിനു ഭീഷണിയുള്ളതിനാല് അവിടേക്കും പോകാന് കഴിഞ്ഞില്ല. ഇതേത്തുടര്ന്നു ബിന്ദു കസബ പോലീസിന്റെ സഹായം തേടി. പോലീസ് വാഹനത്തില് കസബ സ്റ്റേഷനിലേക്കു കൊണ്ടുവന്ന ബിന്ദുവില്നിന്നു മൊഴിയെടുത്തു.
അതിനുശേഷം പോലീസിന്റെ സംരക്ഷണത്തില് മറ്റൊരു സുഹൃത്തിന്റെ വീട്ടിലേക്കു കൊണ്ടുപോയി. ബിന്ദു പഠിപ്പിക്കുന്ന മെഡിക്കല് കോളജ് ക്യാമ്പസ് ഹയര് സെക്കന്ഡറി സ്കൂളിലേക്കു കഴിഞ്ഞ ദിവസം മാര്ച്ച് നടന്നിരുന്നു. സ്കൂളില് കയറാന് അനുവദിക്കില്ലെന്ന നിലപാടിലാണ് സംഘപരിവാര് പ്രവര്ത്തകര്. കുട്ടികളുടെ ജീവന് പ്രശ്നത്തിലാവുമെന്നതിനാല് തല്ക്കാലം സ്കൂളിലേക്ക് വരരുതെന്ന് സ്കൂള് പ്രിന്സിപ്പല് ഇവരെ അറിയിച്ചിട്ടുണ്ട്. സ്കൂളിനു പോലീസ് സുരക്ഷ ഏര്പ്പെടുത്തുന്നത് കുട്ടികളെ ബാധിക്കുമെന്നും പ്രിന്സിപ്പല് വ്യക്തമാക്കിയതായാണ് വിവരം.
"
https://www.facebook.com/Malayalivartha
